Read Gangte JOB 17 Bible Online

JOB 17 - Gangte bible

JOB 17

¹Ka thagau chuh a suksiet ahi ta a, ka nite chuh a bei ta a, Ka thân chuh siem zawh ahi tai.

²Ei ênghote chun ei ûmkimvel u a, ei nuihsante chuh lungna takin ka en a,

³Nangmah ngêi in ka kieng ah thutiem bawl in. Ka thugen ei panpih ding kuo ahi?

⁴Hetthiemna apat a lunggil uh na khâk a, Zieziekchun amau haw chuh guolzawh sak lo ding na hi.

⁵Lawkna dinga a guolte thahthampa chuh, A chate chun le thuok têi in au.

⁶Zie thu chun mite holimna mai dingin ei siem a, Kei chuh mi chil sietkhum mai ka hung hita hi.

⁷Lungkhamna ziekin ka mit le a thim zo ta a, Ka taksa bâk chengcheng hi lîm bang phet a hung hi tai.

⁸Mi lamzang takte chun ziehi mak a sau a, Pathien neilo bang phetin ei thiemmawh u a.

⁹Hilele, mi kitûp chun a lampi ngei a tu zing sek a, Kuole khut thiengtho nei chuh hât deuh deuh in a.

¹⁰Na bawn un hung unla, ka masangah hung ding un, Na lak u ah miching mu diek puo’ng ka,

¹¹Ka nite a chieh mang zo ta a, ka thil guonggalh te a thâwn zo tai, Ka lunggil a ka duhthusam te ngêi chuh.

¹²Zan chuh sun a suok sak a, Vak chun thim a naih hi, a tiu a.

¹³Sheol chuh ka In guola ka et a, Thim lak ah ka zâlkhun ka dawh a,

¹⁴Sietna kawmah, ka pa na hi, ka ti a, Lungmul chuh ka nu ahim ka suohpihnu ahim ka tih chun,

¹⁵Ka kinepna chuh khawitaka um ahi die? Ka kinepna chuh kuo’n a mu ta die?

¹⁶Sheol achun chieh suk ing ka ting, Leivui achun kum suk khawm talo ding ka hiu hi?