Read Gangte PAWTDAWKNA 22 Bible Online

PAWTDAWKNA 22 - Gangte bible

PAWTDAWKNA 22

¹“Kuo’n le, bâwngchal ahim, belam ahim a gûk a, a thah hi henla, a zuok hilele, bâwngchal khat mana chuh bâwngchal nga a piek ding ahi, belam khat thasang a chuh belam li a piek ding ahi; ahi’n, zie chuh ahih theih loh chun, a gukchak man chuh amah chuh zuok ding ahi; a gancha gûk chuh bâwngchal ahim, sabiltung ahim, belam ahim hilele a hinga muh kit ahih chun a lehnih a a dit ding ahi.

²Gucha, mi In a lut chuh ana man in, ana zêp lum ta leh a thisan phuba chuh um puo’n a.

³“Himahleh, nisuok nung ahih le chuh vang amah a dingin thisan phuba chuh um intin, a thil gûk cheng kim kêi a a piekkit vek ding ahi. Piek ding a neih loh le vang chuh a gukchak mana chuh amah chuh zuok ding ahi.

⁴Gucha’n a thil gûk laka bâwngchal ahim, sabiltung ahim, belam ahim a thil neih laka muh ahih chun a lehnih a a dit ding ahi.

⁵“Mi kuo’n le a gancha thahdawk henla, mi lo ahim, grep huon ahim ah ana ta hen la, mi lo a thil chu a na ne zo taleh, amah lo phapen leh amah grep huon phapen a chuh a dit ding ahi.

⁶“Mi’n mei thahsuok in lingnawk haw ahim kamat in, lo a buhpawl haw ahim, buh ding lai haw ahim, katum taleh, mei thahsuokpa ngêi chun a dit ngêi ngêi ding ahi.

⁷“Mi’n a dangka ahim, a thuomphuo ahim a invengpa vawpsak henla, chun, zie In apat chun mi’n ana gu taleh, gucha chuh a mat u chun, a zah nih a a dit ding ahi.

⁸Gucha chuh a mat loh u chun, zie Inneipa chuh vaihawmte kawmah va chieh intin, a invengpa thuomphuo chuh kei gûk ahi puoi, ti a, a va kihâksiel ding ahi.

⁹“Kiniel buoina taphawt chuh bâwngchal thu ahim, sabiltung thu ahim, belam thu ahim, silhlechen thu ahim, thil bang hileh mansak chungchâng thu mawngmawng ah mi’n, ‘Ziehi chuh keia ahi,’ a tih chun, a nih u a thubuoi chuh vaihawmte masanga a tut ding ahi. Vaihawm te’n mawh a chansak zawk zawk chun a invengpa chuh a lehnih pie’n a.

¹⁰“Mi’n a sabiltung ahim, a bâwngchal ahim, belam ahim, gan bang hitaleh a invengpa ana kawlsak hen la; chun, a thi ahim, kisuna ahim, hawihmang in ahim ana um ta henla, kuoma’n la mu kiu henla,

¹¹amah chun a invengpa gan chuh a khawih leh khawihloh thu ah, a nih u a kal achun Pathien hona In a a kihâksiel ding uh ahi. Gancha chuh ana gûk loh ahih chun, a neipa chun a na pawm sak intin, a dit ngailo ding ahi.

¹²Amahvang chuh guksak ngêi ahih chun a neipa chuh a dit ding ahi.

¹³Gamsa’n a peh a hih chun a nek mawk chuh hetpih dingin hun chawi hen; zie sa peh thasang chuh a dit loh ding ahi.

¹⁴“Chun, min a invengpa gan khêl henla, a neipa um loh kâl in a kisuliem ahim, ahihloh leh thi taleh, a dit ngêi ngêi ding ahi.

¹⁵A neipa chuh a um le chu vang a dit ding ahi puoi; a khelhman um ding a gancha chuh a khelh ahih chun, a khelhman a pieksa chun a mang cheng chuh a khuh ahi tai.

¹⁶“Mi’n nungak zi a a huolloh chuh ana thêm in, ana kuolpih taleh, aman pie’n tin, a zi dinga a neih ngêi ngêi ding ahi.

¹⁷A pa’n a neihsak nuom loh hiel chun chuh, nungak thiengtho man zah sum chuh a piek himhim ding ahi.

¹⁸“Dawi thil mang numei himhim chuh na thah teitei ding uh ahi.

¹⁹“Kuole gancha kuolpih taphawt chuh thah teitei ding ahi.

²⁰“Kuole kei kawm mai tihloh a, Pathien dang himhim kawma kithawi chuh sukmang ngêi ngêi ding ahi.

²¹“Malzin na bawlsiet loh dinguh ahi, muh le na muhsit loh ding uh ahi; nang haw le Aigupta gam akhan malzin na hiu kha.

²²Meithai ahim, naupang pa neilo ahim chuh na sukgimtheih ding ahi puoi.

²³Amau haw chuh na sukgimtheih u a, ei hun sap phawt u chun, kei LALPA hin ei sapnau aw chuh a na za tei ing ka ting;

²⁴tichun, na chunga ka lungnat na hung kuong zak intin, chemzâm in hun that ka ting; chun, na ziteu chuh meithai hiu intin, na chateu le pa beiin um in au.

²⁵“Ka mite, na kawm u a chagah taka umte kawma dangka na palâk sak u chun, na leibateu banga na bawl dinguh ahi puoi; a pung le na lak ding uh ahi puoi.

²⁶Kitiemna dinga na invengte silhlechen chuh na hên sak chun, ni tum masang ngeia na piekkit ding ahi.

²⁷Zie chuh kituomna dinga a neihsun ahi a, a sapum tuom lumna dinga a puon ahi ngâl a; bang silh in ahim a ihmut ding? Chun, hiti hi hung hi’n tin, ei hun sap chun a na za ngêi ing ka ting; kei chuh mi lungsiet thiem tak ka hi ngâl a.

²⁸“Pathien chuh gensie ki’n la, na mite laka vaihawm haw chule hansie na lawh ding ahi puoi.

²⁹“Na thai gah masapen leh na uain tui va masapen chuh vaigei lo a na lat ding ahi. Na chapa upapen chuh nei piek ding ahi.

³⁰Khutibangmah chun, na bâwngchal haw leh na belam haw chule na hih ding ahi; ni sagih chuh a pi kawmah um intin, a ni giet ni chuleh nei piek ding ahi.

³¹“Keia dinga mi thiengtho na hih dinguh ahi, zieziekchun, gamlak a gamsa’n a thahsa ahim gamsa peh himhim chuh na nêk loh ding uh ahi a; ui na piek ding uh ahi.