Read Gangte JOB 16 Bible Online

JOB 16 - Gangte bible

JOB 16

¹Chun, Job chun hiti hin a dâwng a:

²Khutibang thil chuh tamtak ka na za ta a, thamuontu chimchâk um tak na hiu hi.

³Thu mantheihlo a holim zing ding na him? A hihloh leh, bangin a hun chawktho a na vak dâwn ahim?

⁴Ken le na gen bang u chun gen thei ing ka, Ka dinmun ahin ding leu chin, Na chung u ah thu nasatak in gen thei ing ka ting, Luchang hun thinkhum thei ing ka.

⁵Mahleh ka kam in hun tîlkhoh thei ing ka ting, Ka mûk a lungmuonna thu hin na thawkgimna hun hehnem ding ka hi.

⁶Gen lengle ka lungkhamna bei diek puo’n tin, Thip lengle chawldam diek puo’ng ka,

⁷Adik takin, Pathien in ei suchau a, Ka guolte cheng le ei nawhmang sak ahi.

⁸Amah chun ei sulauthawng a, Vun leh guh mai ka hi ta a, Zie chuh mipite’n ka gitlohna phawtchetna’n a ngai ui.

⁹A lungnat ziekin ei bawttel a, ei mudah a, a ha ei gawih khum a, ka melma chun mudah takin ei mitchangsal a.

¹⁰Amau chun ka chungah a kam uh a kau a, Musit takin ka bieng ah ei bêng u a, Ka chung thu ah a kisam khawm u a.

¹¹Pathien in Pathien helote khut ah ei pie dawka, Mi nunsiete khut achun ei paih lut a.

¹²Nuomsa takin ka um a, amah chun phel nih ei suoh a, ka ngâwng in ei man a, ei sep nêl dimdem ta a: A thiltup ding chun ei tungdawk ta a.

¹³A thalpi kâpte chun ei ûmkimvel u a, zahngaihna bei hielin ka kalte chuh a âtkek a; ka thinkha chuh lei ah a sungtha a.

¹⁴Avel a velin ei suliem a, Mi hangsan bangin ei chil diek diek a.

¹⁵Ka vun chungah saidippuon ka belh a, ka hatna chuh tuol ah ka paih tha ta a.

¹⁶Ka mai chuh kahna’n a san zo ta a, Ka mit gei chula a dup zo ta a;

¹⁷Mahleh, ka khut ah pawngbawlna a um puoh a, ka pauchamna chuh a thiengtho zing hi.

¹⁸Aw leisiet, ka thisan chuh khuhmang ki’n la, Ka kahna hin chawlhmun nei kihen.

¹⁹Tuhin le adik takin, ei hetpih chuh van ah a um a, Ei gensak pa chuh van chung sang ah a um hi.

²⁰Ka guolte chun ei nuihsan u a, Mahleh, ka mita mitthitui te hi Pathien lam zuon in a luong hi.

²¹Mihing in a invengte a panpih bangin amah chun Pathien kawmah ei gensak le aw!

²²Kum tam lo cha sungin, Ka vaihkit lohna ding lampi a chu chieh ding ka hi ngâl a.