Read Gangte PAWTDAWKNA 13 Bible Online

PAWTDAWKNA 13 - Gangte bible

PAWTDAWKNA 13

¹Chun, LALPA’n Mosi a hopih a,

²“Israel chate laka cha lutîl cheng, sûl hawng masa taphawt, mihing leh gancha le kei dinga na kawih thiengtho ding uh ahi, kei a ahiu hi,” ti’n a gen a.

³Chun, Mosi’n mipite kawm achun, “Aigupta te suok apat a na pawt niu tuni hi hezing un; zie ni hin LALPA’n a thilhih theihna’n nang uh a hun puidawk a: chângthâk chawl kisawh himhim chuh na nek loh dinguh ahi.

⁴Abib tha, a tha khatna, tuni hin Aigupta gam apat na hung pawt u a.

⁵LALPA’n Kanaan te, Hit te, Amor te, Hiv te, Jebus te gam, khuoizu leh bâwngnawi a luonna gam, nang uh hun suonte kipautiema piek a tiemna gam achun a hun puihtung tieng leh, kum chengin zie tha hih na nit zel ding uh ahi.

⁶Ni sagih sung chuh chângthâk chawl sawhloh na nek ding uh ahi a, a ni sagih ni chuh LALPA dinga Kut ni hi’n a.

⁷Ni sagih sung chun chângthâk chawl sawhloh neu in na tin; na lak u ah chângthâk chawl sawh mawngmawng chuh a umloh ding ahi.

⁸Zie ni chuleh na chateu kawmah, ‘Aigupta gam apat a ka hung pawt lai u khan LALPA’n thil ei na hihsak zieka kihih ahi,’ ti a na hilh dinguh ahi.

⁹LALPA Dan chuh na kam u a a um zing theihna ding in, na khut u a melchikna leh, na mit u kikala hetzingna guola na neih ding uh ahi, khut hattak a LALPA’n Aigupta gama pata a thilhih theihna a a hun puihdawk na hiu hi.

¹⁰Khutichun zie kut hi kum chengin a hun taka chuh na hun mat zing ding uh ahi.

¹¹“LALPA’n na kawm u leh nang uh hun suonte kawma kipautiema piek a tiemsa bang khan, Kanaan te gam a hun puihtung a, a hun piek tieng chuleh,

¹²cha sûlhawng masapen leh na ganchau suok masapen chuh LALPA dinga na kawihchuom zel ding uh ahi; a chal haw chuh LALPA a ding hi’n au.

¹³Sabiltung no suok masapen taphawt chuh belamno a na tat ding uh ahi. Na tat nawp loh u le chuh a ngâwng na sukbawt ding uh ahi. Na chateu laka pasal pieng masapen taphawt chuh na tat ding uh ahi.

¹⁴Chun, hiti hi hung hi’n tin hun hungtung dinga na chapateu in, ‘Ziehi bangti dân ahi?’ ti a a hun dawt tak u leh, nang un a kawm u ah, ‘Khut hattak in LALPA’n Aigupta gama suok a ka um u khah ei puihdawk ahi:

¹⁵chun, hiti hi ahi a, Aigupta leng Pharaoh khah a lung khauh bêk ziekin, LALPA’n Aigupta gama cha lutîl chengcheng, mihing cha upapen taphawt leh gancha suok masapen taphawt chun LALPA kawmah ka kithawi u a; himahleh ka chapateu lak a cha lutîl chengcheng chuh ka tat uh ahi,’ tiu in.

¹⁶Chun, zie hi na khut u a nang uh dingin melchikna leh na mit uh kikala chal kânna hi’n tin; khut hattak in LALPA’n Aigupta gam apat in ei puidawk ta ngâl a,” a ti a.

¹⁷Chun, Pharao’n mipi haw chuh a pawtdawk sak phet chun, Pathien in Philistia te gama a naih zawk na ah a pui puoh a. Pathien in, “Kidonahaw mu leu kisik untin, Aigupta gam ah vaikit kha’n au,” a ti ngâl a.

¹⁸Zieziekchun Pathien in mipi haw chuh Tuipi San lam zuonin, gamgaw lam ah a pui kawi zaw ta a.

¹⁹Chun, Mosi’n Joseph guhhaw chuh a sawm a: Israel chate kha, “Pathien in hung tawhtha ngêi ngêi intin, zie tieng chuleh, ka guhhaw hi zie apat a hi na zawn toh ding uh ahi,” ti’n a kihâksiel sak ta ngâl a.

²⁰Chun, Sukkoth apat chun a pawt u a, gamgaw chin tak Etham mun ah a giek u a;

²¹Chun, LALPA’n sun leh meipi’n a mau a pui a; chun, zan leh a mau haw salhvak dingin meikuong in a pui a; sun leh zan a a chieh zel theihna ding un.

²²Tichun, suna meipi leh zan a meikuong chun mipite chuh a nusieh ngei puoi.