Read Gangte JOB 27 Bible Online

JOB 27 - Gangte bible

JOB 27

¹Chun, Job chun a thugen a sunzawm a:

²Ka thiemna lamang a, ka hinna sulungkhampa, Pathien, Bangakai hihtheipa min chun ka gen ahi.

³Ka hinna hu ka sunga a um lai chan, chun, ka nak a Pathien hu a um lai chan chuh,

⁴Ka mûk in gitlohna thu gendawk hiel puo’n tin, Ka lei hin le zuou thu gendawk diek puo’n a.

⁵Nanguh thiem hun chansak ding chuh Pathien in a zanuom puoi. Ka thih tieng gei in ka ginumna thu keimah apat lamang puo’ng ka.

⁶Ka dikna chuh tudet ing ka ting, thah suok ngeilo ding ka hi, Ka lungthim in kithiemmawhna nei puo’ng ka.

⁷Ka melmate ei dote chengcheng, Minunsie ei kilanpihte chuh diktatlote banga gawt in um u hen.

⁸Pathien ngaihsak lote dingin kinepna banga um? Pathien in a hinnau a lâkmang ngâl chun?

⁹A chunga buoina a tun lai in, Pathien in a kiko thawm a ngaitha na dem?

¹⁰Bangakai hihtheipa chungah a kipâk na dem? Pathien chuh bangtik lai inle a sam na dem?

¹¹Pathien thilhih theihna mat dân hun sinsak ing ka, Bangakai hihtheipa thil guonggalh chuh îm puo’ng ka.

¹²Ngaitiem u, nang haw ngêi in na bawn un na muu a, Bangti dana na bawn u a bangmahlo hung hi na hiu hi?

¹³Pathien kawma minunsie chanvo chuh ziehi ahi, Mi sugimtheite go chan, Bangakai hihtheipa kawma a sân u chuh.

¹⁴A chateu a hung pun u chun, chemzâm thuok ding mai ahiu a, A suonteu chun an nêk khawp le nei kha puo’n au.

¹⁵A nunga dam sunte chuh hipi’n thiu intin, A ziteu chun le sûn diek puo’n au.

¹⁶Dangkaguo chuh leivui guolin khawlkhawm hen la, A silhlechente chuh leibel bangin tiengkhawm mahleh;

¹⁷Zie guol chun a hihthei maithei hi, Miphate chun silh zawu intin. Mi ginumte chun dangkaguo chuh kihawm in au.

¹⁸A In sak chuh mawmgâng tawbang ahi a, Mi, gâlveng in a bûkcha a siem bang phetin.

¹⁹Mi hausa chuh kuol intin, mahleh, lâkkhâwm in um puo’n a: A mit a vak hak a, mahleh, a hauhsakna chuh a bei tai.

²⁰Amah chuh lauh-um na’n tuilien bangin a nawh a, Zan kâl in amah chuh chinpei in a tawkmang a.

²¹Suohlam huih in a mût mang a, a beimang ta a, A mun a pat in a phietmang ta a.

²²Pathien in amah chuh paihtha’n tin, hâwi puo’n a, A khut a kipatin thingmang in a.

²³Mite’n a khut uh betkhum untin, A mun achun amah chuh chekkhum in au.