Read Gangte ESTHER 9 Bible Online

ESTHER 9 - Gangte bible

ESTHER 9

¹Khutichun, tha sawm leh nihna, Adar tha, ni sawm leh ni thum ni, Juda te melmate’n a chung u a vaihawm a kinep niu, leng thupiek banga a hih ding niu chuh a hungtung ta a. Himahlele, a hilo lam taka Judate’n amau haw lawiupa te chunga vai a hawm niu a hung hi zaw ta a.

²Leng gam, gambung cheng a Judate chuh amau haw thah guote do dingin a khuo hawu achun a kikhawm tau a. Mun tin a mi chengcheng chun a kihcha tau a, kuoma’n a dal ngam ta puou hi.

³Tichun, zie gambung khena vaihawm te, lawiupa te, gam awpte, leng na semte chun Judate chuh a panpih tau a; Mordekai a lauh tâk ziek un.

⁴Mordekai chuh leng in a chun thilhih thei tak in a um tai tih leh hung hât deuh deuh ding a hi tih chuh leng gambung tin achun het ahi ta a.

⁵Judate chun a melmateu chuh a nawp nawp a lawh thei tau a. Chemzâm in a do u a a that tau a.

⁶Khutichun, leng khawpi Susan achun Judate’n mi zanga a that u a, a lak u achun Hamedatha chapa Haman chapa sawm te.

⁷Parshandatha, Dalphon, Aspatha,

⁸Poratha, Adalia, Aridatha,

⁹Parmashta, Arisai, Aridai, Vaijezatha te a that u a.

¹⁰Himahlele gâllâk thilte haw vang chuh a khawih puou hi.

¹¹Zie ni chun leng khawpi Susan khawpi a a thah zah u chuh leng kawm achun a hun hilh u a.

¹²Chun, lengpa chun, lengnu Esther kawmah, “Judate chun leng khawpi ahin mi zanga leh Haman chapa te sawm a that u a, a sumangthai tau hi, leng gambung khen dang achun bangti phet in a hi dem? bang a hi na deih beh, piek in um inla” a ti a.

¹³Chun, Esther chun, “Leng in pha a sak chun, Susan a Juda te hin tunia thupiek bangmah hin zing leh hihkit u hen la. Haman chapa sawm te luong chuh kikhaihlupna a chuh khaih hiu hen,” a ti a.

¹⁴Leng chun khutibanga hih ding chun thu a pie a; Susan a thupiek chuh a phuong u a. Haman chapa sawmte luong chuh mipi te mitmuh in a khâi kang tau hi.

¹⁵Tichun, Susan a Juda te chuh Adar tha, ni sawm leh ni li ni chun le a kikhawm u a, khawpi ah mi zathum a that kit u a. Himahlele gâllâk thil chuh a khawih puou hi.

¹⁶Judate leng gambung khen danga umte chule a kikhawm u a, kihumbitna dingin panmun a khawh chiet u a. A melmateu apat a kikawihchuom in amau haw mudah te chuh mi singsagih leh sangnga a that u a. Himahlele gâllâk sum chuh a khawih puou hi.

¹⁷Adar tha, ni sawm leh ni thum nin zie chuh a hih u a. A zing kit ni sawmleli ni chun a châwl u a, guolvak ni leh kipah ni’n a mang tau a.

¹⁸Tichun, Susan a Juda te chuh zie ni, ni sawmlethum ni leh ni sawmleli ni chun a kikhawm u a; ni sawmlenga ni chun a châwl u a, guolvak ni leh kipah na ni’n a mang u a.

¹⁹Zieziekchun, kulh neilo khawte haw a Juda te chun Adar tha ni sawmleli ni chuh kipahna leh guolvakna ni leh nek ding leh thil piek kithak tuohna ni’n a mang tau hi.

²⁰Mordekai chun zie thu haw chuh a zik a, Persia leng gam gambung khen haw sunga Juda te chengcheng, a nai leh a gamla a mite chuh lehkha a thâk a.

²¹Adar tha, ni sawmleli ni leh ni sawmlenga ni chuh kum chenga nit dingin thu a pie tai.

²²Zie ni chun Juda te chuh a melmateu apat a gâlmuong a a um tâk ziekun leh, zie tha a lungkhamna chuh a mau dinga kipahna a suok tâk ziekin leh, kahna ni chuh kipâk um taka a hung chan tâk ziekin. Guolvakna ni leh kipahna ni leh nek ding kithak tuohna ni leh gimtheite thilpiekna ni dinga siem dingin le thu a pie a.

²³Tichun Juda te chun Mordekai in a kawm u a a thak bang chun a hih u a, kum chengin zie lawp na chuh dân in a nei tau hi.

²⁴Agag suon Hamedatha chapa Haman, Juda te melmapa chun sukmangthaina ding ni hetna chun phun a san ta ngâl a (zie chuh amau haw tih dân in Purim ahi.)

²⁵Himahlele, Esther in leng kawmah zie thu chuh a tun a, Juda te a phielgukna chuh amah lu chung ah chu’n tin a mah leh a chapa te chuh khaihlupna a khaihlup ding ahi tih lehkha’n thu a phuong ta a.

²⁶Zie phunsanna ziek chun zie ni haw chuh Pur min apat in Purim a tiu hi. Khutichun zie Mordekai lehkha thu leh zie thil hungtung haw chengcheng ziek chun,

²⁷Tichun, Juda te chun amau haw chung leh a suonteu leh amau haw hun bel ta phawtte chung a ding chun zie nihaw Mordekai lehkhathâk a kizik bang leh a hun guot bang taka kum chenga umnit ni a mang dingin dân in a siem tau hi.

²⁸Juda inkuon tin in khangthak hung um zel ding ale, gambung tin ah khawpi tin chengte chuh a hetzing u a, hun hungtung zel ale zie Purim ni hi a nit zel dinguh ahi ti’n a sudet tau hi.

²⁹Khutichun, Abihail chanu, lengnu Esther leh Juda mi Mordekai thuneihna cheng tawh Purim chungchanga lehkhathâk nihna chuh sukdetna ding a zik u a.

³⁰Lehkha chuh Juda te chengcheng ding a zik ahi a, a kiziksawnte chuh Persia gam, gambung za leh sawmnih leh sagih achun a thak u a. Zie lehkha a chun Juda te dinga muonna leh bitna deihsak na thu leh,

³¹Juda mi Mordekai leh lengnu Esther in a zuih ding u a a thupiek bangin amau leh a suonteu a dinga ngawlhna leh lusûn huna mat ding dân a neih dungzui u a, ahun bang zel a zie Purim ni hi hun mang zel dinga hilhna thu a kizik hi.

³²Chun, Purim mat dân thu chuh Esther thupiek in sukdet ahi a, zie chuh lehkhabu a zik ahi.