Read Gangte ESTHER 4 Bible Online

ESTHER 4 - Gangte bible

ESTHER 4

¹Chun, Mordekai in zie a thilhih chengcheng u chuh a het in lungkham in a puon a bawtthêk a, saidippuon silh in leivui a kibuokkhum a, khawlai dung achun a vak viel a, ngeihtak leh thasie takin a kap ta a,

²leng In mai ki-ûmna kawtkhak bul gei chun a chieh a, kuomah saidippuon silh a leng In huongsung lut phal ahi ngâl puoh a.

³Leng in thu a piek, thupiek tunna gam cheng a Juda te lak achun kahlemaunate, an ngawlhna te, tau lut lut nate a hung um ta a; mi tamtak chuh saidippuon silh in leivui lak achun a kuol u a.

⁴Chun, a suok nungakte leh a pindan vengte chun Esther chuh a va hilh u a, tichun, lengnu chuh a lungkham mah mah ta a. Mordekai chuh saidippuon chuh kawihtha a a silh dingin puon a thakdawk a; himahlele a na deih puoh a.

⁵Khutichun Esther chun leng pindan vengtu khat, amah veng ding a um Hathak chuh a sama, ziehaw chuh bangti dân ahim, bang ziek ahim tih he dingin Mordekai kawmah a sawl a.

⁶Khutichun Hathak chuh khawpi a leng inmai ki-umna kawtbul zawn a Mordekai kawm achun a va chieh; a.

⁷Mordekai chun a chunga thil hungtung chengcheng leh Juda te thah na ding a leng sum bawm a kawih ding a Haman in dangka a piek zat chuh a na hilh a.

⁸Zielo chun, Esther etsak ding leh a kawma gen ding, amah chun a chipihte dinga ngetsak dinga lengpa kawma lut dinga sawl in, amau haw sukmangthaina dinga Susan a kihawm dawk, thupiek kiziksawn le a pie a.

⁹Tichun, Hathak chuh a hunga, Mordekai thuvaithak haw chuh Esther a va hilh ta a:

¹⁰Tichun Esther chun Hathak kawmah thu a gen kita, Mordekai kawma tut kit dingin thu a pie a.

¹¹“Kuole pasal hileh, numei hileh, leng sapna mulo a, insung gil lama lut taphawt chuh thah ding ahi a. Zie thu chuh leng suokte leh a gamsung a mipite chun a he vek u a. Zie dân leh hih theihna lampi chuh khat chauh a um a; leng in a leng tieng khut chuh amah lama a tun chun zie mi hinna chuh hukbit ding ahi. Himahleh, kei chuh leng in ei sap lohna chuh ni sawmthum ahi ta a,” a ti a.

¹²Esther thuvaithak chuh Mordekai a hilh phet u chun,

¹³Mordekai chun Esther kawm achun, “Juda mi chengcheng ten a pumpelh loh ding u chuh leng In achun le pumpelh diek dingin kigingcha ki’n.

¹⁴Tuhun a hi na thip hiet hiet chun, mun dang apat Juda te ding in bitna leh suohchakna hung um mawng lele, nang leh na pa inkawte hi mangthai tho tho ding ahi; zieziekchun, leng hihna na hung chan hi hitih hun a ding hi hilo ding ahim?” ti a va gen ding in mi a sawl a.

¹⁵Khutichun, Esther chun Mordekai chuh zie dawnna hi a thak kit a;

¹⁶“Chieh inla, Judate chengcheng chuh Susan achun samkhawm in; an ngawl unla, kei a dingin paucham unla, Ni thum leh zan thum chuh an ne kiu inla, tui le dâwn diek kiu in. Kei leh ka suok nungakte hin le tawbang chun hih ung kau. Dan lo guolin leng kawmah lut ing ka ting, chun, ka thih leh ka thih himai ina,” a ti a.

¹⁷Khutichun Mordekai chuh a chieh a, Esther in thu a piek bang chun a hih ta a.