Read Gangte JOB 10 Bible Online

JOB 10 - Gangte bible

JOB 10

¹Ka tha’n ka hinna hi a chimchâk a, Ka nawpchin in phunchiek ing ka; Lunggil na mah mah kawmin pau ding ka hi.

²Pathien kawmah hiti hin gen ing ka: Ei thiemmawh ki’n, nei deihlohna ei hilh zaw’n.

³Na khut nasep muhsit a, minunsiete lemguotna kipahpih chuh nang ngaih a thilpha ahim?

⁴Nang chun phehlevo mitte hi nei in, Ahihloh leh mihingte et bangin na en a ahim?

⁵Na nite chuh mihiemte ni bang ahi a ahim? A hihloh leh na kumte chule mihing kum bang hi ahi a ahim?

⁶Khutia ka manlohna te na kansui ten a, Ka gitlohna te le na hawl mai sek?

⁷Migilo ka hi puoi tih he mahleh chun, Na khut a kipata ei hukdawk thei ding kuomah a um puou hi.

⁸Nangmah khut ngêi in nei guonggalh a, nei siem zo kêi a, Ahinla nangmah in nei taihsana nei suksiet hi.

⁹Zie hi hezing in, ka hun nget na hi, nangin tung a pat in nei siem a; Leivui ei suok sak kit ding na him?

¹⁰Nangin bâwngnawi tui bangin nei sung dawka, Bâwngnawi khal bangin nei mêk khawm hilo ahim?

¹¹Vun leh pheh in nei tuom a, Guh leh thaguite’n nei kankhawm a,

¹²Nangin hinna leh deihsakna nei pie a, Nei etkawlna chun ka hinna hi nei ven sak a,

¹³Mahleh ziehaw hi na lunggil in na selgu a, Nangmah ah ziehi a um hi tih ka hêi.

¹⁴Ka na gitloh chun nangin nei melchik a, Ka manlohna apat chun thiem nei chansak kha puoi.

¹⁵Mi nunsie a na hi leng ka chung gik in a, Mi kitûp hi leng, ka lu dawmsang diek puo’ng ka; Zahhuoi sie kêi ka hi a, ka thuokna haw hi na mu ngâla.

¹⁶Ngaitie, sakeibaknei guolin nei hawl a; Ka chungah mak tak mai in na ki-etsak kit a.

¹⁷Ka chunga na thu hete chuh na hun hih thak kit a, Ka chungah na lungnatna na supung a. Kidona thak dang dang na hun pandawk a.

¹⁸Bang zieka sûl apat a nei lâkdawk ahim? Kuomah ei muh masang in a na thi hita leng aw!

¹⁹Ana umlo bang mai hi hengla, Sûl apat in thâna lâkmang a um ana himai leng.

²⁰Ka hinkhuo hi a bei vang ta hilo maw? Kei mai in ei taihsan in la, Ka hun um nalai cha hi chawmcha bêk nuom taka ka mat theihna dingin.

²¹Vaihkit tâk lohna ding muna ka chieh ma hin, Thimna leh thihna dailîm gama ka chieh ma hin,

²²Thimna gam, a thima thim, thihna lim leh buoina, vak nasan le thim a channa gama chun.