Read Gangte JOB 29 Bible Online

JOB 29 - Gangte bible

JOB 29

¹Chun, Job in a tehkal thu gen a sunzawm a:

²Aw, ka hinna hi kipan thak kit thei hi hen la, Pathien in ei ven lai nihaw bang khan.

³A thaumei ka lu chunga a vak sek lai a, Thim laka le a vak chuh sen a ka chiehpih lai bang khan;

⁴Ka vanglai nite ka mat lai a, Pathien kivawppihna ka puon-In a a um lai bang khan;

⁵Bangakai hihtheipa ka kawma a um lai a, Ka chate ka kimvela a um lai bang khan;

⁶Ka kêngpêk te bâwngnawi tuikhal a sawp ahih lai khan, Suongpi’n kei a dinga sathaute a suohdawk gei gui lai bang khan;

⁷Khawpi kawtkhak zuona ka chieh lai bang khan, Kawtthêl a chutna ka siem lai haw bang khan;

⁸Tangvalte’n ei muu a, a kisel u a; Upate chuh a kipan u a, a ding dawk u a.

⁹Lengte holim a hai u a, A khut un a kam uh a hîm u a.

¹⁰Miliente aw chuh a thip chut a, A khadang u ah a lei uh a bek a.

¹¹Bil a zate’n hampha ei sau a, Mit a mute’n ei hetpih u a.

¹²Mi gimthei kapte ka hukdawk sek ziek in, Pa neilote, panpih ding neilote le.

¹³Mangthai ding kuonte hamphatna ka chungah a tung a, Meithaite lunggil le kipâkin la ka sak sak a.

¹⁴Kitûpna puon in ka kithuom a, ei tuom vel u a, Ka dikna chuh puonâk chuol leh dielkawp in ka mang a.

¹⁵Mitdûkte dingin mit ka hi a, Kengbaite dingin kêng ka hi.

¹⁶Chagahte dingin Pa ka hi a, Melhetlohte le a thuu ka buoipih hi.

¹⁷Migilote mawlh chuh ka subawng a, A hau a a pehsau chuh ka satdawk a.

¹⁸“Tichun, ka bu a chun thi den ing ka ting, Ka nite chuh pîlnel bangin hihpung ing ka,” ka ti a.

¹⁹“Ka zungte chuh tui lak achun zâm zak intin, Zankhuo’n ka bâkah dâitui châm zing in a.

²⁰Ka lopina chuh keimah ah thak zing intin, Ka khut ah ka thalpi le thak zing ina,” ka lunggil in ka ti a.

²¹Kei lam ah mite’n a bil uh a dawh u a, a ngak u a, Ka thugen chuh thipkêi in a ngak sek u a.

²²Ka gen zawh tieng leh a pau kit ta puou a, Ka thugen chuh a chung u ah dâitui bangin a kie a.

²³Guohtui bangin ei ngak zing sek u a, Guohtui kie nunung ngak bangin a kam uh a ka lien u a.

²⁴Kimuonna a neih loh tieng u leh ka nuihpih a, Ka kipahna mel put chuh a paih tha diek puou hi.

²⁵A lampi dinguh ka tel sak a, a lawiupa dingun ka chu a, Sepaih hawn lak ah a leng uh bangin ka chu a, Lusûnte lungmuonpa bang mai in ka um a.