Read Gangte JOB 21 Bible Online

JOB 21 - Gangte bible

JOB 21

¹Chun, Job chun a dâwng a:

²Ka thugen hi phachuomngai takin ngaitha tiem u, Zie hi na lungmuonna thu chuh hi hen.

³Ei phalsak unla, ken le thu hun gen ing ka, Ka gen zawh tieng leh ei nuihsan na’n lau.

⁴Kei hi mihingte chunga phunchiek ka him? Bang zieka dawhthei taka um thei lo ding ka him?

⁵Ei en unla, mak sau inla, na khut un na kam uh hîm un.

⁶Ka vak ngaihtuoh tieng leh ka lau sek a, ka phehlevo hi a kithing hiel sek hi.

⁷Bangti dana mi nunsiete chuh hing a, têkkûn a dama, tha hatna nasatak nei ahi ding um?

⁸A chateu chuh a mitmuh un a hih det a, A suonteu chuh a maikawk ngêi u achun a um u a.

⁹A In leh lo teu chuh lauhna apat in a bit a, Pathien mawlh chuh a chung u ah a kie puoi.

¹⁰A bâwngchalteu chun suon a nei zing u a, A bâwngpiteu in no ahun nei u a, a no a sie kha puoi.

¹¹A chateu chuh a hawn hawn in a pawt sak u a, A chateu chule a lâm kuolkhum sek ui.

¹²Pêkgit leh kingkang in la a sau a, A châmngai giteu chun a sukipak a.

¹³A niteu chuh lamzang takin a mang u a. Sheol achun lungmuong takin a kum suk sek ui.

¹⁴Chun, Pathien kawmah, “Kei uh ei nusieh in, Na lampi haw het hi ka nuom puou hi,

¹⁵Bangakai hihtheipa chuh bang ahi a, a na ka sep sak ding u chuh, A kawma ka paucham un banga phatchuomna ka muh ding uh?” a tiu a.

¹⁶A hauhsaknau chuh amau sep dawk hilo ahim? Mi nunsie lemguotna chuh ka hawt zawng tak ahi.

¹⁷Mi nunsiete thaumei chuh bang zah vei phet ahim sukmit a a um? A chung u ale sietna a tung mun na lâwm lâwm e! Pathien in a lungnatna’n lungkhamna a hawm guol chiet hi.

¹⁸Amau chuh buhpawl huih in a mût mang tawbang leh, buhsi huihpi’n a mût mang tawbang ahiu hi.

¹⁹Pathien in pate gitlohna chuh a chateu chungah a la zel hi, na tiu a, a hêtchet theih na dingun, kipahman a pie a, chuleh, hechien ina.

²⁰A mau ziek ngêi ahi tih chuh kihet chiet u hen, Bangakai hihtheipa lungnatna chuh het sak in um chiet u hen.

²¹Mi a hinna a bei nung chun, a chate kipah leh kipah loh chuh a ngaihtuoh sek em?

²²Mihiem in Pathien a sinsak thei dem? Dinmun sanga umte le a vaihawm sak a hi ngâl a.

²³Mi chuh a phattheih lai takin a thiu a, Muong tak leh nuomsa taka a um lai in.

²⁴A nawi chuh nawitui in a dima, chuleh, a guhte le theng in a nawm zing hi.

²⁵Midang khat chuh hinkhuo haksa tak leh lungthim na takin a thiu a, thilpha himhim a tep kha puou hi.

²⁶Amau chuh a thi gêl gêl u a, vuih in a um u a, thân in a tuom gêl gêl hi.

²⁷Diklo taka ka chunga na suongtuoh teu chuh ka he vek hi,

²⁸“Tuhin milien haw In chuh khawia um ahi? Minunsie chênna puon-In chuh khawi tak ahim?” na tiu a.

²⁹Lamlien a khuolzin mite chuh na dawng kha puou a ahim? A thugen teu chuh pawm lo na hiu hi?

³⁰Sietna ni achun mi nunsiete chu hawih in a um u a, amau chuh lungnat ni a ding chun sît in a um sek ui.

³¹Mi nunsiete thiemmawh chan sak ding kuomah a um puou a, A thilhih man uh piekit ding kuomah a um ta puou hi.

³²Thân a chiehpih ahih tieng leh, A thân chuh venbit ahi ngâl a.

³³Lui guoma leisiet tang chuh amah dingin lim tak ahi a, Mi cheng chengin a nung ah zui untin, A masanga mi simsenloh a na chiehsate bang khan.

³⁴Tichun, bangti’n ahim thu bangmahlo mai a nei lungmuon theih ding uh? Na dawnnau ahin zuou thu tihloh chuh bangmah a um puoh ngâl a!