Read Gangte JOB 3 Bible Online

JOB 3 - Gangte bible

JOB 3

¹Zie nung chun Job chun a kam a ka a, a pienni ni chuh hansie a buok ta a.

²Chun, Job chun hiti hin a gen a:

³Ka pienna ni chuh beimang henla, Gil a vawpsaka ka um zan, cha pasal na vawp tai a kitih na chu tawh.

⁴Zie ni chuh thimna hi hen la, Chunglam apat in Pathien in ngaihsak kihen la; Vak inle salh dah hen.

⁵Thim sah tak leh thihna lim chang u henla, A chungah meipi zing hen la; Sun a thim chuh tizat-um hielin um hen.

⁶Zie zan chuh thim sah takin tuom zing hen la, Zie kum a nite lak achun simkhawm hidah hen la; Tha simna laka le tel sak hi kihen.

⁷Ahi, zie zan chuh zan thawmhau hung hi hen la, Kipaka kiko aw zak hi kihen.

⁸Ni hansie buokkhum theite chun zie ni chuh hansie buok u hen la, Leviathan suklungnat dân thiemte chun sulungnau hen.

⁹A zingsawl aksi chuh thim hen la, Vak hawl u hen la, mu kiu hen la, Zingkal phalvak le mu diek kiu hen.

¹⁰Ka nu sûl kawtkhak a na khâk loh ziekin leh, ka mitmuha buoina le a sel diek loh ziekin.

¹¹Bangati a sûla ana thi lo ka him? Bangati a gilpi apat a ka pawt a ka hat a na tâwp loh?

¹²Bangati a ka nu khuphaw chun ei na do kang uh ahim? Bangati a nawitui a ei na vak ahim?

¹³Tuhun ahih ana kuol a, thip dil del ta ding hi’ng a; ana ip ing ka ting, kichawl ta ding ka hi.

¹⁴Lei lengte leh lemguotpihte, A siesa amau a dinga siemphate chu tawh kuol ding ka hi.

¹⁵A hihloh leh, lawiupate sana sum nei a, Dangka a a In uh hihdimte chu tawh.

¹⁶A hihloh leh, khaw-eng mu man lo nausen bang ahim, a hunlo a pieng a sel mang a um bangin, ana umlo himai leng aw!

¹⁷Zie tak achun mi nunsiete a sukbuoina chuh bei untin, Zie tak achun mi gimthei chuh kichawl dam ta’n a.

¹⁸Zie tak a chun suongkul tângte chuh a zalen khawm u a, Suongkul ngakpa aw le a za ta puou hi.

¹⁹Zie tak a chun mi lien mi neu a um khawm u a, Suok le a pu apat in a zalen tai,

²⁰Bangati a gimtheihna thuokpa chun khawvak a muh ahi? Bang zieka lunggil a gimthei taka hingpa hih hinna piek ahim?

²¹Thih a nuom tuntun a, mahleh, a mu puoh a, Go selguk hawl sanga nasa zaw’n a hawla,

²²Thân a muh tieng u a nasa taka kipâk mah mah ding hilo ahiu em?

²³Mi, a lampi sel mang saka umte kawma bang zieka vak kipie ahi? Pathien in dai a kaihkhum te kawmah.

²⁴Lungkhamna hi ka an tawbang ahi a, Ka tauna chuh tui bangin a luong dawka.

²⁵Ka lauh lam tak chuh ka chungah a hung tung a, Ka tizat chi tak chuh ka kawm a hung tung a.

²⁶Nuom takin ka um thei puoh a, ka um hiet hiet thei puoh a, chawldamna ka nei puoh a; buoina a hung tung zaw sek hi.