Read Gangte ESTHER 7 Bible Online

ESTHER 7 - Gangte bible

ESTHER 7

¹Khutichun, leng leh Haman chuh Esther ankuong siem umpih ding chun a chieh u a.

²A nihvei na a, uain a dâwn lai u chun leng chun Esther kawmah, “Lengnu Esther, banga na deih? piek in um inla. Bang ahi na nget ding? gam kimkhat tieng nasan le piek in um inla,” a ti a.

³Khutichun lengnu Esther chun, “Aw lengpa, na mit ka tun a, leng phasak lam a hih chun, ka deihpen chuh ka hinna nei hawihsak leh ka chipihte hinna hawih sak ahi.

⁴Ka mite leh kei hi thah zawh vek dinga khawtsa ka hi ta ngâl u a. Suok a zawk a um maimai hi leuhing chuh, thip hiet hiet ing ka ting, ngaihsak puo’ng ka, himahleh tuhin sukmangthai ding leh thah vek ding ka hi tau hi!” a ti a.

⁵Khutichun leng Ahasuer chun, lengnu Esther kawm achun, “Zie tawbanga a lunggil a hun hih ngam chuh kuo a hi? Khawitak a um ahim?” ahun ti a.

⁶Esther chun, “Ka melmapa leh ei sugimthei pa, zie migilo pa Haman hi ahi,” a ti a. Khutichun, Haman chuh lengnu leh lengpa masang achun kithing sie ta a.

⁷Leng chuh lungna takin pindan apat chun a kipandawk a, leng In pawlama huon achun a chieh ta a. Haman chun zie thu achun leng in gawt tei ding ahi tih a he ta a, tichun a hinna hawihsak dinga ngên in lengnu Esther masang achun a ding ta a.

⁸Khutichun, leng chuh huon apat chun uain luihna dawhkan achun a hung kita, Haman chuh Esther chutna, chutphah achun a puktha suk ta a, Zie chuh leng chun a muh phet in, “Zie mipa hin leng insung leh ka masang ngêi ahi lengnu hi a suol guot a hi maw?” tin a kiko a. Khutia leng in zie thu a hun gen phet chun mitilgehte chun Haman mai chuh a khuh tau a.

⁹Khutichun leng pindan vengte lak a khat Harbona chun, “Na hinna hukbitpa Mordekai khaihlupna dinga tawng sawmnga a sang Haman in a siem zawh sa diem a In ah a um hi,” a ti u a.

¹⁰Khutichun, Mordekai khaihlupna ding a a siem achun Haman chuh a khailum tau a. Tichun, leng lungnat chuh a hung dam tai.