Read Gangte PAWTDAWKNA 16 Bible Online

PAWTDAWKNA 16 - Gangte bible

PAWTDAWKNA 16

¹Chun, Elim mun apat chun a pawtdawk u a, chun, Israel chate chengcheng Aigupta gam apat a pawt uh apat tha nihna, ni sawmlenga ni’n Elim leh Sinai tâng kikala Sin thalek a va tung u a.

²Thalek achun Israel chate chengcheng chuh Mosi leh Aron chung achun a phunchiek tau a.

³Chun, Israel suonte chun a kawm u ah, “Aigupta gama sa bel bula ka chut lai hawu leh, chângthâk vah taka ka nêk lai u khan LALPA khut ah a na thi hizaw mai leu ing aw! mi kikhawm khawm chengcheng hi thaleka gilkiel a suklup ding a nei puihdawk ahi hi la,” a tiu a.

⁴Khutichun LALPA’n Mosi kawmah, “Ngaitie, nang u dingin van apat in chângthâk hun kiek sak ing ka, tichun mipite’n ni chengin ni khat a ding a a chanvo ding mai u chuh luok zel u hen, ka dân a zawp u leh zawp loh uh ka patep theihna dingin.

⁵A ni gup ni chun a va luok u chuh kawihtup untin; chun, ni chenga a luok zahnih uh hi ding ahi,” a ti a.

⁶Chun, Mosi leh Aron in Israel chate chengcheng kawm achun, “Nitâk lam leh LALPA chuh Aigupta gam apat a hun puidawkpa ngêi chuh ahi tih hun he’n lau;

⁷Tichun, zing leh LALPA lopina chuh mu’n lau; a chunga na phunchieknau kha a na za tai; kei u hi bang ka hiu a ka chung u a phunchiek na hiu hi?” a tiu a.

⁸Chun, Mosi’n “Nitâk lam a na nek ding un LALPA’n sa hun pie’n tin, zingkal leh chângthâk vah seta nek ding hun pie kit in a, a chunga na phunchieknau kha a za ngâl a; kei u chuh bang ka hiu a ahi? Kei uh chunga phunchiek na hi puou a, LALPA chunga phunchiek na hi zawu hi,” a ti a.

⁹Chun, Mosi’n Aron kawmah, “Israel chate kikhawm khawm chengcheng kawm ahin, ‘LALPA masang hun naih uh, na phunchieknau khah a na za tai,’ hun tih,” a ti a.

¹⁰Israel chate kikhawm khawm chengcheng kawma Aron in thu a gen lai tak chun, thalek lam chuh a vak en a; chun, ngaitie, LALPA lopina chuh meipi ah a hung kilang ta a.

¹¹Chun, LALPA’n Mosi a hopih a,

¹²“Israel chate phunchiekna haw kha ka na za a; a kawm u ah, ‘Nitâk lam leh sa ne’n na tin uh, chun, zingkal lam leh chângthâk vah set in ne ta’n lau,’ a tii hun tih,” a ti a.

¹³Nitâk lam chun vamim a hung lengto u a, a giehmun u chuh a hun dâp suok hiel ta a, chun, a zing chun a giehmun vel hawu achun dai ahung kie a.

¹⁴Chun, dai kie chuh a hung hul phetin, gamgaw lei chung achun thil pêk dik dek, vukkhal tieh cha cha hi ahung um pheupho ta a.

¹⁵Zie chuh Israel chate’n a vak muh u chun, “Bang ahi die aw?” a kitiu a; bang ahih a he puoh ngâl u a. Chun, Mosi’n a kawm u ah, “LALPA’n chângthâk na nek ding u a a hun piek ahi hi.

¹⁶Ziehi ahi LALPA’n ‘Mitin in amau nek khawp ding luok u hen la; mi khat dingin Omer khat zel, na inkuon uh mihing um zah bang zelin na luok ding uh ahi,’ ti a thu a hun piek khah,” a ti a.

¹⁷Chun, Israel chate chun khutibang chun a hih u a, a khenkhat in a luok tam u a, a khenkhat in a luok tawm u a.

¹⁸Chun, Omer in a teh u a, a luok tam chun a val in a nei puoh a, a luok tawm chule a tasam diek puoi; mitin in amau nêkkhawp ding chuh a kiluok chiet u a.

¹⁹Tichun, Mosi’n a kawm u ah, “Kuoma’n a zinglam a ding in sît kiu in,” a ti a.

²⁰Himahlele Mosi thu chuh a zawp nuom puou a; a khenkhat in zinglam a dingin a sît u a, tichun a lungvei a, a hung namsie a; zieziekchun Mosi chuh a chung u ah a lungna ta a.

²¹Khutichun zing chengin mitin in amau nêkkhawp ding mai a luok zel u a: ni a hung san deuh tieng leh a tuimang zo sek a.

²²A ni gup ni chun chângthâk chuh a zahnih, mi khat a ding Omer nih zel a luok u a; chun, zie kikhawm khawm vaihawmte chengcheng chun Mosi a va hilh u a.

²³Mosi chun a kawm u ah, “Zie chuh a puo, LALPA’n, ‘Zing hi umnit ni, LALPA a dinga chawlhni thiengtho ahi,’ a tih chuh: zieziekchun na haih thawh nawp u leh hai unla, na huon thawh nawp u leh huon unla, a val cheng chuh zinglam a dinga na kawih ding uh ahi,” a ti a.

²⁴Chun, Mosi’n a hilh bang chun a zinglam a dingin a kawihchuom tau a: zie chuh a namsie puoh a, athan le a um puoi.

²⁵Tichun, Mosi’n “Tuni’n ziehi neu in; tuni hi LALPA dinga chawlhni ahi hi; tuni’n vang lei a kie mu puo’n lau.

²⁶Ni gup sung chun va luok sek un na tin; a ni sagih ni chuh chawlhni ahi a, luok ding himhim um puo’n a,” a ti a.

²⁷A ni sagih ni chun mi khenkhat chuh luok dingin a va pawt u a, luok ding himhim a mu zo ta puou hi.

²⁸Tichun LALPA’n Mosi kawmah, “Ka thupiekte leh ka dante hi bang chan ahim na pawm loh guot uh?

²⁹LALPA’n chawlhni a hun piek hi he tau inla, zieziekchun ni gup ni chun ni nih set theih ding chângthâk a hun piek na hiu hi; mitin amau mun chiet ah um hiet hiet mai un, ni sagih ni chun kuomah a umna mun apat in pawt hiel kihen,” a ti a.

³⁰Khutichun mite chuh ni sagih ni chun a châwl tau hi.

³¹Chun, Israel inkuonte chun zie min ding chun Manna a sau a: koriander thei mu tawbang a vam silsel ahi a; I vak nek leh chângpêl khuoizu tawh kihel tawbang ahi.

³²Chun, Mosi’n “Ziehi ahi LALPA’n, ‘Ziehi na suonteu chanin Omer khat vawpphau in; Aigupta gam apat a ka hun puihdawk lai a, gamthip a ka hun vak sek na chângthâk chuh a hun muh theihna ding un,’ ti a thu a piek chuh,” a ti a.

³³Khutichun, Mosi’n Aron kawmah, “Bel hun la’n la, Manna hi Omer khat khum in, na suon teu chana vawp zing dingin LALPA masangah kawih in,” a ti a.

³⁴LALPA’n Mosi thu a piek bang chun, Aron chun vawp zing dingin Thuthun Bawm achun a kawih ta a.

³⁵Tichun, Israel chate chun mihing chênna gam a tun macheng u chun kum sawmli sung chuh Manna a neu a; Kanaan gamgi ava tun macheng u chun Manna chuh a ne zing ui.

³⁶Chun, Omer khat hi ephah mun sawm a khen, mun khat tawh kigûn ahi.