Read Gangte JOB 18 Bible Online

JOB 18 - Gangte bible

JOB 18

¹Tichun Bildad, Shuhi mi chun a dawng a, hiti hin a gena:

²Bang chan ahim thu lemchâng na hawl zing ding uh? Ngaihtuoh unla, zie zawh chuleh gen ing ka.

³Bangti dana gancha guol pheta ngaih ka hiu hi? Bang zieka na mitmuha kihdak-um ka hiu hi?

⁴Nang mah leh nang mah na lungnatna a kisuthangtawmpa, Nang lungnat ziek hin leisiet hi taihmangsan ahi dinga ahim? Ahih loh leh, suongpi le a mun u apat in chawnmang ahi ding u a ahim?

⁵Ahi, mi nunsie vak chuh sukmit hi’n tin, A meikuong un le salhvak puo’n a.

⁶A puon-In u a vak chuh thim intin, A kawma thaumei chuh sukmit hi’n a.

⁷A kalsuon hatna chuh sukchawm hi’n tin, A lemguotna ngêi in paih thak hi’n a.

⁸Amau keng ngêi in lên sung ah a paih lut a, Thâng chung a chun a chieh hi.

⁹A siekbawm u achun thang ah a âwk u a, thang achun a âwk sek ui.

¹⁰Thângkuol chuh amah dingin leia selguk ahi a, Lampi achun amah dingin thâng kam ahi.

¹¹Ning tin ah lauhna’n sulau intin, A khawtalzum chuh tawhzui in a.

¹²A hatna chuh sawlsam vei intin, Sietna chun a kawmah ngak zing in a.

¹³Avun chuh natna hik in ne zo intin, Thihna nautil chun nget guolin a khut leh kengte chuh ne zo in a.

¹⁴A kimuonpih puon-In apat chun kalhdawk hi’n tin, Thihna leng kawmah puih in um in a.

¹⁵A puon-In achun bangmah um puo’n tin, A chênna achun mei leh kât thehzak hi’n a.

¹⁶A nuoilam a a zungte chu gaw’n tin, Chunglama a bâkte chu le vuoi in a.

¹⁷Lei chunga hetzingna chuh bei intin, kawtthêl achun amin kigen ta puo’n a.

¹⁸Vak apat in thimna ah nawhlut hi’n tin, khawvel a pata delhdawk hi’n a.

¹⁹A mite lak ah tu leh cha nei puo’n tin, A chênna a nutsieh ding le nei diek puo’n a.

²⁰Tumlam a mite chun a sietna chuh maksau in tin, suohlam mite chule tizat na’n dim un au.

²¹Mi nunsiete thil tuok chuh khutibang chuh ahi him a, Zie chuh Pathien helote chanmun chuh ahi.