Read Gangte PAWTDAWKNA 19 Bible Online

PAWTDAWKNA 19 - Gangte bible

PAWTDAWKNA 19

¹Chun, Israel chate Aigupta gam apat a pawt u apat a tha thumna, zie ni mah chun Sinai thalek a tung u a.

²Rephidim mun apat a pawt u a, Sinai thalek a va tung u a, thalek achun a giek u a; zie tak achun Israel te chuh tâng bul achun a giek u a.

³Chun, Mosi chuh tâng achun Pathien hopih dingin a va chieh to a, tichun LALPA chun tâng apat chun a na hopih a, a kawmah, “Israel chate, Jakob suonte kawm achun thu gen in la, Israel suonte chuh hilh in.

⁴Aigupta te chunga ka thilhih danhaw leh, mupi’n a note a tha chunga a puok banga ka hun puok a, ka kawma ka hun puihtung dân hi na muu a.

⁵Zieziekchun, ka thu na ngaihthak takzet u a, ka thugawlh hi na pawm u chun, khawvel a nam chengcheng lak ahin keia dingin go têlchuom hi’n na tin un, keimah mite ngêi hi’n lau. Leisiet pumpi hi keia ahi ngâla.

⁶Tichun, keia dingin thiempu chi, nam thiengtho hi’n lau, ti’n hilh in. Zie thu hi Israel te kawma na gen ding chuh ahi,” a ti a.

⁷Khutichun Mosi chuh a chieh suk a, mipi laka upahaw chuh a hun samkhawm a, LALPA thupiek chengcheng chuh a hilh vek a.

⁸Chun, mipi chengcheng chun, “LALPA gen chengcheng chuh hih zel ing kau,” ti’n kiguol takin a dâwng u a. Tichun Mosi’n mipite thugen chuh LALPA a hilh sawn a.

⁹Chun, LALPA’n Mosi kawmah, “Ngaitie, ka hun hopih lai tak mipite’n le a hettheih u a, kumkhuo a na thu a ginchak theihna dingun meipi sah tak lak ah na kawmah hung ing ka,” a ti a.

¹⁰Chun, LALPA’n Mosi kawmah, “Mipite kawmah va chieh inla, amau haw chuh tuni tawh zing leh mipite chuh kisuthieng u henla, a puonhawu sawp ngim u hen,

¹¹A ni thum ni a dingin kisazo u hen: ni thum ni chun mipite chengcheng mitmuh in Sinai tâng achun LALPA hungsuk ding ahi.

¹²A kawm u ah, ‘Chingthei unla, tâng akhun kal hiel kiu in; kuole tângbul sukha taphawt chuh thah ngêi ngêi ding ahi.

¹³Kuoma’n khut ale a sukkhak loh ding ahi, kuo hileh a sukha ta chuh suong a sehlup ngêi ngêi ding ahi; sa hi’n mihiem hitaleh hing puo’n a; pengkun chuh sawtpi a git chuoi chuoi tieng chuleh tâng a chuh a kal toh ding uh ahi, a tii,’ ti’n mipite dingin gi zam sak in,” a ti a.

¹⁴Khutichun tâng apat chun Mosi chuh mipite kawm achun a hung suk a, mipite chuh a suthiengtho a; a puonhawu a sawpngim u a.

¹⁵Chun, Mosi’n mipite kawm achun, “A ni thum ni a ding chun kisazo un; na ziteu le na naih loh dinguh ahi,” a ti a.

¹⁶Chun, a ni thum ni zingkal chun hiti hi a hung hi a, van ahung gi a, kâwl ahung phe a, tâng chung achun meipi a hung zing mepmup a, pengkun ngeih tak in a hung gi a; tichun, mipi giehmun a um chengcheng chuh lau in kilîng tau hi.

¹⁷Tichun, Mosi’n mipi haw chuh Pathien tuok dingin giehmun apat chun a puidawk a; tângbul achun a ding u a.

¹⁸Chun, Sinai tânga chuh LALPA chuh mei a a hungsuk ziekin; zie meikhu chuh hâltuina meikhu bang mai in a khu to nguoh nguoh a, tichun tâng pumpi chuh a lîng dup dup a.

¹⁹Tichun pengkun gi chuh a ngeih deuh deuh a, Mosi chun thu a vak gen a, Pathien chun van gi’n a hun dâwng ta a.

²⁰Tichun LALPA chuh Sinai tâng, tângsip achun a hungsuk a; chun, LALPA chun Mosi chuh tângsip achun a sam to a; tichun Mosi chuh a va chieh to a.

²¹LALPA chun Mosi kawmah, “Chieh suk inla, mipi haw khu thu va pieh, khutilochun LALPA mel muh guo’n hung lut pai khapalh untin, mi tamtak beihmang lawh kha’n au.

²²Chun, thiempute LALPA kawm va naih ding haw chule kisuthieng u hen, khutilochun, a chung u ah LALPA gawtna tung kha’n a,” a ti a.

²³Chun, Mosi’n LALPA kawmah, “Mipite hi Sinai tâng ahin a hung to thei puou hi; nangin, ‘Tang ahin gamgi zam kimvel sak inla, suthiengtho un,’ ti’n nangmah ngêi in thu nei tiem a puo,” a ti a.

²⁴Chun, LALPA’n a kawmah, “Chieh inla, va kum suk inla; chun, Aron tawh hung to kit un; himahleh thiempu haw leh mipi haw chuh LALPA kawma hung guo’n hung tailut mai kiu hen, khutilochun, a chung u ah LALPA gawtna tung kha’n a,” a ti a.

²⁵Khutichun, Mosi chuh mipite kawm achun a va chieh suk a, LALPA gen haw chuh a va hilh ta a.