Read Gangte JOB 34 Bible Online

JOB 34 - Gangte bible

JOB 34

¹Elihu chun a gen zel a:

²Nang haw miching te haw, ka thu ngaithau inla, Nang haw mi thiemte haw, na bil uh a na dawh un.

³Kam in anlim a het bangin, Bil in thute chuh a khen sek hi.

⁴Ei u a dinga dik chuh tel leng un, Apha chuh eihaw’n kihet hitiu.

⁵Job chun, kei chuh ka diktat hi, Pathien in ka thiemna chuh a lamang ta a.

⁶Ka dikna a le zuou gen nei hih sak nau a chuh, Sukkhelhna ka neih loh sasa’n, ka liemna hi sukdam guol ei puoi, a ti ngâl a.

⁷Job hi bang tawbang mi ahi a? Muhsitna chuh tui guola dâwn a,

⁸Manlohna hihte kivawppih a, Minunsiete tawh vak khawm sek chuh?

⁹“Pathien chunga kipah hi, Mihiem in bangmah a phatchuom pih puoi,” a ti ngâl a.

¹⁰Zieziekchun, nang haw hetthiemna neite haw, ei ngaithau in, Pathien in thil gitloh huoi tak hih in, Bangakai hihtheipa chun thil diklo hih hiel puo’n a.

¹¹Mi a thilhih bang zel un dinthuk intin, Mi cheng chuh a umdan uh bang zelin a chung u ah tun sak ding ahi ngâl a.

¹²Ahi, Pathien chun nunsie takin hih hiel puo’n tin, Bangakai hihtheipa chun vaihawmna chuh sulamdang hiel puo’n a.

¹³Lei chung enkawl ding hin kuo’n ahim thu pie a, Ahihloh leh khawvel pumpi hi kuo’n ahim a chunga a ngak?

¹⁴A thagau chuh amah kawm mah a a lâk kit a, A hatna hu chuh amah kawma a lâkkhâwm kit ngâl chun,

¹⁵Phehlevo cheng tawh beimang khawm untin, Mihing chuh leivui suok kit ding ahi ngâl a.

¹⁶Hetthiemna na neih chun ngaitha’n la, Ka kamsuok hi ngaitha’n.

¹⁷Thudik deihlote chun vai a hawm dinga ahim? Mi diktat leh thilhih thei te chuh thiemloh na chansak dinga ahim?

¹⁸Lengpa kawmah, “Na nunsîei” tih ahim, Ahihloh leh milien kawma, “Pathien na ngaihsak puoi” tih a kilawm em?

¹⁹Mi lalte chunga langkaih lo kuo a um? Mi hausate sanga mi gimtheite bawlpha zaw kuo a um? A bawn un a khutsuok ahi ngâl u a.

²⁰Mit phet loh kâl in a thiu a, Zan lai in mite a kilîng u a, a mangthai u a, Mihatte le khut lo a lâkmang in a um ui.

²¹Mihingte umdan chungah a mit a chuh zing a, A kalsuon teu chengcheng a mu suok a.

²²Manlohna hihte a kiselguk theihna dingun thim a um puoh a, thihna dailîm le a um diek puoi.

²³Pathien masanga vaihawmna a chieh na ding in, Mihingte a dingin hunbi a guot chuom diek puoi.

²⁴Mihatte chuh a hih nêl dimdem a, a thuu ngaihsak lo in, A mun u ah midang te a kawih theng sek a.

²⁵Khutibang chun a thilhih teu chuh he chien in, Zan leh amau haw a hihsie a, a gawt mang sek hi.

²⁶A gitloh ziekun mite mitmuh in amau chuh, a gawt sek hi.

²⁷Amah apat a a petmang ziekun leh, A dante a khawksak loh ziek un.

²⁸Tichun mi gimtheite kiko git chuh amah kawm a tun sak a, Amah chun sukgimtheih a umte kiko thawm chuh a na za ta a.

²⁹Amah chuh a na thip ta leh kuo a thiemloh chan sak ding? A mel a sel phat leh kuo a mu thei ding? Nam pumpi ding leh mimal a dingin le akibang gêl gêl hi.

³⁰Pathien helo mi’n vai a hawm loh u a, Mite thânga awksak ding kuomah a um lohna dingin.

³¹Mi’n Pathien kawm achun, “Thununna chuh ka thuok ta a, gawtna ka thuok nalai set a,

³²Ka muh loh chuh ei sinsak inla, Manlohna ka hih in le, Hih kit ta puo’ng ka,” a ti kha a ahim?

³³Pathien ditthukna chuh nang deih bang tak chuh ahi dem? Na kalh ten na a chuh? Kei hilo in nangin na tel ding ahi, Zieziekchun na het chuh gen in.

³⁴Mi hetthiemna neite leh mi chingte, Ei ngaitha ta cheng in le,

³⁵“Job hih hetna nei lo in a pau maimai ahi, A thugen ahin chitna a um puoi,” ei tih pih in au.

³⁶Job hi migilo pau a a pau ziek hin, Phawtchien in um leh ka tih ahi.

³⁷A gitlohna behlap in a kiphin nalai a, I lak u ah a khut a bêng a, Pathien kalh lam in a thu chuh a hihpung ta a.