Read Gangte JOB 19 Bible Online

JOB 19 - Gangte bible

JOB 19

¹Chun, Job chun a dâwng a, hiti hin a ti a:

²Bang chan ahim nei sukgimtheih a, Thu haw a chuh nei gawih nêl ding chuh?

³Sawm vei hiel nei demsie ta a, Phalo taka ka chunga na hih hi na zakcha puo maw?

⁴Diklo ana hita mawng leng le, Ka diklohna chuh keimah a hin um in a.

⁵Kei ei dona a kilimbawl na hih u a, Ka buoina hi ka gitloh ziek a ngai na hih u chun,

⁶Zie chuh Pathien thilhih ahi tih mu thei lo na hiu em? Ei matna dinga thâng a kam ahi.

⁷Ngaitiem u, “Pawngbawlna,” ti’n ka kiko dawk a, Mahleh dâwn in ka um diek puoh a, Ngeihtak in ka kiko a, himahleh, diktatna a um puoi.

⁸Amah chun ka lampi ah dai a kai a, ka chieh pai thei puoi, Ka lampite chuh thimlak ah a chieh saka.

⁹Ka lopina te chuh ei lipthâk sak a, Ka luchang apat in lallukhuk chuh a lamang a.

¹⁰Ning tin ah ei hihsie a, kei chuh ka beimang ta a; Ka kinepna chuh thing bangin a bawt dawk a.

¹¹Ka chunga a lungnatna chuh a hih ko a, A melma bangin ei ngai ta a.

¹²A sepaihhawn a hun sawl a, Kei ei matna dinguh lampi a hun siem u a. Ka puon-In vel ah panmun a guonggalh u a.

¹³Ka inkawte cheng chuh kei apat in gamla tak ah a kawih a, Ka melhette cheng chuh kei apat in a kikiengkawih zo tau a.

¹⁴Ka inkawte leh ka behte chun la ei ngaihsak ta puou a, Ka melhet te’n ei hengilh zo tau hi.

¹⁵Ka ina chêngte leh ka In a suok nungakte’n, Malzin bangin ei ngai tau a, A mitmuh u ah melhet loh ka hi tai.

¹⁶Ka suokte ka sama, ei dâwng ta puou a, Ei panpih dinga ka sap nasan in le ei dâwng ta puou hi.

¹⁷Ka zi ding chun ka gim alim ta puoh a, Ka pienpihte ngêi chun le ei naih nuom ta puou hi.

¹⁸Naupangte nasan in ei musit u a, ka thawhdawk cheng leh ei nuihsan tau a.

¹⁹Ka guolpha chengcheng te’n ei kihdak u a, Ka lungsiet pente chun ei kiheimang san tau hi.

²⁰Ka guh hi ka vun leh ka pheh ah a bek chak kêi a, ka havun tawh suokcha hâm hâm ka hi.

²¹Aw, nanguh ka guolte haw, Ei lungsiet un, ei lungsiet un, Pathien khut in ei khawih ahi hi.

²²Bangati a Pathien guol a nei delhzui uh a, Nei sukgimtheihnau hi hun sa nailo na hiu maw?

²³Ka thute hi zik thak hi henla, Lehkhabu a zik thak hi leh ka nuom na mai zên e aw!

²⁴A hihloh leh ka thute hi thik a suong chung a zik a, Kumlekhuo a dinga suong a zik hileh.

²⁵Ei tanpa chuh a hing hi tih ka he ngâl a, ni tâwp ni leh lei chung ahin hung ding kit ding ahi ngâl a,

²⁶Ka vun hi sukmangthai a a um nung in le, Ka taksa ngêi hin Pathien chuh hun mu ding ka hi.

²⁷Amah chuh ka kawm ngêi ah mu ta’ng ka ting, Ka mit in mu ta’n tin, mi dang chuh en puo’ng ka, Ka sung ahin ka lunggil hi a chau hiel tai.

²⁸“Bangti’n ahim amah chuh I sukgimtheih ding uh?” Amah chuh thil cheng cheng bulpi ahi ngâla, na tih u chun, paulap na siem uh ahi.

²⁹Chemzâm chuh kihchau in, Vaihawmna a um hi tih na het theihna ding un, lungnatna chun chemzâm a gawtna a tun ngâla.