Read Gangte ESTHER 3 Bible Online

ESTHER 3 - Gangte bible

ESTHER 3

¹Zie thil haw nung chun, leng Ahasuer chun, Agag mi, Hamedatha chapa Haman chuh a kaihsan sak a, a chawisanga, a miliente chengcheng sang in a chungnun sak a.

²Chun, Leng In a na sem miliente chuh, Haman masanga khupdin a, bawkkhup a, a zahnau etsak ding in thu a pie a. A bawnchau in zie tawbang chun a hih vek u a, himahleh Mordekai chun a hih nuom puoh a.

³Leng nasepna a milien dangte chun Mordekai in leng thupiek a zawp nawp loh na ziek chuh a dawng u a,

⁴ni chengin hih dingin a nawh u a, himahlele a ngaihsak nuom diek puoh a, “Kei Juda mi ka hi a, Haman masang ah ka bawkkhup thei lo a hi” tin a gen ta a.

⁵Chun, Haman chun Mordekai chuh a masanga khupdin a bawkkhup lo ding a hi tih a het phet chun a lungna mah mah ta a,

⁶Mordekai chuh Juda mi ahi tih a het phet chun, Mordekai chauh hilo a, a tamzaw gawt ding dân a ngaihtuoh ta a, Persia leng gama Juda te chengcheng thahna ding chuh a ngaihtuoh ta a.

⁷Leng Ahasuer kum sawm leh kum nih a lal kum tha khatna, Nisan tha’n Haman chun a thiltup hihna ding chun bang tha leh ni a phapen dem tih hetna dingin phunsân dingin thu a pie a. A tha sawm leh tha nihna, Adar tha a chuh hih dingin thupukna a nei tau hi.

⁸Haman chun leng Ahasuer kawmah, “Na gambung tin ahin bang nam ahim nam dang tawh kibanglo, kichuombawl a um thang zeng zung u a; a danteu chuh nam dangte dân tawh a kibanglo mah mah a; leng dân hile a zawm puou a, Zieziekchun khutibang umsak chuh leng deihlam le ahi diek puoh ngâla;

⁹leng in pha na sak chun, suklupvek ding ahi tih zik hi henla, khutibang a chuh na hih chun leng gam vaihawmna dingin leng sum enkawltute khut ah dangka talent singkhat piek behlap sak thei ing ka ti’n ka tiem hi” a ti a.

¹⁰Ziephet chun, leng chun khuta zungbuh a bawt dawka, Juda te melma Agag suon Hamedatha chapa, Haman chuh a pie a.

¹¹Leng chun Haman kawmah, “A dangka leh zie mite chuh pha na sak dân dana hih dingin, na kawma piekthâk ahi,” a ti a.

¹²Khutichun tha khatna ni sawm leh ni thum ni chun leng lehkha zikpa chuh a sam u a, Haman thupiek bang chun siehmangte, a gambung tin ah a mau lehkha’n, namtin a mau pau chietin: leng Ahasuer min a thak ahi a, leng zungbuh a nam ahi.

¹³Tichun, Leng gambung tina Juda mi chengcheng chuh, khanglai leh teksiete, naupang neucha cha leh numei haw, chuh tha sawm leh tha nihna Adar tha, ni sawm leh ni thum ni leh ni khat thu a sukmangthai vek a, thah chimit veka, a sum hawu chuh gâllâk a lâksak dingin zie lehkha chuh kintakin a thak zak u a.

¹⁴Zie ni a dinga ana kisazo ding chun zie thupiek chuh gambung tin a pieka namtin kienga puonzak dingin zie lehkha chuh a thak tau hi.

¹⁵Chun, leng thupiek in, thupiek chuh Susan a leng In achun a phuong u a, Susan khawpi lungzîng a a um lai chun, Leng leh Haman chun zu a dâwn heuh heuh mai u a.