Read Gangte JOB 26 Bible Online

JOB 26 - Gangte bible

JOB 26

¹Tichun, Job chun a dâwng a:

²Thahatna neilo mi chuh bang na ti panpih ahi ta’m? Thagui neilo mi bân chuh bang na ti hukdawk a?

³Pilna neilo mi chuh bang na ti thumawp a, A kawma hetna bukim set na phuondawk sak ding ahim?

⁴Kuo panpih na’n ahim thu na gendawk a, Kuo thagau ahim na kawma pata hung pawtdawk chuh?

⁵Nuoi lama mithi khuo chuh, a sunga tuite leh a chêngte pum in a kithing u a.

⁶Pathien masang achun Sheol chuh ngawnchang ahi a, Abaddon chun khuhna a nei diek puoi.

⁷Mun-âwng achun mâllam chuh a hihpalh a. Lei chuh bangmah lo in a khaikang a.

⁸Meipi sah tak chun tui haw chuh a chûnkhawm a, Mei chuh a nuoi haw achun a puok zak puoi.

⁹Thalik chuh a puon in a khuh a, A chung achun mei chuh a zîn sak a.

¹⁰Tuite ding chun gamgi a siem a, Sun leh zan a tâwp macheng a ding in.

¹¹Van kingakna khuom haw chuh a a kilîng u a, a hilhgaih tieng leh, Lau in a kithingsie sek ui.

¹²A thilhih theihna chun tuipi chuh a hihkhen a, A thuthiemna chun mi chapo chuh a khên pai a.

¹³A huih chun van chuh a hihthieng a, A khut chun gulpi tai lai chuh a sunlet a.

¹⁴Ngaitie, ziehaw hi a lampi pawlam thilte mai ahi, A chanchin hi eihaw’n tawmcha mai ahi I het uh, Mahleh a thilhih theihna vanpi gi chuh kuo a hechien thei ding?