Read Gangte JOB 11 Bible Online

JOB 11 - Gangte bible

JOB 11

¹Tichun, Zophar Naamath mi chun a dawng a, hiti hin a gen a:

²Thu hiti lâwm lâwm hi dâwn loh theih ahi dem? Mi kamtam in thiem a chang dem?

³Na zuou thugen hin mi a suthip dinga ahim? Bangmah salo a na nuihsan hin mi’n hun suzakcha lo ding maw?

⁴Ka gindan hi a dik a, Pathien mitmuh in ka thieng hi, na ti ngâl a.

⁵Mahleh, Pathien chuh hung pau mah hen, Na chungah a kam hun ka tiem he;

⁶Tichun, chitna thuguk hun hilh hen, Hetna hau tak ahi ngâl a, Pathien chun na manlohna sanga tawm zaw’n a hun din ahi tih he’n.

⁷Hawl thawh in Pathien thuguk thuk dân te chuh na mudawk theia ahim? Chungnung pên Pathien lopina leh a thilhih dante na mudawk zo dinga ahim?

⁸Van sanga sangzaw ahi a, nangin banga na lawh theih ding? Sheol sanga thuk zaw ahi a, nangin banga na het theih ding?

⁹A sauh dân tehna chuh lei sangin a sau zaw a, Tuisuohgiet sangin a thuk zawi.

¹⁰Amah chuh hung henla, vaihawmna ângah hun pui leh, Kuo a nang thei ding?

¹¹Mi dukdaklo chuh a he ngâl a, A manlohnau le a mu a, ngaihtuoh lo ding ahim?

¹²Gam sabiltungno mihing a a pien tieng leh, Mingawl chun hethiem hâm ina.

¹³Na lunggil na kawih dik a ahih chun, Amah lam ah na bân zak ding na hi.

¹⁴Na khuta thulimlohna a na um chun, kawihmang kêi inla, na puon-In ah nunsietna chêng kihen.

¹⁵Tichun thawnlo in na mai chuh demna um lo in dâk dawk inla, Ahi, bit takin um in na tin, lau puo’n la;

¹⁶Na gimtheih thuok chuh hengilh in na tin, Tui luong mangsa bang phetin he ta’n la.

¹⁷Na hinna chuh sun lai sangin hung vak zaw’n tin, athimna um mahlele zingkal bang hung hi’n a.

¹⁸Kinepna a um tâk ziekin muong takin um ding na hi, venbit in um in na tin, muong takin châwl inla.

¹⁹Kuol in na tin, kuoma’n hun sulau puo’n tin; Mi tamtakin nang chuh hun deihsak un au.

²⁰Mahleh, mi dukdaklo mit chuh lawhsam intin, Taihdawk na lampi himhim nei puo’n au, A kinepnau tawppen chuh thihna hungtung ding chuh ahi.