Read Gangte PAWTDAWKNA 39 Bible Online

PAWTDAWKNA 39 - Gangte bible

PAWTDAWKNA 39

¹Chun, LALPA’n Mosi thu a piek guol khan, patdumte, sandupte, sandângte mang in mun thiengtho a nasepna dinga silhlechen ding hawihtak a siem u a. Aron a dingin thiempu silhlechen thiengthote le a siem u a;

²Chun, sana khaute, patdumte, sandupte, sandângte, patngat puonkawpte mang in thiempu puonâk a khui a.

³Sana chuh phatak in a khen pêk a, patdumte, sandupte, sandângte, patngatpuonte’n mi khutthiem tak in a bât dingin a thêk ngât u a.

⁴Thiempu puonâk chuh a liengko tuoka dâlbak a kuoh thawh in a siem u a; a mawng tuok gel a khuihkhawm ahi.

⁵Chun, zie puonâk chunga kâwnggak ding chuh, khut thiem takin a gat, zie puonâk zat mah chuh tawn khat mat ahi a: sana patzangte, patdumte, a sandupte, a sandângte, patngat puonkawpte a gat ahi; LALPA’n Mosi thu a piek guol taka kha siem ahi.

⁶Chun, Israel chate min bang zelin, minnamna a geikuok a zik tawbang in, sana patzang phêk a kiphum onix suonghaw achun a zik u a.

⁷Chun, Israel suonte hetzingna suong dingin sawmlenihte thasang in thiempu puonâk liengko achun a belh a; LALPA’n Mosi thu a piek bang khan.

⁸Chun, Awmphaw chuh thiempu puonâk siem tawbang in mi themthiem takin sana patzang te, patdumte, sandupte, a sandângte, patngât puonkawpte mang in a siem a.

⁹Zie chuh ning li nei ahi a; awmphaw chuh a thuoh u a: a dunglam chuh khâp khat ahi a, a vailam chuh khâp khat mah ahi, a kithuoh ahi.

¹⁰Zie tak achun suongmantam tien li’n a zêp u a: tien khatna chuh sardius te, topaz te, carbuncle te ahiu a.

¹¹Tien nihna chuh emerald te, sapphire te, diamond te ahi a.

¹²Chun, tien thumna chuh, jacinth te, agate te, amethist te ahi a.

¹³Tien lina chuh beril te, onix te, jasper te ahi a: sana patzang kiphêk a zeh tup kêi ahi.

¹⁴Tichun, a suonghaw chuh Israel chate min dungzui in, suong sawmlenih a min uh kizik chu a um a; minnamna a chuong tawbang in, namtin a min u bang zelin, nam sawmlenihte min geikuok a kizik ahi.

¹⁵Chun, awmphaw chung achun khauhuol tawbang kikuoituoh diet diet in, sana thieng kiphêk a siem u a.

¹⁶Sana patzang phêk nih leh sana kikuol nih a siem u a; tichun awmphaw gei mawng tuok achun zie kikuolhaw chu a vawh ui.

¹⁷Sana kikuoituoh diet diet phêk nih chu awmphaw gei mawngtuok gel a kikuol nih achun a thun u a.

¹⁸A kikuoituoh diet diet phêk mawng langtuok nih te chu sana patzang phek nih achun a zawm u a, zie chuh thiempu puonâk malam a dâlbak achun a thun u a.

¹⁹Chun, sana kikuol nih a siem u a, ziehaw chuh awmphaw ning nih, thiempu puonâk mawng sunglam pang achun a vawh u a.

²⁰Sana kikuol nih a siem u a, ziehaw chuh a malam a thiempu puonâk dâlbak na nih nuoi lam pang ah, a kizawpna vel, thiempu puonâk gâkna, khutthiem taka gat chunglam achun a vawh u a.

²¹Chuleh thiempu puonâk a kikuolhaw achun awmphaw a kikuolhaw chuh patkhau dum in a khuimat u a, khutthiem taka gat; thiempu puonâk gâkna chunglama a um theihna dingin leh, awmphaw chuh thiempu puonâk tawh a kikhenlohna dingin; LALPA’n Mosi thu a piek bang tak khan.

²²Thiempu puonâk, puonâk chuol, a dum thieng a gat a siem a,

²³chun, puonâk chuol lai tak achun puonâk banbûl bangin a hihvang a, a vanna chuh a ehsiet zieng lohna dingin a gei chuh a kîm a.

²⁴Chun, puonâk chuol mawnghaw achun vaimimthei lim, a dumte, a sandup te, a sandâng te, patngatpuon kawpte’n a siem a.

²⁵Chun, sana thieng in lawngchate a siem u a, zie lawngcha chu puonâk chuol mawng ah a kimvelin vaimimthei kikalhaw achun a kawih u a, vaimimthei kikal zela a kawih uh ahi.

²⁶Lawngcha khat leh vaimimthei khat zel kikal hel in thiempu nasepna a ding chun a kawih u a: LALPA’n Mosi thu a piek bang khan.

²⁷Aron leh a chapate ding chun pat ngât taka gat thawh puonâkte a siem u a,

²⁸patngatpuon a siem, thiempu dielkawp, pat ngât taka siem diel hawihtak te, pat ngât tak a kawpa siem patngât pheika te,

²⁹patngatpuon kawpte, a dumte, a sandupte, a sandângte sangin puon gat thiemte bât, kâwnggak te tawh, LALPA’n Mosi thu a piek bang khan a hih a.

³⁰Chun, lukhuk thiengtho dingin; sana pêk chu sana thieng in a siem u a, a chung achun minnamna a chuong tawbang, “LALPA DINGA THIENGTHO,” tih geikuok in a chuon sak u a.

³¹Zie chuh thiempu lukhuk mai lam achun khau dum in a gâk dên u a; LALPA’n Mosi thu a piek bang khan.

³²Khutichun kihona puon-In na chengcheng chuh a zo tau a: tichun LALPA’n Mosi kawma hih dinga thu a piek bangtak khan Israel chate chun a hih u a.

³³Chun, Mosi kawmah hobuk siemna ding haw chuh a hun chawi u a, puon-In leh a matchâk chengcheng te, a kilhmatna te, a guhpi te, a bâng guhte, a khuomte, a kingakna geikuok te tawh;

³⁴belamchal vun kihuon san a siem, a khuhna te, savun hawihtak a siem a khuhna te, a daltanna ding puonzakte tawh,

³⁵thugawlh kawihna bawm leh a zawnna te, zahngaihna chutphah leh,

³⁶dawhkante, a matchâk chengcheng te, chângthâk kawihna te tawh,

³⁷sana thieng a siem thaumei kawihna te, thaumei tunna dingte a matchâk chengcheng leh det vak dingin a thau tawh;

³⁸sana maichâm te, thau nuh chi te, hâl ding gimlim tak te, puon-In kawtkhaka zak ding puon zak te,

³⁹sumeng maichâm te, a sumeng lên te, a zawnna te leh matchâk chengcheng te, kuong leh a luihna te tawh;

⁴⁰puon-In huongsung a puonzak te, a khuom te, a khuom kingakna geikuok te, a huongsung kawtkhaka puonzak te, a khau te, a kilhmatna te, puon-In hobuk sunga a matchâk thil chengcheng te,

⁴¹mun thiengtho a nasepna dinga silhlechen hawihtak a gat te, thiempu Aron leh a chapate’n thiempu na a sep tieng u a a âk ding uh silhlechen thiengtho te,

⁴²LALPA’n Mosi kawma hih dinga thu a piek chengcheng chuh Israel chate chun a hih suok kêi tau a.

⁴³Mosi’n zie nasep chengcheng chuh a en a, a zo suok kêi tau a; ngaitie, LALPA thupiek bang takin a zo suok kêi tau hi: tichun Mosi’n amau chuh a vangsak ta a.