Read Gangte JOB 33 Bible Online

JOB 33 - Gangte bible

JOB 33

¹A bang hileh, Job, ka thu gen hi ngaitha’n la, Ka thugen chengcheng hi a na ngaitha tie.

²Ngaitie, ka kam ka ka a, Ka kama ka lei in thu chuh a gen ahi.

³Ka thugen haw chun ka ngaihtuohna dik ziete phuong intin, Ka mûk chun a thu hette dik takin phuong ding ka hi.

⁴Pathien thagau chun ei siem a, Bangakai hihtheipa hu chun hinna ei pie a.

⁵Na theih chun ei dâwng inla, Kiguonggalh inla, ka ma ahin na thute chuh hung guoltuok tie.

⁶Ngaitie, Pathien mitmuh achun nang leh kei hi kibang I hi a, Tung a siem gêl gêl I hi ngâl a.

⁷Ngaitie, kei hi ei kihcha ki’n la, Na chunga ka hun ngak khum hi gik taluo puo’n a.

⁸Ka zak a le na gen ta a, Na thugen aw gi chuh ka na za ta a.

⁹“Sukkhelhna nei lo in ka thieng hi, Pawikhawihlo ka hi a, keimah ahin gitlohna a um hiel puoi.

¹⁰Ngaitie, ka chungah lemchâng a hawl dawk a, A melma tawbang in ei ngai a;

¹¹Ka keng ah kawl ei buh sak a, Ka chiehna cheng a suidawk hi,” na ti a.

¹²Ngaitie, hun dâwng ing ka, Zie taka hin na dik zo zet puoi, Job, Pathien chuh mihingte sangin a nasa zawi.

¹³“Khatvei le ka thugen ei dâwng puoi,” ti a, Bang zieka amah chuh na dodal ahim?

¹⁴Pathien chun khatvei ahim, nihvei ahim thu a gen sek a, ahih ziekin, amah chuh a muchien thei puou hi.

¹⁵Mang lama, zan kilâkna achun, Mi chuh nuom taka a hung ihmut u a, Zalkhun chunga a ihmut buoh buoh lai un.

¹⁶Tichun, mite bil chuh a hih hawng a, Tichun, a thu muh u chuh a hihdet a.

¹⁷Mihiem chuh a thilhihteu apat a a sukhaih theihna dingin leh, A uonnau chuh a selguk theihna ding un.

¹⁸Amah chuh thâna liem lo in a vawppha a, A hinna le chemzâm apat mangthai lo in.

¹⁹A zâlkhun chunga chun natna a thunun in a um a, A guhte chun chip chêk chûk in;

²⁰Tichun a hinna chun ante chuh a haw ta a, Sa lim huoi takte le a duh ta puoh a.

²¹A taksa chuh a hung gawng deuh deuh a, muh kham ahi ta mang puoh a, A guh kimu theilo cheng khale a hung dawk ta a.

²²A thagau chun thihna khuk chuh a naih a, A hinna chun hinna la sekte lam chuh a naih ta a.

²³Amah dingin sawlchak khat, pauleh dingin, Sangkhat laka khat, Mihing kawma amah a dinga dik bang ahim etsak dingin um hen la;

²⁴Zie mi chun amah deihsak takin, “Thâna liem lo in hukdam un, Zie hin amah kitatna ding a um hi.

²⁵A phehlevo hi naupang thak kit hen la, A vanglai hatna nite chuh hungkit ta hen,” ti hen;

²⁶Amah chuh Pathien kawmah a paucham a, Amah chuh a na pawm intin; Tichun, a mel chuh kipâk takin mu’n tin, A diktatna chuh mihing kawmah pie kit in a.

²⁷Tichun, mite masang achun la sa’n: “Ka gilo a, thil dik chuh ka na chiehmangsan ta a, Himahleh ei dinthuk puoh a.

²⁸Amah chun thâna liem lo dingin ei hukdawk a, Ka hinna chun vak chuh mun a,” a ti a.

²⁹Ngaitie, mihing in hinna a muh theihna diu a, Thân apat a puikit dingin,

³⁰Pathien in zie thil chengcheng hih, Mihiemte kawmah nihvei thumvei a hih ahi.

³¹E! Job, gunchuh takin ei na ngaitha’n, A na thip inla, hun gen ing ka.

³²Gen ding na neih chun ei hun dâwng inla, Gen in, thiem hun chan sak ka nuom hi.

³³Khuti a hih loh ngâl chun kei ei ngaitha’n la, A na thip hiet hiet inla, chitna hun sinsak ing ka.