Read Gangte PAWTDAWKNA 3 Bible Online

PAWTDAWKNA 3 - Gangte bible

PAWTDAWKNA 3

¹Chun, Mosi chun a puzawnpa Jethro, Midian gama thiempupa belam hawn a ching a; belam hawnhaw chuh thalek thanglam pang achun a pui a, tichun, Pathien tâng, Horeb chuh a va tunga.

²Chun, nawnglak a chun LALPA vânsâwlchâk chuh meikuong in a kawmah a hung kilak a, chun, a vak en a, ngaitie, nawnglak chuh mei in a ka a, mahleh a katum puoi tih chuh a mu a.

³Chun, Mosi chun, va naih ing ka ting, zie hambuk khu bangti dana katum lo ahim? Zie thilmak tak hi va en dîng ka, a ti a.

⁴Chun, zie thil chuh en dinga a va naih chuh LALPA’n a muhin, nawnglak apat chun a hun sama, “Mosi! Mosi!” a hun ti a, amah chun, “Zie hin ka um hi,” a ti a.

⁵Chun, amah chun, “Hun naih kih: na kêngpêk a na kengtawbek kha sut in, na dinna mun chuh mun thiengtho ahi,” a ti a.

⁶“Chun, kei hi na pa Pathien, Abraham Pathien, Isak Pathien, Jakob Pathien chuh ka hi hi,” a ti kit a. Tichun Mosi chun a mai a khuh ta a; Pathien a en ngam puoh ngâla.

⁷Chun, LALPA chun, “Aigupta gama ka mite chuh a gimtheih zieu ka mu zing a puo, suok enkawlte zieka a kiko thawm u chuh ka na za a; a lungkham nau chuh ka hezing ngâl a.

⁸Tichun, Aigupta pata hukdawk ding leh, zie gam apat a chuh puidawk a, Kanaan mite, Hit mite, Amor mite, Periz mite, Hiv mite, Jebus mite umna gam phatak leh lientak, bâwngnawi leh khuoizu a luong gama chuh puilut dinga hungsuk ka hi tai, a ti a.

⁹Chun, ngaitie, Israel suonte kiko thawm chuh ka kawm a hungtung a, zie mai chuh hilo in, Aigupta mite’n amau haw a sukgimtheih zieu chuh ka mu zing a puo.

¹⁰Zieziekchun, hung inla, ka mi Israel suonte chuh Aigupta gam apat puidawk dingin Pharaoh kawma hun sawl ding ka hi” a ti a.

¹¹Himahlele Mosi chun Pathien kawmah, “Kei Pharaoh kawma chieh a, Israel chate Aigupta gam apat a puidawk dingin kuo ka hi a ahi?” a ti a.

¹²Chun, LALPA Pathien chun, “Na kawma um ding ka hi a, tichun keimah hun sawl ngêi na hi tih ziehi nanga dingin melchikna hi’n a; Mipite chuh Aigupta gam apat a na hun puihdawk tak chuleh, zie tâng ngêi ahin Pathien hun ho inlau,” a ti a.

¹³Chun, Mosi’n a dâwng a, “Ngaitie, Israel chate kawm a ka chieh tieng leh a kawm u ah, ‘Na pileputeu Pathien chun na kawm u a ei sawl ahi,’ va ti leng, amau chun, na min ei dawng taleu bangti’n ka dâwng die?” a ti a.

¹⁴Chun, Pathien in Mosi kawmah, “KEI CHUH KEI KA HI” a ti a. Chun, a kawm u ah: “KEI KA HI, kiti chun na kawm u a ei sawl ka hi,’ na tih ding ahi,” a ti a.

¹⁵Chun, Pathien mah in Mosi kawm achun, “Nangin Israel chate kawm achun, ‘LALPA nang uh hun suonte Pathien, Abraham Pathien, Isak Pathien leh Jakob Pathien chun, na kawm u ahin ei sawl ka hi a, ziehi kumkhuo a ka min chuh ahi a; ziehi suon chengcheng chana nei hetna ding u chuh ahi,’ ti’n gen in.

¹⁶Chun, chieh inla, Israel upahaw samkhawm inla, tichun a kawm u ah, ‘LALPA nang uh hun suonte Pathien, Abraham Pathien, Isak Pathien, Jakob Pathien chuh na kawm u ah a hung kilak ta a, Aigupta gama na chung u a a hih zieu haw hi ka mu tai’ a tii, ti’n gen in, a ti a.

¹⁷Aigupta gama sukgimtheihna lak apat chun hun puidawk ing ka ting, Kanaan mite, Hit mite, Amor mite, Periz mite, Hiv mite, Jebus mite gam, bâwngnawi leh khuoizu a luong gam achun hun puilut ing ka,” tih ka tiem ta ngâl a.

¹⁸Khutichun, amau chun na thugen a na ngaithau in tin, chun, nang leh Israel upate chuh Aigupta lengpa kawmah chieh un na tin, a kawmah, “LALPA, Hebraite Pathien chuh ka kawmah a hung kilak a; zieziekchun gamthip ni thum lam ah, LALPA ka Pathien uh kawma ka va kithawih theihna dingun, lungsiet takin ei chiehsak in,” tiu in.

¹⁹Himahleh, Aigupta lengpa chun khut hattak a a chamlo a thil kihih tello in hun pawtsak puo’n a tih ka hêi.

²⁰Tichun ka khut zak ing ka ting, Aigupta te chunga thil lauh-um ka hih ding chengcheng chun gawt ing ka, zie tieng chuleh vang hun pawtsak ta’n a.

²¹“Chun, hiti hi hung hi’n tin, Aigupta te hun lungsiet sak ing ka ting; na chieh tak u leh khutngawn in chieh puo’n lau.

²²Israel numei chengin a invengteu leh a In u a chêngte chuh dangkaguo kicheinate leh sana kicheinate leh silhlechen haw ngên un tin, tichun, na chapateu leh na chanuteu chungah bât un na tin, tichun, Aigupta mite chuh lâksak ding na hiu hi,” a ti a.