Read Gangte JOB 13 Bible Online

JOB 13 - Gangte bible

JOB 13

¹Ngaitie, ziehaw chengcheng hi ka mit in a mu a, Ka bil in a za a, a hethiem suok kêi hi.

²Na het bang bang u chuh ken le ka he a, Nang haw sangin ka niem chuom puoi.

³Mahleh, ka thu chuh Bangakai hihtheipa kawma gen ka nuom a, Pathien tawh kiniel nuom ka hi.

⁴Nang haw, zuou phuokkawmte na hiu a, Na bawn un daktor, phatchuomna bei tawbang na hiu hi.

⁵Na bawn u chun thipkêi in um mai leu chun aw, zie chuh na chitnau hizaw ding hi ven.

⁶Ka chungchâng ka sut lai hin ngaithau inla, Ka ngetna kamsuok a hin bil dawh un.

⁷Pathien kawmah diklo taka thu gen in, amah chanchin chuh lepchieh taka gen ding na hiu em?

⁸Amah lam ah deihsak chuom nei ding na hiu maw? Pathien a dingin na sik gen thei ding um?

⁹Pathien in guntak in hun enchien leh nang u dingin a pha na dem? Mihiem ngawl bawl guolin Pathien na ngawl bawl thei ding a ahim?

¹⁰A gûka deihchuom na neih ngêi ngêi u chun, Amah chun matheilo in hun hilhgaih ngêi ngêi in a.

¹¹A phatbukimna chun hun sulau in, A lauh-umna chuh na chung u ah kie lo ding maw?

¹²Na thu gosiehteu chuh vut tawbang ahi a, Na taksa chuh bellei tung tawbang mai ahi.

¹³Thip unla genna ding hun ei pie tiem u, Ka chunga hin a tung ding ding chuh bang hitaleh tung mai hen.

¹⁴Ka taksa hi ka ha’n pet ing ka ting, Ka hinna hi ka khuta kawih mai ding ka him?

¹⁵Ngaitie, ei hihlum hiel lele, amah chuh taksang zing ing ka, Mahleh a masang achun ka lampi chuh panpih zing ing ka.

¹⁶Amah chuh ka hukdamna ding chuh ahi a, A masanga chun mi lepchieh te chuh hung lo ding ahiu hi.

¹⁷Ka thugen hi gunchuh takin ngaithau inla, Ka thu phuondawk hi na bil u ah lut hen.

¹⁸Ngaitie, tuhin ka chungchâng thu ka siem tup ta a, Thiemchang ding ka hi tih ka hêi.

¹⁹Thiemmawh ei chan dinga hung na hi maw? Khuti ahih chun, thip ing ka ting, thi ding ka hi.

²⁰Ka chungah thil nih ka nget ei phalsak phawt inla, Tichun, na ma a kipatin kisel mang puo’ng ka;

²¹Kei apat in na khut chuh nung zuk inla, tichun, na tizatumna hin ei sulau kihen.

²²Tichun, ei sam in la, hun dâwng ing ka, A hihloh leh ken gen ing ka ting, nangin ei dâwng in.

²³Ka manlohna leh ka gitlohnate hi bang tawbanga tam ahim? Ka sukkhelhna leh ka gitlohna ei hetsak in.

²⁴Bang zieka na mel sel a? Na melma banga ei ngai na him?

²⁵Huih in thingnah a mût lîng chuh na lau a, buhsi huih mût chuh delh ding na him?

²⁶Ka chungah na takin na hih a, Ka tanglak lai manlohnate nei puok sak a.

²⁷Ka keng ah kawl nei buh sak a, Ka chieh na chengcheng na en thim a, Ka nieknung nasan na en chien a.

²⁸Thil muot mang mai thei bang leh, Silhlechen, nget in a nek tawbang phet ka hi ta a.