Read Gangte JOB 32 Bible Online

JOB 32 - Gangte bible

JOB 32

¹Zieziekchun, Job chuh amah mitmuha thiem a kisak bêk ziekin zie mi thum te hin a dawng zawm ta puou a.

²Ziephet chun, Pathien in thiem a chansak hilo a, amah leh amah thiem a kichan ziek chun, Buz mi, Ram suona Barakel chapa Elihu chuh Job chung a chun a lungna ta a.

³Job chuh thiemlo sa ngâla a dâwn ngaihna a hetloh ziek u chun, Job guolte mi thum chung achun le a lungna ta a.

⁴Amau haw chuh amah sanga upa zaw a hih ziekun, Elihu chun thipkêi in a na ngak zing zaw a.

⁵Himahleh, zie mi thum te kam achun dawnna ding himhim a um ta puoi tih Elihu chun a het phetin a lung a na ta a.

⁶Tichun, Barakel chapa Elihu, Buz mi chun hiti hin a dâwng a: Kei chuh kum lama chapang ka hi a, nang u chuh na upau a, Zieziekchun ka na kidêk hâm hâm a, ka ngaihdan le ka gen ngam loh ahi.

⁷Nite chun hun hilh in tin, Kum tamtak chun chitna hun sinsak lo ding ahim, ka ti a,

⁸Himahleh, mihing a chun thagau a um a, Bangakai hihtheipa hatna chun hetthiemna chuh a piek zawk ahi.

⁹Kum tam ziekin mi a ching diek puou a, teksie te’n thudik a he thei diek puou hi.

¹⁰Zieziekchun ei na ngaithau inla, ka ngaihtuoh dân hun gen ing ka, ka tih ahi.

¹¹Ngaitiem u, na thuu ka ngak zing a, Na thuching gen teu ka na ngaitha zing a, Banga ka gen ding ti a na hawl sung cheng u khan le.

¹²Ahi, phachuomngai takin ka hun na ngak zing a, Ngaitiem u, Job thuzawh thei ahim, A thu lektha thei ahim, Na lak u ah kuomah na um puou hi.

¹³Chingthei un, Chitna ka mudawk tai, Mihiem hilo in, “Pathien mai in zo thei in a,” ti kha’n lau.

¹⁴A thugen chuh kei ei kalh lam a hi puoh a, Na thugen hawu bangin ken le amah chuh dâwng diek puo’ng ka.

¹⁵Amau chun mak a sau a, a dâwng kit ta puou a, Thu kamkhat chale gen ding a nei ta puou hi.

¹⁶Thip kêi a dinga a dâwn tâk loh ziekun, ka ngak zing dinga ahim?

¹⁷Tuhin ken dâwng ing ka ting, Ka ngaihdan gen ing ka.

¹⁸Thu gen ding ka hau ten ngâl a, Ka sunga thagau in ei nawh mah mah a.

¹⁹Ngaitiem u, ka lunggil hi uain hu pawtna bei bang ahi a, Uain ûm thak bangin puokkêk ding ahi.

²⁰Ka chawlhdam deuh na dingin thu gen ing ka ting, Ka kam ka’ng ka ting, dâwng ing ka.

²¹Kuomah khenchuom puo’ng ka ting, Kuomah pahchak lêm in tha diek puo’ng ka.

²²Mi pahchak lêm chuh ka thiem puoh ngâl a, Khutilochun, kei ei siempa hin ei lamang vak kha’n a.