Read Gangte JOB 15 Bible Online

JOB 15 - Gangte bible

JOB 15

¹Tichun, Eliphaz, Teman mi chun hiti hin a dawng a:

²Miching in hetna thâwn mang in a dawng in, Suohlam huih in a gil a suvah dinga ahim?

³Holimna, phachuom lo mang in ahim, Thugen, mattakna neilo mang in ahim a gen ding?

⁴Ahi, Pathien lauhna chuh na nawhmang a, Pathien masanga pauchamna chuh na dal a.

⁵Na manlohna chuh na thugen chun a kichien a, Chit gukhahna pau na tel zawk ahi hi.

⁶Kei, hilo in, nangmah paukam ngêi in a hun thiemmawh na hi, Ahi, na mûk ngêi in a hun hêk na hi.

⁷Mihing a pieng masapen na hi a ahim? A hihloh leh tânghaw um ma’n na pieng ta’m?

⁸Pathien thuguk chuh na zakha ta a ahim? Chun, chitna chuh nanga tâwp dinga na kawih ahim?

⁹Ka hetloh uh banga na het chuom diek? Ka hetthiem loh uh banga na hetthiem diek?

¹⁰Luchang a kelsam kek ta te leh upa tak takte, Na pa sanga upa zawte I kawm u ah a um ui.

¹¹Nang dingin Pathien thamuonna hi a neu taluo a ahim? Nem taka a hun hihna thu hih?

¹²Bangati a na lunggil in a hun puihmang mai na him? Bangati a na mit phe lup lup na him?

¹³Pathien chungah na lunggil chuh na heimang sak a, Na kama zie bang thu phet na pawt sak mai kha?

¹⁴Mihingte hi a thiengtho thei tak taka ahim? Numei hinthak mihingte hi Pathien masang ah a diktat theia ahim?

¹⁵Ngaitie, Pathien in a vânsâwlchâkte chungah ginna a nga puoh a, A mitmuh a chun le a thiengtho diek puou hi.

¹⁶Mi kihdak-um leh buoksa, manlohna tui banga dâwn chuh kihdak a um zawsem na ding e.

¹⁷Ei ngaitha’n la, hun etsak ing ka, Ka muh chuh phuongdawk ding ka hi.

¹⁸Mi chingte’n a pulepateu a kipata a muh u chuh, A îm kha puou hi,

¹⁹Amau kieng chauh ah lei pumpi hi piek in a um a, chun, malzin kuomah a lak u ah a vakviel puou hi.

²⁰Mi nunsie chun a damsung cheng chun gimtheihna thuok intin; mi ningkhelte’n kum tunga a thuok ding u chuh thuok ina.

²¹Thawm lauh-um chuh a bil ah lut intin, A hauhsakna chuh suommangte chun hun hihsie’n a.

²²Thim a pata pawtdawk a kigingcha puoh a, Amau chuh chemzâm a ding mai ahiu.

²³Nek ding hawl in gamtin ah a vak viel viel u a, “Khawia um ahim” ti’n, A masang ah thimna hungtung ding ahi tih a he ngâl u a.

²⁴Gimtheihna leh lungkhamna te chun a sulau a, galdo dinga kisa leng guolin amah chuh kituokpih ding ahi;

²⁵Pathien do in a khut a zak a, Bangakai hihtheipa chunga uong taka a tawih ziekin.

²⁶Genhak takin amah kalh lam in a tai a, A phaw sah leulo chu tawh a do a.

²⁷Aziek chuh a thau chun a mai a khuh a, A kâwng achun thau a khawl khawm a;

²⁸Khawpi hawmsa haw achun a chêng a, Kuomah luoh loh Inhaw leh ni’n paihna dinga kisiem haw achun.

²⁹Hausa puo’n tin, a sumlepai chu le um den diek puo’n a, A hauhsaknau chun lei ah zung khawh diek puo’n a.

³⁰Thim apat in suokcha puo’n tin, Meikuong in a baksamte chuh lieu gaw’n tin, A pakte chuh huih in mût mang in a.

³¹Amah leh amah kithem in, bangmahlo ah kinga kihen, A hawmngawn a ditthuk a um ding ahi ngâl u a.

³²A hun ting lo in a butinga piek hiu intin, A bâk chuh hing diek puo’n a.

³³Grep gui bangin a gah chuh a siel in hawt pulh untin, olive thing bangin a pak chuh pulh ina.

³⁴Pathien ngaihsak lote kivawpkhawmna chuh gahsuoh puo’n tin, Gawlhgukna puon-In te chuh mei in ka-tum in a.

³⁵Thil gilo a ngaihtuoh u a, Gitlohna a hun puodawk u a, A lungthim u chuh mi thêm dingin a kisazo zing hi.