Read Gangte ESTHER 2 Bible Online

ESTHER 2 - Gangte bible

ESTHER 2

¹Zie thil haw nunga leng Ahasuer lungnat a hung daih nung chun, Vasti chun bang thil ana bawl a, a chunga bang thupiek kikiek sak ahi tâm tih a hun ngaihtuoh dawka.

²Khutichun, a nasem, a suokte chun, “Lengpa a dingin nungak melhawih hawl hi henla,

³Chun, leng in nungak thiengtho melhawih chengcheng chuh Susan a leng In a numeite In ah, numeite enkawl leng nasem mitilgeh Hegai etkawlna muna puikhawm dingin leng gam bung tin ah lawiupa ding guot henla; chun, a kisukthienthona dinguh thil pawimawh piek chiet hi hen la;

⁴Chun, nungak laka leng sukipak pên chuh Vasti thasang in lengnu hi henla,” a tiu a. Tichun zie chun leng chuh a sukipak a, khutibang chun a hih ta a.

⁵Chun, Susan leng In achun Juda mi, mi khat hi a um a, a min chuh Mordekai a hi a, amah chuh Jair chapa; Shimei chapa, Kish chapa Benjamin nam a mi khat a uma.

⁶Amah chuh Juda leng Jehoiakin tawh Jerusalem apat a Babulon leng Nebuknezar in sala a puih laka tel ahi.

⁷Chun, amah chun a pa suohpihpa chanu, Hadassah, Esther kiti chuh a nei a; nungak chuh duong hawihtak leh melhawih tak a hi a; a nu leh a pa a thih nung u chun Mordekai chun a chanu dinga a etkawl ahi.

⁸Chun, hiti hi a hung hi a, leng in a thuphuon thak chuh a hun thehzak phet chun, nungak tamtak chuh Susan leng In a Hegai etkawlna In a chun a hung khawm tau a, Esther chule lengpa In a numeite enkawl Hegai etkawlna mun achun a hun pui u a.

⁹Tichun, nungak chun amah chuh a sukipak a, a deihsakna a chang a, leng In apat a chanvo leh a kisukthienna ding chuh a pie a, lengpa In a kipat chun nungak sagih a pie pai zieng a. Amah chuh umna mun phapen a pie a, tichun, amah leh a nungak chanpih te chuh numeite umna mun phapen achun a pui ta a.

¹⁰Mordekai in Esther chuh a mite leh a chipihte kawma na kihetsak loh ding ahi a tih ziekin, kuo ahih a kisulang puoi.

¹¹Tichun, Esther chuh bang a ti zel em tih leh, bang ti’n thil a um zel em tih he dingin Mordekai chuh nicheng in numeite umna In mai huongsung achun a vak viel sek a.

¹²Tichun, numeite ngeina dana tha sawm leh tha nih a um tieng u leh leng Ahasuer kawma a va lut hun dinguh a hung tung sek hi. Numeite hawihtak a a kicheina ding u chun kum khat sung a lut a, murra thau kinuhna chuh tha gup a lut a, gimlim tak chuh tha gup mah a kinuh sek uh ahi,

¹³Zie zawh tieng chuleh Nungakte chuh leng Ahasuer kawmah a bawn un a chieh sek uh ahi. Numeite umna apat a leng in a a chieh tieng u leh, a deihtak phawt un a kivan sek uh ahi.

¹⁴Zie tak achun nitâk lam leh a chieh sek u a, a zingkal kit leh numeite umna nihna ah a pui u a, leng meite enkawltu Saasgaz etkawl na mun ah a chieh sek uh a, nungakte chunga leng chuh a lung-awih a, amin a sap ahih loh ngâl leh lengpa kawm achun a lut kit sek puou hi.

¹⁵Khutichun, a paneu Abihail chanu, Mordekai in a chanu dinga a lak Esther chuh leng kawma a chieh hun a hungtung ta a, Amah chun numeite enkawlpa, mitilgeh Hegai in kivan dinga thu a piek bangtak chun a kivan ta a. Esther chuh zie um chengte leh a mu tacheng te deihsakna a chang ta a.

¹⁶Khutichun leng Ahasuer vaihawm kum sagihna, tha sawmna, Tebeth tha chun, Esther chuh leng Ahasuer In achun a puilut tau a.

¹⁷Leng chun numei dang chengcheng sang chun a lungsiet ta a, nungak dang cheng sangin a deihsak zaw a. Tichun lallukhuk a khuksak a, Vasti thasang in lengnu’n a siem tai.

¹⁸Khutichun, Esther min in leng chun a miliente leh a mite a dingin guolvakna nasatak a siem a. A gama mite dingin suohchakna a phuon sak a, leng thil neih dân bang zelin thilpiekte a hawm a. Mordekai in Leng Hinna a Hukbitna:

¹⁹Chun, nungak te a kikhawp kit hun u chun Mordekai chuh lengpa kawtbul ah ana chu a.

²⁰Esther chuh Juda mi a hi tih hetloh in a um zinga, Mordekai in kuomah hilh lo ding in thu a pie a, zie chuh a zui a, a etkawlna nuoia a umlai a, numei naupang neucha a hihlai a, a thu a a nun bang khan, a thu nung zing hi.

²¹Mordekai chuh leng In kawtkhak a a chut lai chun, leng In pindan lutna kawtkhak vengte laka mitilgeh nih Bigthana leh Teresh chuh leng Ahasuer chung achun a lungnau a, leng Ahasuer chunga khutthak na hun lemchâng a hawl tau a.

²²Zie thil chuh Mordekai in a na he a, lengnu Esther chuh a hilh a, chun, Esther chun Mordekai min in leng a hilh a.

²³Tichun, zie thu chuh a dâwp viel u a, a thugen u chuh adik ngêi nai tih a hetdawk u chun a nih u chun a khailum gel tau a. Zie chuh leng gam vaihawmna chanchin zikna bu ah zik dingin leng in thu a pie a.