Read Gangte PAWTDAWKNA 4 Bible Online

PAWTDAWKNA 4 - Gangte bible

PAWTDAWKNA 4

¹Chun, Mosi chun “Ngaitie, Israel chate chun ei gingcha puou intin, ka aw le ngaitha puou intin, ‘LALPA chuh na kawmah a kilak puoi,’ ti mai ding ahi ngâl u a,” ti’n a dâwng a.

²LALPA chun a kawmah, “Na khuta um kha bang ahi?” a ti a. Amah chun a kawmah, “Mawlh,” a ti a.

³LALPA chun, “Tuol ah vak kawihtha tie,” a ti a. Tuol a chuh a vak kawihthak leh gûl a suok ta a. Mosi chuh lau in a tai ta a.

⁴Chun, LALPA chun Mosi kawmah, “Na khut in bân inla, a mei in vak man tie,” a ti a; a vak mat leh mawlh a hungsuok kit ta a.

⁵Zie chuh LALPA, “A pileputeu Pathien, Abraham Pathien, Isak Pathien, Jakob Pathien chuh na kawmah ahung kilak ngêi hi tih a ginchak theihna dinguh ahi,” a ti a.

⁶Chun, LALPA’n Mosi chuh a hopih kit a, “Na khut kha na âwm ah vak kawih tie,” a ti a. Tichun a khut chuh a âwm achun a vak kawih a; a lâkdawk kit phet chun ngaitie, a khut chuh a hung phâk a, vuk bangin a hung vam ta a.

⁷LALPA chun, “Na khut kha na puonâk nuoi ah gawlh lut tie,” a ti a. Tichun a khut chuh a puonâk nuoi achun a vak gawlh lut kita; chun, a lâkdawk kit phetin, ngaitie, a taksa dang bang chun a hung dam kit ta a.

⁸Chun, hiti hi hi’n tin, “Amau chun ahun ginchak loh u a, tiemtehna masa zaw chuh a pawm nawp loh u chun, tiemtehna nunung zaw bêk chuh gingcha’n au.

⁹Melchikna nih te nasan hi a ginchak loh u a, na thugen chu le a pawm loh u chun, Nile luipi a tui va suok inla, lei hul ah buntha’n, tichun tui chuh lei hul achun thisan hungsuok in a,” a ti a.

¹⁰Himahlele Mosi chun, LALPA kawmah, “Aw LALPA, na suok kei hih tuma lam leh nei hopih nung hin le pau mat thiem ka hi kha puoh a; kamthiem lo leh dang-âwk tak ka hi ngâl a,” a ti a.

¹¹Chun, LALPA chun a kawmah, “Mihing kam hi kuo siem ahi? Pau theilote, bengngawngte, mitvakna piete, mitdûkte hi le kuo siem ahi? KEI, LALPA siem hilo ahim?

¹²Zieziekchun chieh mai ah, na kam chuh ken umpih zel ing ka ting, na thugen ding chuh hun hilh zel ding ka hi,” a ti a.

¹³Himahleh Mosi chun, “Hilo e, LALPA, mi dang sawl zaw dingin ka hun ngên hi,” a ti a.

¹⁴Tichun LALPA chuh Mosi chungah a lungna ta a, a kawmah, “Na suohpihpa Aron, Levi suon a mi chuh a um hilo ahim? Amah chun thu a gen thiem hi tih ka hêi, Ngaitie, nang hun tuok dingin a hunga, a hun muh tieng leh a lunggil kipâk mah mah in a,” a ti a.

¹⁵“Khutichun amah chuh hopih in, thumawp in la; tichun, na nih u chun thugen dingin hun panpih ing ka ting, na hih ding u chuh hun hilh zel ing ka.

¹⁶Tichun, amah chuh mipite kawma na thu gensawn in pang intin; nang chuh amah a dingin Pathien tawbang hi’n la.

¹⁷Chun, nangin zie mawlh hi chawi inla, zie chun thilmak haw hi hih inla,” a ti a.

¹⁸Tichun, Mosi chuh a puzawnpa Jethro kawmah a chieh kita, a kawmah, “Aigupta gama ka suohpihte chuh a dam nau em tih hetha dingin, lungsiet takin ei chiehsak in,” a ti a. Tichun, Jethro chun Mosi kawmah, “Thamuong takin chieh in,” a ti a.

¹⁹Chun, Mosi Midian gama a um zing lai chun LALPA’n a kawmah, “Chieh inla, Aigupta gam ah vaikit in; nang hun thah guote kha a thi suok tau hi,” a ti a.

²⁰Tichun Mosi chuh a zi leh a chate tawh sabiltung chunga chu’n Aigupta gam achun a vaikit tau a. Mosi chun Pathien in chawih dinga a hilh mawlh chuh a chawi a.

²¹Chun, LALPA’n Mosi kawmah, “Aigupta gam na tun tieng leh na khuta thilmak ka hun hihsak chengcheng kha Pharaoh masangah hih ngêi ngêi in; himahlele a lungthim sukkhauh sak ing ka ting, tichun mihaw chuh pawt sak phal puo’n a.

²²Tichun nangin Pharaoh kawmah, ‘LALPA chun, Israel hi ka chapa, ka cha lutîl ahi’ a tii, ti a na gen ding ahi.

²³Tichun, ka chapa chun ka na a sep theihna dingin, thahdawk in, ka ti a, na thahdawk loh chun, ngaitie, na chapa, na cha lutîl chuh hun thah sak ding ka hi; a tii, ti’n hilh in,” a ti a.

²⁴Chun, hiti hi ahi a, LALPA’n Mosi chuh Aigupta zawtna lampi a giehbuk achun a kituokpih a, tichun thah a guo ta a.

²⁵Ziephet chun Zipporah chun mei suong hiem a la a, a chapa zek vun chuh a tan a, Mosi keng a sukkhak sak a. “Keia dingin zektan ziekin thisan suoh pasal na hi,” a ti a.

²⁶Khutichun amah chuh a taihsan ta a, “Zektan ziekin thisan suoh pasal na hi,” a ti a. Tichun LALPA’n Mosi hinna chuh a hawihsak ta a.

²⁷Zielai chun Aron kawmah, “Gamgaw ah va chieh inla, Mosi va kimuhpih ah,” a ti a. Tichun a chieh a, Pathien tâng achun a kituokpih a, a châwp a.

²⁸Chun, Mosi chun LALPA’n a sawl ahih dân thute chengcheng leh thilmak a hihsak ding thute chuh Aron a hilh suok kêi a.

²⁹Khutichun Mosi leh Aron chun Israel upahaw chengcheng a samkhawm suok kêi u a.

³⁰LALPA’n Mosi kawma a gen chengcheng chuh Aron chun a gensawn kit a, Mosi chun mipite mitmuh in thilmak haw chuh a hih a.

³¹Chun, mipite chun a gingcha tau a: chun, LALPA’n Israel chate gimtheih zie a mu tai tih a het un, a bawkkhup u a, a ho tau hi.