Read Gangte PAWTDAWKNA 21 Bible Online

PAWTDAWKNA 21 - Gangte bible

PAWTDAWKNA 21

¹“Ziehaw hi ahi a kawm u a vaihawm dân ding na hetsak ding haw chuh:

²Hebrai mi suok khat na châwk chun, kum gup na na sem ina. A kum sagihna achun bangmah piek ngailo a a pawt ding ahi.

³Na suok a a hunglut lai chun zi neilo ahih leh, amah mai in pawt intin, zi nei ahih chun a zite tawh a pawt dinguh ahi.

⁴A pu’n zi a na neihsak a, chapa ahim, chanu ahim ana hinsak chun a zi leh a chate chuh a pu chang intin, amah vang chuh amah maia a pawt ding ahi.

⁵Ahihziekin suok chun, ka pute, ka zite, ka chate hi ka hehpih bêkin, ka pawt nuom puoi, a tih chak kêi chun,

⁶a pu chun, vaihawmte kawmah pui intin, kawtkhak bul ahim, kawtbieng khuom bul ahim achun a pu’n a bil chuh thil zum in vit intin; tichun a damsung in suok in um in a.

⁷“Mi’n a chanu chuh suok numei dinga a zawk chun, suok pasal te chunga hih banga a pawtsak ding ahi puoi.

⁸Midang khatin zi a neih guo’n a kawma zawk hi henla, deihlo kit ta leh, a pa kawma zawk kit ding ahi a, a pa chun gamdang mi kawma a zawk loh ding ahi, a ziek chuh thanghuoi taka bawla a um tâk ziekin.

⁹Mi’n a chapa zi dinga a huol sak nuom chun, chanute bawl banga bawl ding ahi.

¹⁰Zi dang ana nei mahleh, a nek dingte, a silhlechen te, a masa zaw a bang (a zi hihna) khah a hihtawm sak ding ahi puoi.

¹¹Chun, zie thil thum hi amahnu chunga a hihloh chun a man piek loh in pawt thei in a.

¹²“Kuo’n le mi a zêp a, a thih chun, amah chuh thah thuk ngêi ngêi ding ahi.

¹³Himahleh, mi’n tup mawng hilo a, a thah guot hilo a, a tawngpalh khâk ahih chun, a taihlut na ding mun khat guotsak ing ka.

¹⁴Himahleh, mi’n tup mâwnga mi a thah chun bitna dingin ka maichâm ah tailut mahleh, thah thuk ngêi ngêi ding ahi.

¹⁵“Kuole a nu ahim, a pa ahim zêp chuh thah ngêi ngêi ding ahi.

¹⁶“Chun, kuole mihing gu a, zuok ahim, suok dinga kawih ahim muh ahih chun thah ngêi ngêi ding ahi.

¹⁷“Chun, kuole a nu ahim, a pa ahim hansie lawh chuh thah ngêi ngêi ding ahi.

¹⁸“Mi a kiniel u a, khat chun suong ahim, a khuttum ahim in su henla, thih chuh thilo in zâlkhun ngak henla,

¹⁹hung thokit thei in tiengkhut khut in chieh thei kit leh, a hun sukmang gûn kha chuh din intin, a dam chien masang chuh a etkawl ding ahi.

²⁰“Mi’n a suoknu ahim, a suokpa ahim mawlh in zêp henla, a mun achun hung thi taleh, amah chuh gawt ngêi ngêi ding ahi.

²¹Amahvang chuh ni khat ahim, ni nih ahim a dam chun gawt ding ahi puoi; a suok chuh a thuomphuo ahi ngâl a.

²²“Chun, mi kisuol u henla, numei nauvawp zêp khapalh henla, a nauvawp chuh hung kie taleh, sietna dang vang chuh umlo hi henla; zie numeinu pasal chun a nget zahzah chuh lieusak ngêi ngêi ding ahi a; vaihawmte guotsak zah chuh a piek ding ahi.

²³Amahvang chuh sietna dang a um chun, hinna sika hinna,

²⁴mit sika mit, ha sik a ha, khut sika khut, keng sik a keng,

²⁵meia hâl sika meia hâl, liemna sik a liem, zêp sika zêp na thuok sak ding ahi.

²⁶“Chun mi’n suokpa mit ahim, suoknu mit ahim zêpin susie taleh, a mit ziek chun a pawtsak ding ahi.

²⁷Chun, a suokpa ahim, a suoknu ahim ha khet bal sak taleh, a ha ziek chun a pawtsak ding ahi.

²⁸“Bâwngchal in numei ahim, pasal ahim sulum taleh, zie bâwngchal chuh suong a sehlup teitei ding ahi, chun, a sa chuh nêk loh ding ahi, a bâwngchal neipa chule gawt loh ding ahi.

²⁹Amahvang chuh bâwngchal chun tuma’n le mi sît ana chîng sek, a neipa chuh hetsak sek hi hen la, himahlele khumtup nuom lo in, pasal ahim, numei ahim a na silum taleh, zie bâwngchal chuh suong a sehlup ding ahi a, a neipa chu le thah ding ahi.

³⁰A tat a tat ding ngek ahih chun, a hinna sik chun a ngek zah u chuh a tatna’n a piek ding ahi.

³¹Mi chapa ahim, mi chanu ahim a na silum taleh hitibang dân mah ahi vaihawm sak ding ahi.

³²Bâwngchal in suokpa ahim, suoknu ahim a na silum taleh, a pu chun dangka thik sawmthum pie’n tin, chun, bâwngchal chuh suong a sehlup ding ahi.

³³“Mi’n kawkhuk sin ana hawng henla, ahihloh leh kawkhuk ana lai henla, sabiltung ahim ana kie taleh,

³⁴zie kawkhuk neipa chun a dit ding ahi; amah chun zie gancha neipa chuh dangka pien tin, tichun gancha thi chuh amah chang in a.

³⁵Mi khat bâwngchal in midang bâwngchal a na silum taleh, a sa chuh kihawm un tin; bâwngchal hing zaw chule zuok untin, aman chuh kihawm un au.

³⁶Bâwngchal chun tuma’n le mi sît ana chîng henla, a neipa chun khumtup nuom ta kileh, bâwngchal thasang chun bâwngchal mah a piek teitei ding ahi, chun, gancha thi chule amah chang in a.