Read Gangte PAWTDAWKNA 1 Bible Online

PAWTDAWKNA 1 - Gangte bible

PAWTDAWKNA 1

¹Chun, ziehaw hi Israel chate Aigupta gama lutte min chuh ahi, mitin amau inkuon dungzui zelin Jakob kawm achun a chieh u a:

²Reuben te, Simeon te, Levi te, Juda te,

³Issakar te, Zebulun te leh Benjamin te;

⁴Dan leh Naphtali te, Gad leh Aser te ahiu hi.

⁵Jakob khalbe a pawt chengcheng chuh mi sawmsagih ahiu hi. Joseph vang chuh Aigupta gama a na umsa him ahi.

⁶Chun, Joseph chuh a thi a, a suohpihte chengcheng leh amau khang chengcheng chuh a thi zo vek tau a.

⁷Himahleh, Israel suonte chun chi tamtak a sep u a, nasa taka hung pung in, a hung tam mah mah mai tau a, a hung hât deuh deuh tau a; Aigupta gam chuh a hun luoh dim tau hi.

⁸Chun, Aigupta gam achun Joseph helo leng thak a hung um ta a.

⁹Tichun, a mite kawmah, “Ngaitiem u, Israel suonte hi eihaw sangin a tamzawu in, a hatzaw tau a, eihaw dingin lauh-um tak ahi tau hi!

¹⁰Hung tiem u, a pun beh tâk lohna dingun chingthei takin hih hitiu; khutilochun hung pung zel un tin, dân leh kidona hung um kha leh I gâlteu lam ah pang untin, ei do un tin, zie gam apat hin ei taihdawk san kha’n au” a tiu a.

¹¹Khutichun, Aigupta mite chun na haksa taktak sep sak in, amau haw sugimthei dingin a chung u ah lawiupa a guot sak tau a, Israel chate chun lengpa dinga nek ding kawihkhawmna mun dingin Pithom khawpi leh Ramases khawpi achun In a sa tau a.

¹²Himahlele, amau haw chuh a hah sukgimtheih phawt u leh a hah pun zaw deuh u a, gamsung pumpi ah a kithehzâk tau a, tichun, Israel ziek chun Aigupta mite chuh a lunggim mah mah tau a.

¹³Khutichun, Aigupta mite chun Israel suonte chuh gimthei takin na a sep sak tau a.

¹⁴Nasep haksa tak tak, suonghalna leh cheklei siem sak in, a lo hawu ale nasem in a mang u a, a sugimthei tau hi.

¹⁵Tichun, Aigupta lengpa chun, Hebrai naudawmte chuh a hopih a; khat zaw min chuh Siphrah ahi a, chun, khat min chuh Puah ahi.

¹⁶Tichun, a kawm u ah, “Hebrai numeite nau na dawp tieng u leh, nau neihna dawhkan a chun en unla, pasal a hih leh that zel unla; numei a hih le chuh na hinghawih dinguh ahi,” a ti a.

¹⁷Himahlele, naudawmte chun Pathien a kihchau a, tichun lengpa thupiek bang chun a hih nuom puou a, nausen pasal haw chuh a hinghawih u a, a hukbit zel sek u a.

¹⁸Chun, Aigupta lengpa chun naudawmte chuh a sama, a kawm u ah, “Bangati a hitibang ahi thilhih a, nausen pasal haw chuh na hinghawih zel uh ahim?” a ti a.

¹⁹Chun, naudawmte chun Pharaoh kawmah, “Hebrai numeite hih Aigupta numeite tawh a kibang puou a; amau haw hi a hât u a, tichun, naudawmte tun ma leh nau a na nei sek uh a ahi,” a tiu a.

²⁰Zieziekchun, Pathien in naudawmte chuh phatak in a bawl a, tichun, mi a hung tam mah mah tau a, a hung hât deuh deuh tau hi.

²¹Chun, ti hi ahung hi a, naudawmte chun Pathien a lauh ziekun, inkuo nei in a siem ta a.

²²Ziephet chun Pharao’n, “Pasal naupang hung pieng taphawt chuh Nile luipi ah paih un la, numei taphawt chuh na hinghawih dinguh ahi,” ti’n a mite chengcheng chuh thu a pie ta a.