Read Gangte JOB 30 Bible Online

JOB 30 - Gangte bible

JOB 30

¹Mahleh tuhin chuh ka sanga naupang zawte nasan in, nuihzat bûk in ei nei u a, a pateu, ka gan guol vengte uicha haw laka chu dinga ka deihlohte nasan khan.

²Ahi, a khut thahatnau apat chun banga ka phatchuompih ding? A hatna teu a tuoi zo ahi tai.

³Taksapna leh kiel ziekin a liengvai u a, Gamgaw mun leh lei gawte chuh a khuot u a.

⁴Anchehlohing te chuh an in a sên u a, Amau chuh munphieh bawk in a kituom lum u a.

⁵Mihiemte lak apat in nawhmang in a um u a, Gucha delh guolin a nung u a chun a kiko khum u a.

⁶Guom sunghaw achun a chêng u a, Leikuo leh suongpi hawm haw achun le.

⁷Hampa bawk lak haw achun a kiko u a, Thakhai nah nuoi haw a chun a kisiekhawm lemlum uh a.

⁸Mi ngawlte chate ahiu a, ahi, panna beite chate, lei sangin le a namsie zawu hi.

⁹Tuhin vang chuh amau haw a dingin La tawbang mai ka hi ta a, Ahi, amau haw a dingin holimna mai ka hi tai.

¹⁰Ei kihdak u a, keia kipatin gamla tak ah a ding u a, Ka mitmuh a chil siet le khawk a sa puou hi.

¹¹Pathien in ka khauhuol chuh a phel a, ei suniem ta a, Ka ma a sakawl thikpeh chuh a kawihthau a.

¹²Ka changlam ah mi dukdaklote a hung tho dawk u a, Ka keng a sawn mang u a, A manthainau lampi haw chuh kei chungah a ngau a.

¹³Ka lampi chuh a susieu a, Ka vangsietna chuh a gen viel u a, Kuoma’n a dal puou hi.

¹⁴A âwng letna tak ah a hung u a, A sietna laite achun a kithawlh u a.

¹⁵Lauh-umna ka chungah a hung tung a, Ka lopina chuh huih bangin a mût mang u a, Ka hauhsakna chuh meipi bangin a mang ta a.

¹⁶Tichun, ka sung apat in ka thagau chuh sun dawk ahi a, Gimtheihna nite chun ei man ta a.

¹⁷Zan leh ka guhte hin ei chip chêk chûk a, Ka natna ei tum hut hutte hi a châwl diek puoi.

¹⁸Ka natna hi a nat mah mah ziekin ka silhlechen a susie ta a, Ka puonâk chuol ngâwng in ei man a.

¹⁹Amah chun buonthuok lak achun ei paih lut a, Leivui leh vut tawbang mai ka hi tai.

²⁰Nang ka hun sama, nei dâwng puoh ngâl a, Ka ding dawk a, nei ngaihsak puoh ngâl a.

²¹Keia dingin na ningkhel ta a, Na khut hat in nei sawi a.

²²Nangin huih chung ah nei dawm to a, a chungah nei chut sak a, Huihpi gi vengvung lak achun nei tawk viel viel ta a.

²³Ahi, thihna ei hun tun sak inla tih la ka he ngâl a, Mi cheng chenga dinga In na guot achun.

²⁴Mahleh sietna a puksie mi chun a bân zak lo ding ahim? Ahihloh leh a tuohsietna achun panpihna ngên in kiko lo ding ahim?

²⁵Buoina tuokte ding chun ka kap sek hilo ahim? Tasamte ding chun ka hinna a lungkham sek hilo ahim?

²⁶Himahleh, thilpha ka hawl a, thilsie a hungtung a, Vak ka ngak a, thimna a hung tung a.

²⁷Ka lung a phu tut tut a, a hai thei puoh a, Thuokna nite chuh ka chungah a hung tung ta a.

²⁸Nisa khawh ziek hilo in ka vawm a, Kikhawmkhawmte lak achun dingin panpihna ka ngên a.

²⁹Si-âlte dingin suohpihpa ka hung hi a, Vakengsang te a dingin guolpa ka hi a;

³⁰Ka vun chuh a hung vawm a, a kilip a, Ka guhte chuh sa hut hut in a ka a.

³¹Zieziekchun ka kingkang githaw chuh sûnna a suok ta a. Ka châmngai chuh kapte aw a suok tai.