Read Gangte ESTHER 5 Bible Online

ESTHER 5 - Gangte bible

ESTHER 5

¹Chun, a anngawlhna ni thum ni chun hiti hi ahi a, Esther chuh a leng puon in a kivan a, lalchutphah pindan zawn tak a, leng In huongsung achun a va chieh a, lalchutphah ma zawn tak achun a va ding ta a. Leng chuh a leng insung achun a um a, In lutna lam nga chun lalchutphah achun a chu a.

²Lengpa chun, lengnu Esther leng In huongsung In mai a ding chuh a vak muh chun, a chungah a kipâk a; leng chun a sana lal mawlh chawih chuh Esther lam achun a vak dawm sanga. Khutichun Esther chun a vak naih a, leng mawlh mûk chuh a vak tu a.

³Leng chun a kawmah, “Lengnu Esther, bang a hi na deih? bang ahi na nget nawp? Ka gam kimkhat hilele hun pie’ng ka,” a ti a.

⁴Esther chun, “Leng in pha a sak lam ahih chun, tuni a nang a ding ankuong ka siem ne dingin Haman tawh hung leu chin ka ut hi,” a ti a.

⁵Leng chun, Esther ankuong siemna a dingin Haman chuh thu a pie a. Khutichun leng leh Haman chuh Esther ankuong siem chuh ne dingin a chieh u a.

⁶Uain a dâwn nung u chun Lengpa’n Esther kawmah, “Banga na nget ding piek in um inla,” a ti a.

⁷Esther chun, “Ka thil nget leh ka thil deih chuh,

⁸leng mittung ka hih a, ka thil nget chuh leng in piek pha a sak lam a hih chun, ka ankuong siem um ding in Haman tawh hung unla, zie tieng chuleh ka thil deih chuh gen ing ka,” a ti a, a dâwng a.

⁹Khutichun Haman chuh zie ni chun lawp tak leh kipâk takin a pawt ta a; himahlele, leng kulh kawtkhak a Mordekai chuh a masanga hung ding lo zahna etsak lo hiela um a vak muh chun, Haman chuh Mordekai chung chun a lungna mah mah ta a.

¹⁰Himahleh, Haman chuh a kisûm hâm hâm a, In a tun phet chun, A guolte leh a zi Zeresh a sama.

¹¹Tichun, a sumlepai hauh zie te, cha a hauh dân te, leng in a kaihsan sakna thu chengcheng te, leng suokte leh a mi dangte sang a a kawih chungnun nate chuh a kawm u ah a gen a.

¹²Zie chauh chuh hilo in, “Lengnu Esther chun la, a ankuong siem a chun kei ngâllo chuh kuomah leng kawmah a telsak puoh a; zing hi lele leng tawh ei chiel kit ahi.

¹³Himahlele, Juda mi Mordekai leng kawtkhak a chu ka muh sung chun ziehaw chengcheng hi kei dingin bangmah ei puoi,” a ti a.

¹⁴Khutichun, a zi Zeresh leh a guolte chengcheng chun, “Tawng sawmnga a sangin khaihlupna siem sak inla; chun, Mordekai chuh khaihlup ding in zing leh leng hilh inla; guolvakna achun leng kawm achun kipâk takin chieh mai in,” a tiu a. Zie chuh Haman chun pha a sa a, khaihlupna chuh a siem sak ta a.