Read Gangte PAWTDAWKNA 25 Bible Online

PAWTDAWKNA 25 - Gangte bible

PAWTDAWKNA 25

¹LALPA’n Mosi kawmah,

²“Israel chate kawmah thu va gen inla, ka kawmah thilpiek hun pieu hen. A lunggil u a ut taka pie taphawtte piek chuh kei dingin thilpiek a na lâk ding uh ahi.

³Ziehaw hi ahi ka kawma pata thilpiek na lâk ding u chuh: sanate, dangkate, dâkte,

⁴pat dumte, sandupte, sandângte, patngatpuonte, kel multe;

⁵chun, belamchal vun huon sante, savun hawihte, thinggi thingte;

⁶thaumei dingin sathaute, sathau nuh ding leh hâl ding gimlim tak dingin thil gimlimte,

⁷thiempu puonâk leh puonâk awma zeh dingin onix te leh suongmantamte tawh.

⁸Chun, Munthiengtho ei siem sak u hen, a lak u a ka chên theihna dingin.

⁹Hobuk lim leh a sunga thuomphuo ding chengcheng lim ka hun etsak bang tak ahih na siem ding uh ahi.

¹⁰“Chun, Thinggi thing in bawm siem u hen la: a dunglam tawng nih leh a lang hi henla, a vailam chuh tawng khat leh a lang hi henla, a sânlam chuh tawng khat leh a lang hi hen.

¹¹Chun, sana thieng tui in a sunglam leh a pawlam na luonkhum ding ahi a, chun a kimvel chuh sana a na khuh ding ahi.

¹²Zie ding chun sana thik kikuol li na sun ding ahi a, a keng li a chu bulh chiet ding ahi a, chun, kikuol dang nih chu a langkhat a bulh ding ahi.

¹³Chun, thinggi thinga a zawnna te na siem ding ahi a, sanati a luonkhum ding ahi.

¹⁴Tichun bawm chuh zawn theih dingin a panga a bil achun a zawnna na gawlh ding ahi.

¹⁵Zie bawma a bil achun a zawnnate chuh a kivawh zing ding ahi: lâkdawk loh hiel ding ahi.

¹⁶Chun, bawm sung achun thu hetsakna suongpek nih ka hun piek ding chuh na kawih ding ahi.

¹⁷“Chun, sana thiengkei a zahngaihna chutphah na siem ding ahi: a dunglam chuh tawng nih leh a lang hi henla, a vailam chuh tawng khat leh a lang hi hen.

¹⁸Chun, cherub nih sana a na siem ding ahi; zahngaihna chutphah mawngtuok a ding chuh a sêka na sêk thawh ding ahi.

¹⁹A mawng langkhat ah cherub khat siem inla, a mawng langkhat ale cherub khat siem in; zahngaihna chutphah tawh kizawm khawm in a mawng tuok ah cherub nih na siem ding ahi.

²⁰Chun, cherub te chuh kimaingat in zahngaihna chutphah chuh a thau a khuh in, a thateu chuh a zak palh ding uh ahi; zahngaihna chutphah lam chuh cherub te chun a ngat gêl gêl ding uh ahi.

²¹Tichun, bawm chung achun zahngaihna chutphah kawih inla, chun, bawm sung achun thu hetsakna ka hun piek ding chuh na kawih ding ahi.

²²Zie tak achun na kawmah hung ing ka ting, chun thu hetsakna bawm chung a cherub nih kikal, zahngaihna chutphah chunglam apat chun Israel chate kawma thu ka piek ding taphawt chuh zie apat chun hun hopih sek ing ka.

²³“Chun, thinggi thinga dawhkhâng na siem ding ahi: a dunglam chuh tawng nih hi henla, a vailam chuh tawng khat hi hen, a sânlam chuh tawng khat leh a lang hi hen.

²⁴Zie chuh sana thieng a luonkhum ding ahi a, chun, sana’n a gei na kim ding ahi.

²⁵Chun, a gei chuh khutpêk bawka lien a na siem ding ahi a, chun, a gei chuh sana a na kim ding ahi.

²⁶Chun, zie ding chun sana kikuol, a bil li na siem ding ahi a, zie a bil li chuh dawhkhâng keng li ning chiet achun na vawh ding ahi.

²⁷Chun, dawhkhâng chuh zawn theih na dingin, a zawl thun theihna dingin a bilhaw chuh a gei chin a vawh ding ahi.

²⁸Dawhkhâng chuh zawn theih dingin a zawnna haw chuh thinggi thing in na siem ding ahi a, sanati a luonkhum ding ahi.

²⁹Zie ding chun kuonghaw, thikkhe haw, uain ûm haw, a thaldawkna ding belhbu haw na siem ding ahi: ziehaw chuh sana thieng ngawn a na siem ding ahi.

³⁰Chun, dawhkhâng chuh thugawlh Bawm masang a chuh kawih ding ahi a, zie dawhkhâng chung achun chângthâk zek chuh a um zing ding ahi.

³¹“Thaumei tunna sana thiengkei a na siem ding ahi. Zie thaumei tunna chuh a kungpi leh a bâkte chuh seka a sêka sêk thawh ding ahi; a khawnte, a pak kungte leh a pak te chu tawh kimat vek ding ahi:

³²Chun, a sîk haw achun bâk gup hung kadawk henla, thaumei kawihna kung sîk langkhat lam achun bâk thum um u henla, chun, thaumei kawihna kung sîk langkhat lam achun le bâk thum mah um hen.

³³A langkhat lam bâk achun almond pak tawbang bawk thum, a mûm leh a pak na siem ding ahi; chun, a langkhat lampang bâk achun le almond pak tawbang bawk thum, a mûm leh a pak na siem ding ahi, khutibang chun thaumei tunna bâk gup a ding chuh na siem ding ahi.

³⁴Thaumei kawihna kung achun bawk li, makha pak tawbanga siem, a pak lieng leh a pak haw um ding ahi.

³⁵Chun, zie kizawm vek bâk nih nuoi achun pak lieng um henla, thaumei tunna bâk gup achun a um suok ding ahi.

³⁶Zie paklieng haw leh a bâkhaw chuh kimat vek ding ahi a: a pumpi a chuh sana thieng a sek ding ahi.

³⁷Zie a tun ding chu thaumei sagih na siem ding ahi: tichun thaumei haw chu tun a, a mazawnhawu chuh a salh theihna ding un.

³⁸Zie a mat ding chun chaicheh te leh meivam kawihnate chuh sana thieng a siem ding ahi.

³⁹Zie thaumei tunna leh a matchâkte siemna ding chun sana thieng talent khat na mat ding ahi.

⁴⁰Tichun tânga a lim ka hun etsak bang ngêi a khah kuhkal taka na siem ding ahi tih hezing in.