Read Gangte PAWTDAWKNA 8 Bible Online

PAWTDAWKNA 8 - Gangte bible

PAWTDAWKNA 8

¹Chun, LALPA’n Mosi chuh a hopih a, a kawmah, “Pharaoh kawmah va lut inla, a kawmah, ‘Ka mite hin ka na a sep theihna dingun pawtsak in, LALPA’n a tii.

²Chun, na pawtsak phal loh chun chuh ngaiin, na gam chengcheng hi ukeng a gawt ding ka hi.

³Nile lui chuh ukeng in dim intin, ziehaw chuh na In ah hunglut to untin, na kuolna indan haw ah, na zâlkhun haw, na miliente insung haw, na mite lak haw, na thukkhuk haw, na chângthâk mêkna kuong sung haw ah chawm sausau in au.

⁴Tichun, ukeng haw chuh nang leh na mite leh na miliente chung achun chawm kai sausau in au,’ a tii, va ti’n,” a ti a.

⁵Chun, LALPA’n Mosi a hopih a, “Aron kawmah, ‘Na tiengkhut kha luipi chunghaw leh luicha leh tui lampi chung leh dîl chunghaw ah na khut in lam inla Aigupta gamsung ahin ukeng hun um sak hen,’ ti’n,” a ti a.

⁶Khutichun, Aron chun Aigupta gama lui chunghaw achun a khut a zak a; tichun ukeng haw chuh a hung pawt u a, Aigupta gam a dâp suok tau a.

⁷Himahleh, mitvaidawi thiem haw chun le a dawi un khutibang chun a hun hih u a, Aigupta gam achun ukeng haw chuh a hun pawtsak u a.

⁸Khutichun Pharao’n Mosi leh Aron chuh a sap saka a, a kawm u ah, “Kei leh ka mite kawm apat ukeng hi lamang dingin LALPA kawmah ngên tiem u; tichun, LALPA kawma na kithawih theihna dingun mihaw hi pawtsak ing ka,” a ti a.

⁹Chun, Mosi chun Pharaoh kawmah, “Nangin zie limbawlna hih chang zaw leh chin ahi puoh die; na kawm apat leh na In apat a ukeng haw hihmang a a um a, Nile luipi mai a a umna dingun, nangmah leh na suokte leh na mite a dingin bangtik leh ahim ka hun nget sak ding?” a ti a.

¹⁰Chun, amah chun, “Zing a ding in hi hen,” a ti a. Mosi chun, “Na thu bang chun hi hen; tichun LALPA ka Pathien uh tawbang himhim hi kuomah a um puoi tih he’n la,

¹¹Chun, ukeng haw chun nang leh na Inhaw leh na suokte leh na mite chuh pawtdawk san vek untin, Nile lui mai achun um ta’n au,” a ti a.

¹²Tichun, Mosi leh Aron chuh Pharaoh kawm apat chun a pawt tau a; chun, Mosi chun Pharaoh chunga ukeng a hun lênsak chungchâng thu achun LALPA kawmah a ngên a.

¹³Chun, LALPA chun Mosi thu bang chun a hih a; insung haw ah, In huongsung haw leh lo a ukeng haw chuh a thi zo vek tau a.

¹⁴Chun, a luokkhawm u a, a sieh vum vel vul mai u a; tichun a gam chuh a uih in a uih ta a.

¹⁵Himahlele, Pharaoh chun ukeng chuh a bei tai tih a het phet chun a lungthim a sukhauh a, tichun a thuu a zawp nuom ta puoh a; LALPA’n a gen tâksa guol khan.

¹⁶Chun, LALPA’n Mosi a hopih a, Aron kawmah, “Na tiengkhut kha lam inla, lei a leivui hi zêp in, Aigupta gamsung a leivui cheng hi hik a hung suok theihna dingun, ti’n,” a ti a.

¹⁷Chun, Aron chun a tiengkhut chuh a khut in a vak lama, chun, leia leivui chuh a vak zêp a, chun, mihing chunghaw leh sa chunghaw achun hik chuh a um mulmul zieng ta a; Aigupta gamsung a leivui chuh hik a suok zo ta a.

¹⁸Mitvaidawi thiem haw chun le a dawi un hik umsak a guou a, himahlele a hihthei puou a. Mun tin achun hik chuh a um mulmul zieng ta a.

¹⁹Khutichun mitvaidawi thiemte chun Pharaoh kawmah, “Ziehi Pathien thilhih ngêi ahi hi,” a tiu a. Himahleh, Pharaoh lungthim chuh sukkhauh in a um a, a thuu chuh a ngaitha nuom puoh a; LALPA’n Mosi leh Aron kawma a na gen tâksa guol khan.

²⁰Chun, LALPA’n Mosi kawmah, “Zingkal matak in tho inla, Pharaoh luipi a hungsuk chuh va kimuhpih inla, a kawmah, ‘LALPA’n, ka mite hin ei ho theihna dingun pawtsak in.

²¹Khutilo a ka mite na pawtsak phal loh chun chuh, ngaitie, nang leh na suokte, chun, na mite chung leh, na insung haw achun tho tamtak hun sawl ing ka ting; tichun, Aigupta mite Inhaw leh a chênnau lei chengcheng chu le tho ngawnin dim ina.

²²Chun, zie ni chuleh ka mite umna Gosen gam chuh khenchuom ing ka ting, zie chun tho himhim um puo’n a; tichun, lei chung ahin kei hi LALPA chuh ka hi tih hun hethei in lau.

²³Chun, ka mite leh na mite chuh khenchuom ing ka ting; zing leh zie tiemtehna hi hung um ding ahi, a tii,’ ti’n gen ah,” a ti a.

²⁴LALPA’n khutibang chun a hih a; tichun Pharaoh In leh, a miliente In leh Aigupta gamsung cheng achun tho hawnpi a hunglut u a; tho tamtak chun gam chuh a hihsie tau a.

²⁵Chun, Pharao’n Mosi leh Aron a sap saka, a kawm u ah, “Chieh tau inla, zie gamsung ahin na Pathien kawm u achun va kithawi mai tau in,” a ti a.

²⁶Chun, Mosi chun, “Khutibanga hih chuh dik puo’n a; Aigupta mite’n thienglo a tih teu chun LALPA ka Pathien kawm u a va kithawi ding ka hih ziekun; Aigupta mite mitmuh ahin thienglo a tih teu a chuh ka kithawih u chun suongin ei sep mai ding ahiu hi.

²⁷Thalek ni thum lam achun va chieh ka ting un, LALPA ka Pathien un hih dinga ei piek bang bangin a kawmah va kithawi ing kau,” a ti a.

²⁸Chun, Pharaoh chun, “Thalek a LALPA na Pathien kawm u a na va kithawih theihna dingun hun sawl ta veng ka ti leh; mahleh na chieh gamlat loh ding uh ahi; kei a dingin nei ngetsak in,” a ti a.

²⁹Chun, Mosi chun, “Ngaitie, na kawm apat hin pawt ding ka hi a, zinga Pharaoh leh a suokte leh a mite chuh tho in a pawtsan theihna dingun LALPA kawmah ngên ing ka; mahleh, mite LALPA kawma a kithawih u chuh Pharaoh hin phal lo in, lepbawl kit ta hiel kihen,” a ti a.

³⁰Tichun, Mosi chuh Pharaoh kawm apat in a pawt a, tichun LALPA kawmah a ngên ta a.

³¹Chun, LALPA’n Mosi nget bang tak chun a hih ta a; tichun Pharaoh leh a suokte kawm apat leh, a mite kawm apat chun tho hawnpi chuh a subei ta a; khat chale a um ta puoh a.

³²Himahleh Pharaoh chun zie chung hinle a lungthim chuh a hihkhauh kit a, tichun a mite chuh a pawtsak nuom diek puoh a.