Read Gangte PAWTDAWKNA 32 Bible Online

PAWTDAWKNA 32 - Gangte bible

PAWTDAWKNA 32

¹Chun, mipite chun Mosi chuh tâng akipat hungsuk hak a sak bêk phet un Aron kawmah a hung khawm u a, a kawmah, “Khai, ka mau pui dingin pathiente ei siem sak in; zie Mosi Aigupta gama pata ei puidawkpa hi la a chanchin ka he ta puoh ngâl un,” a tiu a.

²Tichun Aron in a kawm u ah, “Na ziteu, na chapateu leh na chanuteu bahlai, sana bilbah haw kha hun lakhawm unla, ka kawmah hun chawi un,” a ti a.

³Khutichun, mipite chengcheng chun sana bilbah a bahlai teu chuh ahun lakhawm vek u a.

⁴Chun, amah chun a khut u apat chun ana la a, thikzum matchâk a vak siem a, bâwngno lim a sung ta a: chun, amau haw chun, “Aw Israel te, ziehaw hi Aigupta gam apat a ei puidawkpa, I pathienteu chuh ahiu hi,” a tiu a.

⁵Chun, zie chuh Aron in a vak muh phetin a masang achun maichâm a siem ta a; a kiko a, “Zing hileh LALPA dingin guolvakna um hen,” a ti a.

⁶Tichun, a zing zingkal matak in a tho u a, hâlmang thilpiekte a pieu a, chamna thilpiekte chuh a hun chawi u a; tichun mipite chuh ne leh dâwn dingin a chu khawm u a, kipawl thanghuoi in a um tau a.

⁷LALPA’n Mosi chuh a hopih a, “Va chieh suk ta’n, mipite Aigupta gam apat a na hun puihdawkte khu a kisusie zo vek tau hi.

⁸Ka thupiekte chuh a kiheisan tau a, bâwngno lim a siem u a, a kawm achun a kithawi u a, a ho tau hi; Aw Israel te, ziehi Aigupta gam apat hun puidawk, na pathienteu ahiu hi,” a tiu hi, a ti a.

⁹Chun, LALPA’n Mosi kawmah, “Zie mite hi ka entha zinga, ngaitie, nam genhak tak ahiu hi tih ka hêi.

¹⁰Tichun, ana khawngai ah, amau haw kângtum zo vek khawp in a chung u ah ka lungnatna chuh kuong dawk hen; chun, nang hi chuh nam lopi takin hun siem ing ka,” a ti a.

¹¹Himahleh, Mosi chun LALPA a Pathien kawmah, “LALPA, thilhih theihna nasatak leh, khut hattak a na mi, Aigupta gam apat a na hun puihdawkte chung ahin bangati a na lungnatna chuh sosak na hi?

¹²Bang zieka Aigupta mite’n, ‘Amau dinga phalo ding leh, tânga thah ding leh, leichung apat a sukmangthai vek dinga a puihdawk ahi,’ a hun tih ding uh? Na lungnatna nasatak hi sudai inla, na mite chunga zie thil phalo hih tunsak dah hâm in.

¹³Na suok Abraham te, Isak te, leh Israel te kawm a, ‘Vana aksi zah in na suonte chuh hun supung ing ka ting, zie gam ka na gen tâksa chengcheng hi na suonte hun pie’ng ka ting, tichun, kumkhuo’n luoh den tan au,’ ti a nangmah ngêi na kihâksiel na haw kha hezing in,” ti’n a ngên a.

¹⁴Tichun LALPA’n a mite chungah thil phalo ahih guot chuh a kinungzuk ta a.

¹⁵Chun, Mosi chuh a kipana, tâng apat chun a kum suk a, thu hetsakna suongpek nih a khut in a chawia; suongpekte nih chuh alangtuok kizik ahi a, a langkhat leh a lehlam kizik gel ahi.

¹⁶Chun, suongpek haw chuh Pathien khutsuok ahi a, a chunga kizik chule Pathien zik ngêi, suongpek haw chunga geikuok a kizik ahi.

¹⁷Chun, Joshua’n mipite kiko thawm a vak zak chun, Mosi kawmah, “Giehmun lam ah kido thawm a um hi,” a ti a.

¹⁸Himahlele, Mosi chun, “Guolzo kiko thawm ahi puoh a, zawh a umte kiko thawm le ahi diek puoh a; lasak thawm ahi ka zak zawk chuh,” a ti a.

¹⁹Chun, hiti hi ahi a, Mosi chuh giehmun kieng a va tun chun, bâwngno lim leh a lâm u chuh a vak muh phet chun, Mosi lungnat na chuh a hung puok zak ta a; a suongpek chawihte chuh a septha ta a, tângbul achun a sepphel ta a.

²⁰Chun, bâwngno lim a siem u chuh a la a, mei ah a hâl a, a gawt nêl a, tui lak ah a sungtha a, Israel chate chuh a dâwnsak ta a.

²¹Chun, Mosi’n Aron kawm achun, “Ziehaw hin na chungah bang a hih u a, zie bang thil gilo nasatak mai hi a chung u a na tunsak ahi?” a ti a.

²²Chun, Aron chun, “Ka pu lungnatna hi kuong zak phut zieng kihen: zie mipite hi gitloh lam nga mi ahiu hi tih na he apuo.

²³Ka kawmah, ‘Ka mau pui dingin pathien haw ei siem sak in: zie Mosi Aigupta gam apat a ei puidawkpa hi la a chanchin ka he ta puoh ngâl un,’ a hung tiu a.

²⁴Zieziekchun ken a kawm u ah, ‘Kuole sana nei taphawt in hun latha hen,’ ka ti a; khutichun ei hun pieu a: chun, ken mei ah ka na paih lut a, tichun zie bâwngno lim hi a hung pawt tamai ahi,” a ti a.

²⁵Tichun, mipite chuh sangawn a um ahiu hi tih Mosi’n a muh phet chun Aron in mipite chuh etkawl zawh loh khawp in a na nawplen sak in, a melmateu masangah ana kisungawl ui tih chuh a mu ta a.

²⁶Tichun Mosi chuh giehbuk lutna kulh kawt achun a ding a, “Kuole LALPA lama pang taphawt chuh ka kawmah hung hen,” a ti a. Tichun Levi chate chengcheng chuh a kawmah a va chieh khawm u a;

²⁷Tichun a kawm u ah, “LALPA Israel te Pathien in, ‘Mitin in na chemzâm uh chawi unla, giehbuk sung ahin a lutna kulhkawt apat a kulhkawt lehlam chanin vakviel unla, mitin in na suohpihpau le, mitin in na guolpau le, mitin in na invengpau le that zel un,’ a tii,” a ti a.

²⁸Tichun, Levi chate chun Mosi thu bang chun a hih u a: zie ni chun mi sangthum a that u a.

²⁹Mosi chun Levi chate kawm achun, “Tuni hin na suohpihteu, na chateu, that hielin, LALPA nasepna a thiempu dingin na kikawihchuom tau a; zieziekchun tuni hin LALPA’n a vangsakna chuh na chung u ah hun vuk ta hen,” a ti a.

³⁰A zing chun Mosi’n mipite kawm achun, “Thil gilo huoisie tak mai na na hih tau a. Himahleh, tângah LALPA ma ah va chiehto ing ka; na gitlohnau ahin ngaihdamna ka va siem thei kha mawh die,” a ti a.

³¹Tichun, Mosi chuh LALPA kawm achun a va chieh kit a, “Aw, zie mipite hin thil gilo huoisie tak a na hih tau a, sana pathiente chuh a na kisiem tau a.

³²Mahleh, tuhin a gitloh uh na ngaidam thei dem? A theih loh ding le vang na lehkhabu a ka min na ziksa kha thaimang dingin ka hun ngên hi,” a ti a.

³³Chun, LALPA’n a dâwng a, “Kuole ka chung a thil hihkhiel taphawt chuh ka lehkhabu apat in thaimang ing ka.

³⁴Himahlele, tuhin chieh inla, chiehna ding ka hun hilhna mun akhan mipite hi va pui phawt in. Ngaitie, ka vânsâwlchâk in na ma pui zel in a, tih hezing in; amahvang chuh, ka hun vehthak ni chuleh a gitlohnau ngêi achun gawt ding ka hi,” a ti a.

³⁵Tichun, Aron in bâwngno lim a siem ziek chun, LALPA’n mipite chung achun hipi a lênsak ta a.