Read Gangte PAWTDAWKNA 40 Bible Online

PAWTDAWKNA 40 - Gangte bible

PAWTDAWKNA 40

¹Chun, LALPA’n Mosi kawmah,

²“A tha khatna, ni khat ni chun Hobuk chuh na tundawk ding ahi.

³A sung achun thugawlh kawihna bawm na kawih ding ahi a, chun, bawm chuh puon zak in na daltan khum ding ahi.

⁴Chun, dawhkhâng kha la lut inla, a chung achun matchâk haw chuh a kizawm zawm in na kawih ding ahi; thaumei tunna la lut in na tin, a thaumei chuh na det ding ahi.

⁵Chun, gimlim hâlna ding sana maichâm chuh thugawlh kawihna bawm masangah kawih inla, puon-In kawtkhak puonzak chuh na zak ding ahi.

⁶Chun, hâlmang thilpiekna maichâm chuh puon-In kawtkhak bula chuh na kawih ding ahi.

⁷Chun, puon-In leh maichâm kikal achun kuong lui inla, zie tak achun tui na kawih ding ahi.

⁸Hobuk kimvel chun a huongsung siem inla, a huongsung kawtkhak puonzak chuh na zak ding ahi.

⁹“Zie chun, thau nuh chi la’n la, puon-In leh a sunga um chengcheng te chuh nuh in, na sukthien tho ding ahi, a matchâk chengcheng te tawh: tichun hung thiengtho in a.

¹⁰Chun, hâlmanga thilpiekna maichâm leh a matchâk chengcheng te chuh thau nuh in, maichâm chuh na hih thientho ding ahi: tichun, maichâm thiengtho pên hung hiding ahi.

¹¹Chun, kuong leh a luihna chuh thau nuh in, na hih thientho ding ahi.

¹²“Chuleh, Aron leh a chapate chuh puon-In kawtkhak bul achun hun pui in na tin, tui a na sil ding ahi.

¹³Chun, Aron chuh silhlechen thiengtho na silh sak ding ahi; tichun thiempu na sema kei dinga a pan theihna dinga thau nuh in, na kawihchuom ding ahi.

¹⁴Chun, a chapate le hun pui in, puonâk chuol na âksak ding ahi:

¹⁵tichun thiempu na sema kei dinga a pan theihna ding un, a pau sathau na nuh bang khan amau haw chule thau na nuh ding ahi: thau nuh a a um u hi a suonteu chan ale kumkhuo a thiempu dinga guot hizing ta’n au tih, amau dingin melchikna hi’n a,” ti’n a gen a.

¹⁶Khutibang chun Mosi’n a hih a: LALPA’n hih dinga thu a piek bang tak chun a hih vek ta a.

¹⁷Chun, kum nihna tha khatna, zie ni khat ni chun hobuk chuh a hun tungding tau. a.

¹⁸Mosi chun hobuk chuh a hun tungding a, a kingakna geikuokte a hun lem a, a khuom guhpite chuh a hun tungding a, a bâng guhte chuh a hun gawlh a, a khuomte chuh a hun tungding ta a.

¹⁹Chun, LALPA’n thu a piek bang khan puon-In chung a chun puon a zak a, zie puon-In chuh a khuhna’n a khuh kita;

²⁰Chun, suongpek nih chuh a la a, Pathien bawm sung ah a kawih a. A zawnna mawlh chuh a bil ah a thun a, a chung achun zahngaihna chutphah a kawih a.

²¹Chun, Pathien bawm chuh hobuk sung achun a kawih a, a daltanna puonzak chuh a zak a, thugawlh kawihna thingkuong chuh a daidan ta a; LALPA’n Mosi thu a piek bang khan.

²²Chun, dawhkhâng chuh kihona puon-In sung, mâllam pang, puonzak pawlam achun a kawih a.

²³Chun, dawhkhâng achun LALPA umna ah chângthâk piekte chuh a kizawm in a kawih a; LALPA’n thu a piek bang khan.

²⁴Thaumei kawihna chuh puon-In sung, hobuk simlam pang, dawhkhâng zawn achun a kawih a.

²⁵LALPA’n Mosi thu a piek bang khan, Thaumeite chuh LALPA umna achun a de a.

²⁶Chun, Sana maichâm chuh puon-In sung puonzak masang achun a kawih a;

²⁷a chung achun thil gimlim tak hâl ding gimlim a hâl a; LALPA’n Mosi thu a piek bang khan.

²⁸Chun, puon-In kawt achun kawtkhak puonzak a zak a.

²⁹Chun, LALPA’n Mosi thu a piek bang khan, puon-In kawtkhak bul achun hâlmang thilpiek piekna maichâm a kawih a. A chung achun hâlmang thilpiek leh an thillat a kawih a.

³⁰Chun, puon-In leh maichâm kikal achun kuong chuh a kawih a, kisilna dingin tui a kawih a.

³¹Mosi leh Aron leh a chapate chun zie tak achun a khut u leh a keng uh a sil u a;

³²LALPA’n Mosi thu a piek bang khan, puon-In a a lut ding cheng u leh, maichâm bula a chieh ding cheng un a kisil u a.

³³Chun, hobuk leh maichâm vel achun huongsung a siem a, a huongsung kawtkhak puonzak chuh a zak a. Khutichun, Mosi chun a nasep ding chuh a zo ta a.

³⁴Tichun, kikhawp khâwmna puon-In chuh meipi’n a hun tuom mepmup mai ta a, tichun, hobuk chuh LALPA lopina’n a hung dim ta a.

³⁵Khutia meipi a hung zin tâk ziek leh, LALPA lopina’n puon-In chuh a hung dim tâk ziekin, Mosi chuh hobuk sung achun a lut thei ta puoh a.

³⁶Chun, Puon-In chung zawna meipi chuh a kihawkdawk phat phat leh, Israel chate chuh a khuolzinnau malam zuon in a zin zel u a.

³⁷Himahlele, meipi chuh a kihawkdawk loh chun, a kithiel dawk masang sieh kichawn lo in a um zing sek ui;

³⁸Tichun, LALPA umpihna meipi chuh sun leh hobuk chungah a uma, zan leh meikuong in a hung um zel seka; Israel chate chengcheng chun a khuolzin sung cheng u chun zie chuh a mu zel sek ui.