Read Gangte JOB 24 Bible Online

JOB 24 - Gangte bible

JOB 24

¹Bangakai hihtheipa chun bang zieka vaihawmna hunte guot lo a, Amah hete chun bangti a a nite chuh a muh loh u a?

²Mi nunsiete chun gamgi a chawn u a, Gan guolte chuh a pawng lâk u a, a vulh u a,

³Pa neilote sabiltung chuh a delhmang sak u a, Meithaite bâwngchal chuh bat thasang in a lâksak u a.

⁴Mi tasamte lampi chuh a sukbing sak u a, Leichung a mi chagahte chuh a kisel mang sek ui.

⁵Gam sabiltungte guolin gamthip ah nek ding a hawl u a, A chateu nek ding hawl in gamthip a chun a vak viel viel sek ui.

⁶Amau lo hilo a buh chuh a ât u a, Mi nunsiete grep lawh mawk chuh a lo u a.

⁷Puon beiin zankhuo’n a kuol u a, Khuo vawt lak achun kikhuhna dingin puon a nei puou hi.

⁸Tang chunga guohpi chun a chap chêk a, Kihumbitna dingin suongpi a bel u a.

⁹Pa neilo, nawi cheplaite bawhthâk sak a chîng u a, Chagahte nausen haw chuh bat thasang in a lau a.

¹⁰Silhlechen beiin sangawn in a vakvai u a, Gilkiel kawmin buhphal haw chuh a puu a,

¹¹A lo kikal hawu achun thau a thawk u a, Himahlele, dangchâk a thuok u a.

¹²Khawpi achun mite chuh thi ding in a tau u a, A liemte aw chuh panpih ngaiin a kiko u a, Himahleh Pathien in a pauchamnau chuh a bengkhawn puoh a.

¹³Khawvak deihlo a kiphin a hung um u a, A lampi dinguh kihet lo, A lampi diktak le hawh nuom umlo.

¹⁴Gimthei leh tasamte chuh that dingin, tuolthatte chuh phalvak in a tho u a, Zan leh gucha guolin a gu zel u a.

¹⁵Zawlsai mit chun khawmiel chuh a ngaka, kuoma’n ei mu puo’n au ti’n, a mai a kisiem sieu a.

¹⁶Thim lai in Inte chuh a vitvang u a, sun leh a kikulkhup u a, khawvak lam le a he sek puou hi.

¹⁷Amau a ding chun thim sah tak chuh zingkal ahi a, thim laka lauhna chuh amau a dinga a guolphau ahi.

¹⁸Minunsiete chuh tuilien in a tawkmang a, Lei chunga a chanvo u chuh hansiedawl hi ahi. Grep chil dingin kuomah a grep huon u ah a chieh kha puou hi.

¹⁹Khuo lum leh vawt in vuk tuite a tawhmang bang hin, Sheol in mi gilote chuh a tawk mang sek hi.

²⁰Sûl in amah chuh a hengilh ta a, Than in limsa takin ne ta’n tin, Amah chuh hetzing hi ta puo’n tin, Nunsietna chuh thingbâk bangin bawng in a.

²¹Numei cha nei thei lote chuh a sugimthei u a, Meithai chungah thilpha a hih kha puou hi.

²²Pathien chun a hatna’n thilhihtheite hinna chuh a suksau sak nalai a, Dam dinga a kineploh nung un le a tho dawk u a.

²³Bitna a siem sak u a, zie taka chun a châwl u a, A lampiu achun a mit a chu zing a.

²⁴Amau chuh chawmkhat dawp san in a um u a, chun, a mangthai u a, Pakcha guolin a vuoi u a, a tuoi u a, Buhvui banga âttan in a um tau a.

²⁵Tuhin khutichu hi kileh, kuo a zuou gen ei ti thei ding, Chuleh ka thugen chuh a dik puoi tih kuo a phawchien thei ding?