Read Gangte NEHEMIA 6 Bible Online

NEHEMIA 6 - Gangte bible

NEHEMIA 6

¹Chun, hiti hi ahi a, Sanballat leh Tobia leh Arab mi Gesem leh ka melma dang te chun kulhbang ka siem u a, a sietna himhim a um ta puoi tih a het phet u chun (amah vang chuh zie hun lai chun kawtkhakhaw chuh ka siem nai puou hi)

²Sanballat leh Gesem chun, “Hung inla, Ono phai a khuo khat ah kimu khawm hitiu,” ti’n ei hun thuthak u a. Himahleh, ka chunga thil phalo bawl guo a na hizing u a.

³Chun, ken a kawm u ah, “Na lopi tak sem ka hi a, ka hung suk thei puoi. Bang ziekin em na kawm u a ka hung suk kal a ka nasep chuh a chawlh mai ding?” ti’n mi ka sawl a.

⁴Khutibang ngên chun li vei ei hun thuthak u a, amau chuh khutibang ngên chun ka dâwng a.

⁵Khutichun, Sanballat chun a ngavei na achun lehkhathawn hawnsa hun chawiin a suokpa chuh ka kawmah a hun sawl a.

⁶Zie sung achun, “Nang leh Judate hin kiphin na guou a, zieziek a chuh kulh hi na siem uh ahi tih thu nam dang te kieng ah a kithang ta a, Gesem in a gena, chun, a gen dân u chun nang hi a leng u a pan guo na hi,” tih a kizik a.

⁷“Chun, Juda gam achun leng a um hi ti a genzak ding leh Jerusalem a phuong viel dingin thiemgau le na guot hiel ta ngâla; zie thu hi leng kawm achun kin takin hilh untin; zieziekchun, tuhin hung inla holim khawm hitiu,” ti’n a kizik a.

⁸Khutichun, a kawmah, “Na thil gen bang hin bang mah a um puoi, na phuokkawm ahi,” ti’n a kieng ah palai ka sawl a.

⁹“A nasep uh a pitit theih loh na dingin a khut hawu chuh sukchauh sak a um ding ahi,” ti’n amau chun ei sulau u a. Zieziekchun, Aw Pathien, tuhin ka khutteu suhat in.

¹⁰Zie zawh chun, Mehetabel chapa Delaiah chapa Shemaiah kawt kamkhum a umpa in a chun ka chieh a. Amah chun, “Pathien Ho-In sung ah kimûi ti; Ho-In kawt haw chuh khâk hiting, zan leh nang hun that dinga hung ding ahiu ui,” a ti a.

¹¹Chun, ken, “Kei u lawi hi taisie ding chi ka hiu em? A hinna hukbit na dinga Ho-In a tailut ding kuo a? Tailut hiel puo’ng ka,” ka ti a.

¹²Chun, ngaitie, Pathien sawl ahi puoi tih ka hedawk a; Sanballat leh Tobia te’n a gawlhguk ziek u a zie tawbang thu chuh a na gen ahi.

¹³Tia chuh ka lauhthawng zieka thil gilo ka bawl a, ei gensiet na ding u leh ei sukminsiet na ding a muh theih na dinguh a a gawih uh a na hi.

¹⁴“Aw ka Pathien, Tobia leh Sanballat hi a thilhih bang zel u hin vaihawm sak in, thiemgau numei Noadiah leh thiemgau dang ei suklauhthawng guo chengcheng te tawh,” tin ka paucham a.

¹⁵Khutichun, kulhbang chuh ni sawmnga leh ni nih ni, Elul tha ni sawmnih leh ni nga ni chun zawh ahi ta a.

¹⁶Chun, hiti hi ahung hi a, ka melmateu chun zie thu chuh a na zau a, ka kimvel u a nam dang te chun zie chuh a muh phet un; zie nasep hi Pathien panpihna a zawh ahi tih a het ziekun, a lungkie mah mah mai u a.

¹⁷Zielo chun, zie hun lai chun Juda milien te chun Tobia chuh tamtak vei lehkha a thâk u a; Tobia lehkhathâk chule tamtak vei a hung tung a.

¹⁸Amah chuh Arah chapa Shekania mâkpa a hih ziekin Juda gama mi tamtak amah kithuohpih dinga kipautiem a um u a. Chun, a chapa Jehohanan chun Berekiah chapa Meshullam chanu zi’n a nei a.

¹⁹Zielo chun le ka masang ah a thilpha hih haw a gen sek u a; ka thugen haw chuh a kawmah a tun zel u a, tichun, Tobia chun ei sulauthawng dingin lehkha ei hun thâk sek hi.