Read Gangte JOB 28 Bible Online

JOB 28 - Gangte bible

JOB 28

¹Dangkaguo laihdawkna khuk a um ngêia, Sana thitthienna mun le a um hi.

²Thik hi lei apat a kiladawk ahi a, Dâk thik hi suong apat a lâkdawk ahi.

³Thil laihdawkte chun thim lak ah a sutawp u a, Lei nuoi sunggil thuk pên apat leh, Thim laka suongthikte chuh a va hawldawk sek ui.

⁴Mite chênna khak lohna ah a chieh u a, A chunga khuolzin vakviel te’n a hengilh u a, Mite um lohna ah a kikhai u a, a kipei a kipei u a,

⁵Leia pat hin nek ding a hung pawtdawk a, Himahleh, a nuoi lam vang chuh meia kilieu tawbang ahi.

⁶Zie a suonghaw lak achun sapphire suong a um a, A leivui lak achun sana a tel a.

⁷Zie lampi chuh vacha sasiel nete’n a he puou a, Mulukawlh mit in le a mu kha diek puoi.

⁸Gamsa chapo tak ten le a tawh kha diek puou a, Zie tak achun Sakeibaknei lauh-um takte le a chieh kha puou hi.

⁹Amau chun meisuong chuh khut in a lai u a, Tang lien tak takte chuh abul apat chun a leh-tun a.

¹⁰Suongpi chung achun tui luonna dingte a lai kuok a, A mit u chun thil lul takte chuh a mudawk ta a.

¹¹Luipi nâkte chuh a hukbing u a, Thil kiselte chuh vak ah ahun ladawk sek ui.

¹²Mahleh chitna chuh khawitaka muh theih ding ahi? Chun, hetna umna chule khawitaka um ahi?

¹³Mihiem in a lampi a he puoh a, chun, mihing gam achun muh le ahi diek puoi.

¹⁴Kawkhuk thuk chun, “Kei mah ah a um puoi,” a ti a, Tuipi chun le, “Kei kawmah a um diek puoi,” a ti a.

¹⁵Sana a châwk theih ding guol ahi puoh a, A man dingin dangkaguo le teh theih ahi diek puoi.

¹⁶Ophir sana’n a tuk thei puoh a, onix suongmantam ahim, sapphire ahim inle a tuk puoi.

¹⁷Sana leh lim-et in le a kibatpih thei puoh a, Sana thieng tak zem hawih in le a then theih diek puoi.

¹⁸Chitna man ding chun suongmantam chitin koral te, krustal haw nasan le bangmah ahi puoi.

¹⁹Ethiopia gama topaz tawh le a teh theih puoh a, Sana thieng tak tawh le a teh theih puoi.

²⁰Chitna chuh khawia hung kipan ahi? Hetthiemna chule khawitak a um ahi?

²¹Mihing chengcheng mitmuh apat a selgûk a um in, vanthamzawl a chung leng vachate kawma le sel gûk ahi.

²²Manthaina leh thihna chun, “Zie thuthang chuh I bil un I zau hi,” a tiu a.

²³Pathien in a zawtna lampi chuh a he a, chun, a umna mun le a hêi.

²⁴Amah chun kâwlmawng tawppen tieng hi a mu a, Van khupsin nuoi a thil chengcheng hi a mu a.

²⁵Huih chuh thahatna a piek lai khan, Tui haw chuh tehna chun a tehdawk vek ahi.

²⁶Guohtui tam dân ding a siem lai khan, Van-gi leh kawlphe lampi ding a siem a,

²⁷Amah chun a mu a, a phuong a, A hih det a, ahi, a hawldawk a.

²⁸Chun, mihing kawmah, “LALPA kihchak hi chitna ahi takzet a, Thil phalo taihsan hi hetthiemna chuh ahi takzet hi,” a ti a.