Read Gangte JOB 12 Bible Online

JOB 12 - Gangte bible

JOB 12

¹Tichun, Job chun a dâwng a, hiti hin a gena:

²Ginlah umlo hielin miching vang chuh na hiu hi, Na chitnau tawh thi khawm ding na hiu.

³Mahleh nang haw bangin hetna ka nei sâm a, Na lak u ah ka neu chuom diek puoi, zie tawbang na thu gen cheng cheng teu chuh micheng in a heu a puo.

⁴Ka guolte nuihzatbuk mai ka hi a, Diktat tak leh demna bei himahleng mite simmawh leh nuihsan a um ka hi a, Himahleh Pathien in ka pauchamna a dâwn ni hung tung ngêi ina.

⁵Mi nuomsa lungthim achun vangsie muhsitna a um a, a kalsuon uh teu te dingin kisazo sa’n a um hi.

⁶Suommangte puon-In a lawhting a, Pathien sulungna te chuh bit takin a um u a; A khut u ah pathien in tamtak a kawih sek hi.

⁷Himahlele ganchate nasan vak dawng tie, hun hilh in au. Chung leng vachate le dawng inla, hun na hilh in au.

⁸A hihloh leh leia thilsiemte kawm achun gen inla, hun sinsak in au, Luipi ngate chun na kawmah phuong in au.

⁹“LALPA khut chun ziehi ahih ahi ngâla,” tih hi, na lak u ah kuo a a hekha lo?

¹⁰A khut achun hinna nei chengcheng hinna a um a, Mihiemte hinna hile a khuta um ahi.

¹¹Bil hin thu haw chuh a phawchien puoh a ahim, Kam in nek ding lim tak a tep nawp bang hin?

¹²Teksiete kawmah chitna a um a, Himahleh Pathien chun chitna leh thilhih theihna a nei ahi.

¹³A kawmah chitna leh hatna a um a, Lemhetna leh hetthiemna a nei a.

¹⁴Ngaitie, ama’n a phiet chun, kuoma’n a sakit thei puou hi. Mi a khakkhum chun, kuoma’n a hawng thei puou hi.

¹⁵Ngaitie, Pathien in guoh a zuk sak loh tieng leh khuo a khal a, Tui a thahdawk tieng leh lei a chap suok sek hi.

¹⁶Pathien kawmah hatna leh chitna a um a, Thepa um leh mi thempa chule amah khuta um ahi.

¹⁷Lemguot thiemte chuh ngawnchang in a puimang a, Vaihawm thiemte chuh a sungawl ta a.

¹⁸Lengte puon chuh a phel sak a, A kawngteu chuh kâwnggak in a gâk sak a.

¹⁹Amah chun thiempute chuh ngawnchang in a puimang a, Mihatte chuh a paih tha a.

²⁰Mi ginchak umte thugen haw chuh a suthip a, Upate hetthiemna haw chu le a la mang a.

²¹Mi liente chungah muhsitna a sungbuo a, Mihatte taigakna a phel sak a.

²²Thimnuoi thuk taka umte chuh a mudawk a, chun, thihna lîm chuh vak ah a ladawk a.

²³Namte chuh a hihpung a, a subei zel a. Namte chuh a hihlien a, tichun, amau haw chuh a puimang zel a.

²⁴Leichung a lawiupate ngaihtuohna chuh a lamang a, tichun, lampi umlohna gamthip ah a vak chatvaih sak a.

²⁵Thimlak achun vak beiin a kimai viel u a, amau chuh zukham bang mai in a lawn duoi duoi sak hi.