Read Gangte JOB 22 Bible Online

JOB 22 - Gangte bible

JOB 22

¹Chun, Teman mi Eliphaz chun hiti hin a dawng a,

²Mihing hih Pathien a dingin a mattak thei dem? Miching pên inle amah a dingin a phatchuomna a nei thei dinga ahim?

³Mi diktat na hih hin Bangakai hihtheipa ding chun kipahna banga um? Ahihloh leh, na lampite demna bei a hihna hin amah dingin lawkna banga um?

⁴Pathien na kihchak ziek hin a hun hilhgaih in, vaihawmna ah a hun tun dinga ahim?

⁵Na nunsiet na a huoisie hilo maw? Na gitloh na chun tâwp a nei puoi.

⁶Bangmahlo in na suohpih kawma pat in kitiemna na la a, Chun, a silhlechen u chuh na hâwk sak a.

⁷Chaute kawm achun tui dâwn ding na pie puoh a, Gilkielte ding chun nek ding na pie puoh a.

⁸Mihat vang chun gam hi a nei a. Mi zahum chuh a sung achun a chêng hi.

⁹Meithaite chuh khutngawn in na sawlmang a, Pa neilote bân chuh na sukbawt saka.

¹⁰Zieziekchun na kimvela chun thâng chuh a um a, chun, lauh na chun thakhata a hun sukbuoi ahi tai.

¹¹Na muh theih loh thimna leh, Tui tamtak chun a hun khuh na hi tai. Van sanga khuh Pathien chuh um in, Aksihaw chuh sang mahleu a hun suk et hilo ahim?

¹²Pathien chuh van chung sang taka um hilo ahim? Aksi sangpen khu entie, bangti banga nasa ahi tau em?

¹³Zieziekchun, “Pathien in banga a het? Thim sah tak in a lieh ngâla bangti’n a thu a tan theih ding?” ti’n na dawng nalai u a.

¹⁴“A muh theih lohna dingin thim sah takin a tuoma, Van chung tawpa khun a vak viel hi,” na ti a.

¹⁵Lampi lui mi nunsiete lampi hawh sek chuh, na zuih guot ahim leh?

¹⁶Amau chuh ahun a tun masang in lâkmang in a um sek ui, a kingaknau chuh tuilien in a tawkmang sek hi.

¹⁷Pathien kawmah, “Kei uh ei taihsan in, Bangakai hihtheipa’n banga ei lawh theih? a tiu a.

¹⁸Khutisa chun le a In teu chuh thilpha’n a hihdim a, Minunsiete ngaihtuohna vang chuh kei a pat in gamla tak ah a um a.

¹⁹Mi diktatte chun a muu a, a kipâk u a, Sietna neilote chun amau haw chuh a nuihsan u a,

²⁰I melmateu chuh satthâk in a um u a, a um nalaite chuh mei in a katum a,” ti’n.

²¹Pathien tawh kicham unla, thamuong takin um inla, Tichun, nang dingin thilpha hung pawt in a.

²²A kam apat a sinsakna thu pawtte chuh kilak tei inla, A sinsak na chuh na lunggil ah vawp pha’n.

²³Bangakai hihtheipa kawma na kingaihniem, na puon-In apat diktatlohna cheng chuh na lâkdawk phawt chun tundin hi’n la.

²⁴Sana chuh leivui guola na ngaih a, Ophir sana haw chule luicha suong banga na ngaih chun,

²⁵Tichun, Bangakai hihtheipa chuh na go hung hi’n tin, Nanga dingin dangkathîk mantam tak hung hi’n a.

²⁶Tichun, Bangakai hihtheipa achun kipâk ta’n na tin, Pathien lam chuh nga ta’n la.

²⁷A kawmah paucham ta’n na tin, Amân hun dâwng intin, Tichun, na thutiem haw chuh pie ta’n la.

²⁸Na thilhihna chengah lawhting in na tin, Na lampi chuh vakin khawh zing in a.

²⁹Midang te chuh tawhniem a a um tieng u leh a chapo ziekuh ahi na ti a, Mi kingainiemte chuh a hukdam sek ngâla.

³⁰Amah chun mi gilote chuh hukdam intin, Na khut thienthona chun amau chuh hukdam in um ina.