Read Gangte NEHEMIA 5 Bible Online

NEHEMIA 5 - Gangte bible

NEHEMIA 5

¹Khutichun, mipite leh a ziteu chuh a suohpih Judate chung a lung-awilo a phun in a kiko vengvung u a.

²“Kei uh leh ka chapateu leh ka chanuteu tawh tamtak ka hiua, zieziekchun ka hin theih na dingun buh ka na la mai ui,” ti a gen pawl a um u a.

³Chun, khenkhat in, “Ka lo u leh ka grep huon teu leh ka In u haw ka zuok u a, kiel zieka buh leh bâl ka châwk theih na dingun,” ti a gen pawl le a um ui.

⁴“Chuleh, ka loteu leh ka grep huon hawu a dit dingin leng kawma leiman a piek dingin sum thuoi ka na lau hi,” ti a gen pawl le a um kit ui.

⁵“Ka suohpih teu tawh taksa leh thisana pumkhat ka hi tho u a; chuleh, ngaitie, ka chapateu leh ka chanuteu chuh suok a um dingin ka hun pui u a, ka chanu teu khenkhat vang chuh suok a lutsa le a hitau hi. Amau chulah ka tan kit zo ta puou a, midang in ka lo u leh ka grep huon hawu a kilak ta ngâl u a,” a tiu a.

⁶Zie thu leh a kiko thawm u chuh ka zak phetin, ka lungthim a na mah mah zieng a.

⁷Khutichun keingawn a ka ngaihtuoh zawh phetin.lawiupate leh vaihawmte chuh ka vau a, hiti hin a kawm u ah, “Mitin in na suohpih teu a lawk delh in sum na palâk sak zing u a,” ti’n. Chun, a chungchâng thuu achun mi tampi ka sam khawm a.

⁸Chun, a kawm u ah, “Nam dang te kienga khawtsa I suohpih uh Judate chuh I theih bang bangun I tandawk tau a; nang hawn na suohpih teu chuh na kizuok sak uh ahi maw? Eihaw kawm ahin a kizuok dinguh a ahim?” ka ti a. Khutichun, a thip kêi u a, gen ding bang mah a nei puou hi.

⁹“Na thilhih u hi a pha hiel puoi, I melmateu leh namdangte ei muhsit na ziek hin I Pathien uh na kihchak zawk dinguh hilo ahim?” ka ti a.

¹⁰“Kei leh ka suohpih te leh ka suok te’n le zie guol chun a lawk um in ka bat sak thei tho ui; a lawk delh a sum palâk sak hi haihsan kei hitiu, ti a ka hun nget na hiu hi.

¹¹Tuni ngêi hin a loteu, a grep huonteu, olive huonte leh a inteu leh a sum uh leh a buhlebal leh uain leh sathau hawp za a hawp khat na lak sek u chuh pie kit vek un,” ka ti a.

¹²Khutichun, amau chun, “Pie kit vek ung kau, amau apat in bangmah ngek puo’ng kau, na gen guol tak chun hih ung kau,” a tiu a. Khutichun, thiempute ka sama, zie thutiem bang taka hih ngêi dingin a masang u ah ka kitiem sak a.

¹³Ka puonchen ka thinga, “Zie thutiem bang taka hih lo chuh a In a kipat leh a nasep a kipatin thinthak hi henla, khutngawn in um hen” ka ti a. Chun, mipite chengcheng chun, Amen, LALPA chuh pakchau in, a tiu a. Khutichun, mipite chun zie thutiem dungzui chun a hih tau a.

¹⁴Zielo chule Juda gama amau haw chunga vaihawm dinga guot ka hih apat in, leng Artazerzia’n kum sawmnih vai a hawm kum apat a kum sawmthum leh kum nih vai a hawm tiengin, kum sawm le nih sung hin kei leh ka suohpih te hin gamsung vaihawmpa chanvo chângthâk himhim ka ne kha puou hi.

¹⁵Himahlele, tumasang a vaihawm te kha mipite puokgik ahiu a, dangka sekel sawmli tihloh a chângthâk teu leh a uain teu a lâksak sek u a, a suokteu nasan mipite chungah a kilalsak nalai u a. Himahleh, ken vang Pathien kihchakna ziekin khutibang chun ka hih puoi.

¹⁶Ahi, khutih malak in, kulhbang siemna ahin ka pang zinga, gam himhim ka chaw puou a; ka suok te’n le na chuh sem in zie chun a um khawm zing ui.

¹⁷Zie mai chuh hilo in, ka kiengvêl u a nam dang hung telte simloh in Juda mite leh vaihawmte laka ka dawhkhâng a an ne mi za leh sawmnga a um zing ui.

¹⁸Chun, kei a dinga ni khat a a guonggalh u chuh bâwngchal khat leh belam thau chiet gup ahi sek hi. Chun, vacha sa le keia ding chuom a um a, ni sawm hal zel in uain zat chuom chuom tawh guonggalh mahleu, zie mite puok hi a gik bêk ziekin gamsung vaihawmpa chanvo chuh ka ngek kha puoi.

¹⁹Aw ka Pathien, zie mipite chunga ka thilhih chengcheng hi ka phat na dingin hezing in.