Read Gangte ESTHER 1 Bible Online

ESTHER 1 - Gangte bible

ESTHER 1

¹Leng Ahasuer a lal lai in hiti hi a hung hi a (Ahasuer chuh India apat a Ethiopia chana gambung za leh sawmnih leh sagih chung a leng ahi a).

²leng Ahasuer chuh a lalgam sunga Susan leng In sunga a lalchutphah a a chut lai in,

³a vaihawm kum thum kum in a milien te chengcheng leh a suokte cheng chenga dingin guol vakna a siem a, Persia leh Media gambung tin a mineizote leh milien chengcheng chuh a tel vek u a.

⁴A gam lopi tak leh a hauhsakna haw leh, a leng hihna nasat dân chuh ni za leh sawm giet sung zet a etsak a.

⁵Ziehaw zawh chun, milien leh mineu te, Susan a hung tel chengcheng te ding chun leng in huongsung inmai ah leng chun ni sagih zet guolvakna a siem a.

⁶Zie huongsung chuh puon vam, a dum, patngatpuon sandup, dangkaguo thikkuol leh marble khuom haw a kanden u a; sana leh dangkaguo chutphah haw chuh marble, a san, a vam, a dum, leh a tuipâneng te haw a kilem chung achun a kawih u a.

⁷Sana khawn in uain a hawm u a, khawn chuh chichuom chuom kibanglo chiet lengpa chun a hau mah mah a uain chuh a um gei gui mai hi.

⁸Dâwn ding chuh a chin bei a hi a; kuomah pawngbawl a hi puou a, mitin in a deih bang bang u a a dâwn chiet dingun leng chun a In a lawiupa chengcheng te chuh thu a pie a.

⁹Zielai chun, lengnu Vasti chun le leng In huongsung a numei te dingin guolvakna a siem a.

¹⁰A ni sagih ni a lengpa lungthim uain in a hun sukkipak phet chun mitilgeh sagih, amah panpih sekte, Mehuman te, Biztha te, Harbona te, Bigtha te, Abagtha te, Zethar te, Karkas te chuh a sama.

¹¹Lengnu Vasti chuh lengpa masang a a lallukhuk puma mipite leh leng chate masanga a melhawihna sulang dinga va pui dingin thu a pie a. Lengnu chuh numei mel hawihtak ahi ngâla.

¹²Himahleh lengnu Vasti chuh pindan vengte’n chieh dinga leng thupiek a hilh u chuh a niel a, zieziekchun, leng chuh a lungna mah mah a, a lungnat chuh a kuong zak ta a.

¹³Khutichun, leng chun miching te, hun umdan he mite kawm a chun (dân leh vaihawm dân he chengcheng te chuh zie tawbang chun leng in a dawt sek him ahi;)

¹⁴Chun, a mah bân achun Karshen te, Shethar te, Admatha te, Tarshis te. Meres te, Marsena te, Memukan leng mel mu zing zingte, a lalgam khatna achu, Persia leh Media leng cha sagih a um u a.

¹⁵Ziete kawm achun, “Kei leng Ahasuer hin lengnu Vasti kawm achun ka suokte thupiek tawh ka sawl a, himahleh a na niel ta a, zieziekchun a mah chunga I hih ding dân u chuh dân in bangti’n a gen hi?” a ti a.

¹⁶Ziephet chun, Memukan chun leng leh milien te kawm achun, “Lengnu Vasti hin lengpa chung chauh a sukhiel ahi puoh a, milien chengcheng leh leng gambung tina mipite chunga sukhiel ahi.

¹⁷Leng Ahasuer chun lengnu Vasti chuh a masanga hun pui dingin thu a pie a, himahleh, amah chuh a hung puoi tih a ahung kigen sawn tieng leh, lengnu thilbawl chuh numei cheng chengin hun heu in tin, tichun, a pasal teu musit mai ding ahiu hi.

¹⁸Zieziekchun, tuni ngêi hin le Persia leh Media leng chate, lengnu thilhih hete hin leng miliente chungah hih un tin. Tichun, kimuhsitna leh lungnatna nasa tak hung tun lawh ding ahi.

¹⁹Leng phasak lam ahih chun, leng thupiek chuh thangviel hen la, lengnu Vasti chuh leng masangah hung kilang ta hiel kihen, zie thu hi sukzatchuom takloh hiel dingin Persia leh Media gam dân lak ah zik hihen; chuleh, a mun chuh numei amah sanga phazaw midang khat lengnu hi dingin luoh sak in um hen.

²⁰Leng thupiek chuh gam cheng chenga thehzak ahih tieng, numei chengcheng in milien leh a neu inle a pasalteu zah chiet tan au,” a ti a.

²¹Zie ngaihdan thu chun leng leh miliente chuh a sukipak ten ta a; tichun leng chun Memukan thugen bang chun a hih ta a.

²²Leng gam chengcheng ah, gamtin ah amau haw pau chietin, namtin amau pau chietin, pasal in amau insung chieta thu a neih dinguh ahi tih thu a thakviel tai.