Read Gangte PAWTDAWKNA 11 Bible Online

PAWTDAWKNA 11 - Gangte bible

PAWTDAWKNA 11

¹Chun, LALPA’n Mosi kawm achun, “Pharaoh chung leh Aigupta chung ahin khatvei chuh hi vak lênsak kit ing ka; zie nung chuleh vang hun pawtdawk sak in au; a hun pawtdawk sak phat chuleh, zie apat hin na bawn un hun nawhdawk thawh hiel ina.

²Khutichun, Israel mipi haw kawma hin thu va gen in, pasal leh numei chengin a invengteu kawmah, dangka guo kicheina leh sana kicheina kinget chiet u hen,” a ti a.

³Chun, LALPA’n mite chuh Aigupta mite lungsietna a dawnsak a. Zie mai chuh ahi puoh a, Mosi chuh Aigupta gam achun Pharaoh miliente leh mipite ngaih chun mi lopi tak ahi a.

⁴Mosi chun, LALPA’n hiti hin a tii, “Zan khangkim leh, Aigupta gamsung hi hun hawhpai ding ka hi:

⁵Tichun, Aigupta gama cha lutîl chengcheng, lalchutphah a chu Pharaoh cha upapen apat in, buh gawigawp a pang, suoknu chapa upapen tiengin, gancha no suok masapen chan in thi’n au.

⁶Tichun, Aigupta gamsung cheng achun kahna nasatak um intin, khutibanga nasa himhim chuh ana um kha puoh a, khutibang himhim chuh um le um kit ta puo’n a.

⁷Himahlele Israel chate chuh mihing leh a ganchateu himhim chu uicha’n hap puo’n au: LALPA chun Aigupta mite leh Israel mite hi a khenchuom ngêi hi tih het theihna dingin,” ti’n.

⁸Chun, Mosi chun, “Na miliente cheng chuh ka kawmah hung untin, ka masangah bawkkhup in, ‘Ei taihsan un, nang leh mipi a hun zuite hi tawh,’ ti’n ei ngên un au. Zie tieng chuleh chieh ing kau,” a ti a. Zie zawh chun Mosi chun Pharaoh chuh lungna takin a nusieh ta a.

⁹Chun, LALPA’n Mosi kawm achun, “Pharao’n na thuu zawp puo’n a: ka thilmak haw Aigupta gam ahin hihpuna a um theihna dingin,” a ti a.

¹⁰Chun, Mosi leh Aron chun Pharaoh masang achun zie thilmak chengcheng chuh a hih u a: chun, LALPA’n Pharaoh lunggil chuh a sukkhauh sak a, tichun Israel chate chuh a gam apat chun a pawtdawk sak nuom puoh a.