Read Gangte JOB 14 Bible Online

JOB 14 - Gangte bible

JOB 14

¹Numei hin thâk, thithei mihing chuh, Sawtlocha dam, buoina a dim ahi.

²Pakcha bangin a hung pak a, a vuoi kit a, Lîm bangin a mang kit pai sek hi.

³Khutibang mi chunga chun na mit na hak in, Vaihawmna a na kawm achun nei puih ahim?

⁴Kuo ahi thil thienglo apat a thil thieng ladawk thei? Kuoma’n a ladawk thei puou hi.

⁵A nite chuh na guotsa ahi a, a tha zah chule na kawmah a um a, A khel theih loh dingin gamgi chuh na zam ta a.

⁶Kiheimang san inla, a chawlh theihna dingin, Kithalawh guola a nite chuh lung-awi taka a mat zawh theih na dingin.

⁷Thing a dinga kinepna chuh phuk paih hilele sel kit ina, A selthak chuh châwl zieng lo ding ahi ngâla.

⁸Leia a zung chuh hung upa mahleh, Abul chuh lei chin ah thi mahlele;

⁹Tui ziek chun hung sel kit intin, Thil phuh no thak bangin hung dâwn thak kit ina.

¹⁰Mahleh mihing thithei te chuh a hat a tâwp a, nuoi lam a kawih in a um u a, Mihing chuh a thi a, aleh, khawia um ahi tau hi le?

¹¹Tuipi apat in tui a luong mang a, Tuipi chuh a kang a, a hung gaw a;

¹²Khutibang chun mite chuh a thiu a, a thokit ta puou hi, Vante a beih ma chun hung khanglo puou in tin; A ihmut u chuh kaihthawh hi diek puo’n au.

¹³Aw Sheol a chun ei na selgu hi ta leh chin, Na lungnat haih macheng chun ei selgu mai in, Hunbi ei guot sak in, ei hezing ding na hi a.

¹⁴Mi chuh a thih tâk chun, a hing kit dinga ahim? Ka nasep sung cheng chun ngak ing ka ting, zie buoina hun sung hi a beih macheng in.

¹⁵Ei sam inla, hun dâwng ing ka; Na khut nasep na ngaina a.

¹⁶Mahleh nangin ka kalsuonte na entha a, Ka gitlohna na suizui puoh a ahim?

¹⁷Ka sukkhelhna chuh dip a khuihkhum ahi a, Ka manlohna na khui khawm a.

¹⁸Himahleh, tânghaw chuh chim in a nêl zo ta a, Suongpi chuh a muna pat chawn ahi a;

¹⁹Tui chun suonghaw chuh a tawkmang a, Tui lien chun lei pîlnel chuh a tawkmang a; Zie tawbang chun mihingte kinepna chuh na sumang a.

²⁰Amau chuh kumkhuo’n na zo zinga, a chieh mang u a, a mel na suzatchuom a, na sawlmang ta a.

²¹A chateu chuh limbawl na a chang u a, a he puoh a; Sukniem in a um u a, a he diek puoi.

²²A taksa natna mai chuh a he hâm a, a thagau in amah a sun a.