Read Gangte ESTHER 6 Bible Online

ESTHER 6 - Gangte bible

ESTHER 6

¹Zie zan mah chun leng chuh a ipmu thei ta puoh a; leng gam chanchin zikna hun chawi dingin thu a pie a, tichun, a masang achun a sim u a.

²Bigthana leh Teresh, leng ina mitilgeh, kawtkhak veng te nih chun leng Ahasuer a na thah guot thuu Mordekai in a na gendawkna thu zik chuh a vak mudawk tau a.

³Leng chun, “Zie thu ziek hin Mordekai chuh bang tawbang limbawlna leh zahna a kipie?” a ti a. Leng suok, a nasem sekte chun, “Bangmah hihsak a hi puoi,” a tiu a.

⁴Leng chun, “In huongsung a um khu kuo a hi?” a ti a. Zie lai tak chun Haman in khaihlupna ding a siem a chuh Mordekai khaihlup ding thu leng kawma gen dinga a hung lai tak a hi a.

⁵Chun, leng suokte chun a kawmah, “Ngaitie, leng In huongsung a khun Haman a um hi,” a tiu a. Leng chun, “Hung lut heh,” a ti a.

⁶Khutichun Haman chuh a lut a, leng chun a kawmah, “Mi khat leng in a limbawl nawp mah mah a um a, bang hihsak a pha die leh?” a ti a. Ziephet chun, Haman chun, “Leng in kei sanga a limbawl nawp kuo mah dang umlo ding a hin, kei hi ngêi ing ka” tih a ngaihtuoh a.

⁷Tichun, Haman chun leng kawmah, “Leng in mi a limbawl nawpte chuh,

⁸leng in a silh sek leng puon leh leng chut sek na sakawl, lallukhuk leng in a khuk sek chuh hun la ding in thupiek hi hen la;

⁹leng in a limbawl nawp chuh van na dingin leng puon leh sakawl chuh leng milien pên khat khut a piek hi henla, chun, amah chuh khawpi kawtthêl fanpih henla, a masang achun, ‘Leng in a limbawl nawp leh kipahman a piek nawp chuh hiti bang ahi bawl ding ahi,’ ti’n gen zel hen la,” a ti a,

¹⁰Ziephet chun, leng chun Haman kawmah, “Na gen bangtak chun leng puon leh sakawl chuh va la vak inla, Leng in lutna kawtkhak bula chu Juda mi Mordekai chung achun khutibang tak chun va hih in; na gen sa cheng chuh hetngilh um kihen,” a ti a,

¹¹Khutichun, Haman chun leng puon leh sakawl chuh a la a, leng puon chun Mordekai chuh a van a, Mordekai chuh sakawl chung a chun a chu a, Haman chun khawpi sung achun a pui viel a, a chieh kawm u chun, “En un, leng in kipahman a piek leh a limbawl nawp chuh tawbang hin bawl ahi,” a ti a.

¹²Chun, Mordekai chuh leng kulh kawtkhak lam a chun a chieh kit a, himahleh, Haman chuh ngui takin a mai puon kikhuh in a In lam kin takin a delh tai.

¹³Tichun, Haman chun a zi Zeresh leh a guolte cheng kawm achun a chunga thil hung um dante cheng chuh a hilh ta a. Tichun a miching te leh a zi Zeresh chun a kawmah, “Na thil hihtheihna chuh Mordekai a chang pan a hi ta chuh, Juda mi a hi a, zo thei lo ding na hi. A mah chun hun zo ngêi ngêi ding a hi” a tiu a.

¹⁴Khutia a kawma a gen zing lai u chun leng indan vengte chuh a va chieh u a, Esther guonggalh guolvakna a ding chun Haman chuh kintak in a va puidawk tau a.