Read Gangte ESTHER 8 Bible Online

ESTHER 8 - Gangte bible

ESTHER 8

¹Zie ni chun leng Ahasuer chun, Juda te melma Haman inkawte chengcheng chuh lengnu Esther chuh a pie a. Esther in Mordekai chuh a kinaihpih a hih dân chuh leng a hilh zo ta a. Zie apat chun Mordekai chuh leng kawm a chieh phal a hi ta a.

²Leng chun Haman a lâksak zungbuh chuh a ladawk a, Mordekai a pie a. Esther chun Mordekai chuh Haman insung lawiupa’n a siem ta a.

³Chun, Esther chun leng kawm achun thu a gen kit a, a keng bul ah a bawkkhup a, Agag mi Haman thil phalo hih guot leh Juda te chung a a lemguot chuh subei dingin kap kawmin a ngên ta a.

⁴Leng chun sana lal mawlh chuh Esther lam achun a vak dawmsang a, tichun Esther chuh a tho dawk a leng masang a chun a ding ta a.

⁵“Leng phasak lam a hih a, a mit tung ka hih a, leng ngaihsak lam ka hih a, a kipah lam ka hih chun, Agag mi Hamedatha chapa Haman lemguot lehkha, leng gambung cheng a Juda te sukmangthai suok kêi ding tih a zik chuh hih takloh dingin thu suoh in phuong in.

⁶Khutilochun, bangti’n ahim ka mite chung ah thil phalo hung tung chuh en zo ding ka him, ahihloh leh ka ka inkawte sietna chuh bangti a thuok thei ding ka him?” a ti a.

⁷Khutichun, leng Ahasuer chun lengnu Esther leh Juda mi Mordekai kawm achun, “En un, Juda te thah ding a ngaihtuoh ziekin Haman chuh ka khailum ta a, a neihlelam cheng chuh Esther ka pie tai.

⁸Himahlele, leng min a thu phuon kibawl leh a chunga leng tiemtehna a kinamsa chuh phel kit theih ahi ta puoi. Amahvang chuh, ka min a lehkhazik in, leng lehkha namna a chuh nam in, Juda te kawm a chun na nawp taphawt na zik thei hi” a ti a.

⁹Zie tawbang thil chuh tha thumna, Sivan tha, ni sawmnih leh ni thum ni chun a tung a, Mordekai thupiek bang chun Juda te kawmah, lawiupate kawmah, India apat a Ethiopia gam tieng in, gambung khen za leh sawmnih leh sagih a gam vaipawte leh vaihawmte kawma thak ding in lehkha a zik u a, gambung khen cheng achun amau haw lehkha chiet in, namtin a mau haw pau chiet in, Juda te kawm ale a lehkhau leh a pau un a thak u a.

¹⁰Mordekai chun leng Ahasuer min in a zik a, leng zungbuh in a nam a, lehkha chuh sakawl a puoksak u a, leng a dinga kimang sek, sakawl hat chi tak chung achun a taihpih tau a.

¹¹Zie lehkha a chun Juda khuo chenga mite chuh amah kihumbit dinga panmun a na khawh ding leh, amau haw hun do ding, gam chunga thunei chengcheng te a na that a, a zi le chateu, a neih chengcheng teu natieng a sukmangthai theihna thu a chuong hi.

¹²Chun, zie thu chuh Persia leng gam pumpi a Judate thah vekna ding a a guotniu, Adar tha, tha sawm leh tha nihna, ni sawmlethum ni a chuh mat pat ding ahi.

¹³Zie chuh dana mat ding a, gambung tin a mite kawm a chuh phuon ding ahi, khutia chuh, a ni a hungtun phat leh Judate chuh a melmateu chunga phuba la ding a a kisak lawk theihna ding un.

¹⁴Khutichun kintakin leng a dinga kimang sek sakawl hat chi chung a chuong in lehkhapuote chuh a pawt u a. Thupiek chuh leng gam khawpi Susan achun phuondawk ahi tai.

¹⁵Mordekai chuh leng puon a dum leh a vam a kithuom in, sana lallukhuk lopi tak leh patngat puonâk chuol sandup a kivan in leng in apat chuh a pawtdawk a. Tichun Susan khawpi chuh kipâk in a kiko dul dul tau a.

¹⁶Tichun, Judate ding chun lawpna leh nawpna leh kipahna guolzo tu a kingaihna chuh a um tai.

¹⁷Leng thupiek leh leng thu sukpuk tunna gambung leh khaw tin a lawpna leh kipâk taka guolvakna siem in, um nitna’n a mang tau hi. Tichun, zie gama mite laka tamtak chun Judate chuh a lauh tâk ziekun, Juda’n a kiminvawh tau hi.