Read Gangte PAWTDAWKNA 31 Bible Online

PAWTDAWKNA 31 - Gangte bible

PAWTDAWKNA 31

¹LALPA’n Mosi kawmah,

²“Entie, Juda nam, Hur chapa Uri chapa Bezalel chuh ka tel ta a;

³chun, amah chuh pilnate, hetthiemnate, hetnate, lam tin chenga themthiemna te, thilhih ding pil taka ngaihtuoh thiemnate,

⁴sana sêk dinga khutthiemnate,

⁵lam tin chenga themthiemna te nei dingin Pathien Thagau in ka hih dim tai.

⁶Chun, ngaitie, amah kithuohpih dingin Dan nam a Ahisamak chapa Oholiab chuh ka guot kit hi. Thil siem dinga ka hun piek haw cheng a sep theih na dingin mipilte banga pilna a lungthim ah ka kawih tai.

⁷kihona puon-In te, thugawlh kawihna bawmte, zie chunga zahngaihna chutphah te, puon-In sunga matchâk chengcheng te,

⁸dawhkhâng leh a matchâkte, sana thieng a siem thaumei kawihna leh a matchâk chengcheng te tawh, gimlim hâlna maichâmte,

⁹hâlmang thillat na maichâm, ûmlebel chengcheng te tawh, kuong leh a tunna te;

¹⁰chun, silhlechen hawihtak taka gatte, thiempu’n zenvielna na a sep tak u a a âk ding thiempu Aron silhlechen thiengtho leh a chapate silhlechente;

¹¹Chun, thau nuh chi leh mun thiengtho a ding a gimlim lim takte hi a siem theihna dingun a mi themthiem dangte chengcheng hihtheihna chule ka piei: hih dinga thu ka hun piek dungzui a kha a hih ding uh ahi,” ti’n a gen a.

¹²LALPA’n Mosi kawmah, Israel chate kawm achun,

¹³“Ka Chawlhni te hi na nit ngêi ngêi ding uh ahi; na suonteu chanin kei leh nanguh kikala melchikna ahi ngâla, kei hi LALPA, nangmau haw hun suthiengthopa ka hi hi tih na het theihna ding un.

¹⁴Zieziekchun, chawlhni hi na nit dinguh ahi; zie chuh nang u dingin ni thiengtho ahi ngâl a. Kuole nit lo a subuok ta chuh suklup ngêi ngêi ding ahi.

¹⁵Ni gup sung nasepna a mat ding ahi a; mahleh ni sagih ni chuh, chawlhdamna, kei a ding a ni thiengtho ahi. Kuole chawlhni a nasem taphawt chuh suklup ngêi ngêi ding ahi.

¹⁶Khutichun Israel chate chun chawlhni chuh nit untin, a suonteu chana kumkhuo thugawlh melchikna a a nit zing dinguh ahi.

¹⁷Kei leh Israel chate kikal ahin kumkhuo a thugawlh melchikna ahi: ni gup sungin LALPA’n lei leh van a siem a, chun, a ni sagih ni chun a chawla, chun a kichawldam tai,” ti’n a gen a.

¹⁸Tichun Sinai tânga Mosi a hopih zawh chun thuthunna Suongpek nih, Pathien khutzung a zik suongpekte chuh Mosi a pie ta a.