Read Gangte PAWTDAWKNA 14 Bible Online

PAWTDAWKNA 14 - Gangte bible

PAWTDAWKNA 14

¹Chun, LALPA’n Mosi a hopih a,

²“Israel chate kawm ahin thu gen in, vaikit u henla, Migdol leh tuipi kikal Pi-hahiroth Baal Zephon kieng achun giek u hen.

³Tichun Pharaoh chun Israel chate chuh, ‘Gamtalai lak ah a vakchavai uh a: gamgaw mun ah a tâng tau hi,’ ti’n a.

⁴Chun, Pharaoh lunggil chuh sukkhauh sak ing ka ting, tichun hun delh intin; chun, ken Pharaoh leh a sepaih haw chengcheng akipat chuh limbawlna lawh ing ka; tichun Aigupta mite’n kei hi LALPA chuh ka hi tih he’n au,” ti’n. Tichun, zie tawbang chun ahih ta a.

⁵Mipite chuh a taimang zo tau hi tih Aigupta lengpa chuh a hilh u a; a lunggil leh a miliente lunggil chuh a kitheng kit ta a, tichun, “Israel mite, I nasem lai uh I pawtdawk sak mai u hih bangti dana zie tawbang hi hih I hi tau em,” a tiu a.

⁶Chun, a kangtalai a guonggalh a, chun, a mite chuh a kawmah a pui a:

⁷kangtalai zagup teldawk chuom leh Aigupta gama kangtalai chengcheng, a bawna chunga lawiupa haw tawh a pui ta a.

⁸Chun, LALPA’n Aigupta lengpa Pharaoh lunggil chuh a sukkhauh sak a, Israel chate chuh a delh ta a: Israel chate chula guolzawhna lopitak tawh pawt ahiu a.

⁹Chun, Aigupta mihaw chun sakawl chengcheng leh lengpa kangtalai leh a sakawl chung chuong mihaw leh a sepaihte chu tawh a delh u a. Pi-hahiroth naih Baal Zephon mun a Tuipi San panga a gieknau achun a va delhpha tau a.

¹⁰Chun, Pharao’n a va naih phet chun, Israel chate chuh a vak dâk dawk u a, chun, ngaitie, Aigupta mite chun amau lam chuh ahun zuon phei tau a; tichun ana lau mah mah zieng tau a, chun, Israel chate chun LALPA chuh a sam tau a.

¹¹Mosi kawmah, “Aigupta gam akhan thân a umloh ziek ahim gamthip ahi thi dinga keihaw nei puihdawk? Bang zieka hitibang ahi bawl dinga Aigupta gam apat a nei puihdawk ahi?

¹²Aigupta gam akhan, ‘Aigupta mite nasem in um zaw mai ing kau,’ ti’n na kawmah ka gen him uh hilo ahim? Gamthip a mawk thih mai sang chun Aigupta mite na kha kisem mai leh phazaw ta ding,” a tiu a.

¹³Ziephet chun Mosi’n mipite kawm achun, “Lau kiu in, um hiet hiet mai un, LALPA hukdamna tuni a a hun hih sak ding hih en mai un, tuni a Aigupta mi na muh teu hih kumkhuo’n mu kit ta puo’n lau.

¹⁴LALPA’n hun do sak intin, nang uh vang na um hiet hiet mai dinguh ahi,” a ti a.

¹⁵Chun, LALPA’n Mosi kawm achun, “Bang zieka nei sap a? Israel chate hi malam zuon zel dingin hilh in.

¹⁶Himahleh, nangin na tiengkhut kha hun chawi inla, chun, tuipi chungah na tiengkhut dawm inla, tui chuh hung kikhen u hen; tichun, Israel suonte chuh tuipi sunga lei hul ah chieh in au.

¹⁷Chun, ngaitie, ken Aigupta mite lunggil chuh sukkhauh sak ing ka ting, tichun hun delhzui un au; chun, lengpa leh a sepaihte leh, a kangtalaite leh a sakawl chung chuong mite apat chun lopina chang ing ka.

¹⁸Tichun, lengpa leh a kangtalaite leh a sakawl chung chuong mite apat limbawlna ka lawh tieng chuleh Aigupta mite’n kei hi LALPA chuh ka hi tih he’n au,” a ti a.

¹⁹Khutichun, Pathien vânsâwlchâk, Israel mipite pui sek kha a nung lam u ah a kichawn ta a; meikuong kha a masang lam u apat a kichawn ta a, a nung lam u ah a ding ta a.

²⁰Tichun, Aigupta mite leh Israel mite kikal achun a hung um ta a, tichun, meipi chuh a hung um a, a hung thim a, himahleh Israel chate umna chuh a salhvak a; tichun, zankhuo’n kuomah zawk chuh a kizuon tuoh thei puou hi.

²¹Chun, Mosi’n tuipi chungah a khut a vak zak a; chun, LALPA’n suohlam huih hattak zânkhuo’n a nun sak a; chun, tuipi chuh lei hul a suok sak a, chun, tui haw chuh a hung kikhen tau hi.

²²Chun, Israel chate chuh tuipi sung lei hul achun a chieh tau a; tui haw chuh a changlam pang u leh a veilam pang u achun a mau dingin bâng ahi ta mai a.

²³Chun, Aigupta mite chun a delh u a, Pharaoh sakawl chengcheng te leh, a kangtalaite leh, a sakawl chung chuong mite chun tuipi sung achun a delh lut tau a.

²⁴Khuo a hung vak ding kuon chun, LALPA’n Aigupta mite chuh meikuong ding leh mei ding achun a vak en a, tichun, Aigupta mite chuh a sulungzing ta a.

²⁵A kangtalai kengteu chuh a sutawng a, a tawl hât thei ta puou a; khutichun, Aigupta mite chun, “Israel mite hi taihsan hitiu; amau lam ah LALPA a panga zie mite hi Aigupta mite a dopih ahi hi,” a tiu a.

²⁶LALPA’n Mosi kawmah, “Aigupta mite, a kangtalai teu, a sakawl chung chuong miteu chuh tui in a hun chup kit theihna dingin tuipi chungah na khut kha vak zak in,” a ti a.

²⁷Tichun Mosi’n tuipi chung achun a khut a vak zak a, chun, khuo a vak phetin, tuipi chuh a luon ngei bang in a luong kit ta a; chun Aigupta mite chuh vaihkit a guou a, LALPA’n Aigupta mite chuh tuipi sung achun a paih tha ta a.

²⁸Tui haw chuh a luong kit ta a, tichun kangtalaite leh sakawl chung chuong mite, tuipi a delhlutte, Pharaoh sepaihte chengcheng pum in tui chun achup vek ta a; khatchale a suokcha puou hi.

²⁹Israel chate vang chuh tuipi sung lei hul achun a chieh vek tau a; chun, tui haw chuh a changlam pang u leh, a veilam pang u a chun amau dingin bâng ahi ta a.

³⁰Khutibang chun LALPA’n Israel chate chuh zie ni chun Aigupta mite khut apat chun a hukdawk hi; chun, Israel te chun Aigupta mithi haw chuh tuipi pang achun a muu a.

³¹Tichun Israel chate chun LALPA’n Aigupta mite chunga thil nasatak a hih chuh a muu a, mipite chun LALPA chuh a lau tau a; tichun LALPA leh a suok Mosi chuh a gingcha tau hi.