Read Gangte PAWTDAWKNA 5 Bible Online

PAWTDAWKNA 5 - Gangte bible

PAWTDAWKNA 5

¹Zie nung chun Mosi leh Aron chuh lengpa kawmah a va chieh u a, a kawmah, “LALPA Israel te Pathien in hiti hin a tii, ‘Ka mite hi thalek a ka kawma hung kut dingin hun sawl in,’ a tii,” ti’n a gen u a.

²Pharaoh chun, “LALPA chuh kuo ahi a, a thu ka zawpa Israel suonte ka vak pawtsak mai ding ahim? LALPA chuh ka he puoh a, chun Israel chate le pawtsak puo’ng ka,” a ti a.

³Chun, amau chun, “Hebraite Pathien ka kawm u ah a hung kilak a, thalek ni thum lam ah LALPA ka Pathien u kawmah ka va kithawih theihna dingun lungsiet takin ei chieh sak in; khutilochun, ka chung u ahin natna hi ahim, chemzâm ahim hun lênsak kha’n a,” a tiu a.

⁴Chun, Aigupta lengpa chun a kawm u ah, “Bangti dana nang uh Mosi leh Aron hin mipi nasem laite hi na sukthatdah uh ahim? Chieh un la na nau va kisep hiet hiet leu chun ahi chu,” a ti a.

⁵“Chun, Pharaoh chun, Ngaitiem u, zie gam ahin mi na hung tam mah mah tau a, chun, a puokgik puok u chuh nangun na chawlhsak guo mai u a,” a ti a.

⁶Chun, zie ni ngêi chun Pharaoh chun nasem lawiupa haw leh a enkawlte leh a mite chuh thu a pie a,

⁷“Tu a kipatin tuma guol khan mihaw hi cheklei siemna ding buhpawl na piek tâk loh ding uh ahi, amau ngêi in buhpawl chuh a kichawm khawm dinguh ahi.

⁸Chun, tuma a chêktang a siem zat mah u kha amau haw apat a na ngek dinguh ahi; na tawm sak diek loh ding uh ahi: a thau a dah ahi hi; zieziek hin ahi, ‘Ka Pathien u kawmah va kithawi ing kau a tih zing u hih,’ a ti a.

⁹Mihaw hi nasep haksa zaw diek pieu in, zie chuh sem u henla hileh lepchieh thu ngaihtuohna ding hun neilo ding ahiu hi,” a ti a.

¹⁰Tichun suok enkawl haw leh lawiupate chuh a chiehdawk u a, Israel chate kawm achun, “Pharao’n ‘Buhpawl vang hun pie ta lo ding ka hi,’ a tih ahi, a tiu a.

¹¹Buhpawl chuh na muh theih dân dân u a na va kichawmkhawm dinguh ahi; na nasep u hi hun suktawm sak diek lo ding ahi,” a tiu a.

¹²Khutichun mihaw chuh Aigupta gamsung cheng achun buhpawl thasanga buh bul hawl ding chun a vak viel sausau u a.

¹³Chun, suok enkawlte chun tuma a buhpawl a piek lai guol u a khah a zah mah sem dingin a nawh diek diek u a.

¹⁴Chun, Aigupta mi nasem enkawlte chun Israel chate laka lawiupa dinga a guotteu chuh a zêp u a, “Bangti dana thangni haw leh tuni ahi le tuma a banga cheklei siem hi na zawh loh uh ahi?” ti’n a hawk diek diek u a.

¹⁵Tichun Israel chate lawiupa haw chuh Pharaoh kawmah a va chieh u a, “Na suokhaw hi bangati a hiti lâwm lâwma ahi nei bawl ahim?

¹⁶Na suokte hi buhpawl la ei pie ta puou a, ‘Cheklei siem un,’ ei ti ngâl u a: ngaitie, na suokte hi zêpin a um a; himahleh, a diklo chuh na mite ahi ngâl u a,” ti’n a lungzînna thuu a va gen u a.

¹⁷Himahlele amah chun, “Na thadah u a, na thatdah ziek u a hih LALPA kawma kithawi dinga kingen na hiu hi.

¹⁸Zieziekchun chieh unla, na va sem u; buhpawl vang hun pie lo ding ka hiu hi, amahvang chuh cheklei a hun ngek zat u chuh na siem tho dinguh ahi,” a ti a.

¹⁹Chun, Israel upate kawm achun, “Na nicheng nasep uh, na cheklei dên u hi hihtawm thei diek puo’n lau,” a tih sak phet u chun, a dinmun uh asie mah mah hi tih a hung kihedawk tau a.

²⁰Chun, Pharaoh kawm apat a a hung pawt lai u chun Mosi leh Aron in lampi a ana ngak u chuh a vak muu a.

²¹a kawm u ah, “LALPA’n na thilhhih u chuh a mu a, na chungthuu hun vaihawm sak hen; a ziek chuh, Pharaoh leh a suokte mitmuh ah hawtna nei siem sak u a; kei uh ei thah na dingin a khut u ah chemzâm a chawih ziekun,” a tiu a.

²²Tichun Mosi chun LALPA lam a nga a, “LALPA, bangati a zie mihaw hi phalo taka na bawl ahim? Bang zieka nei na sawl ahi ta’m?

²³Lengpa kawma na min a thugen dinga ka hung apat in zie mihaw hi phalo takin a bawl u a; nang in la na mite hi na hukdawk hiel puoh ngâla,” a ti a.